1 Peter 3

Mien Bible (Thai Script) © Thailand Bible Society, 2007

← Chapter 2 Jump to: Chapter 4 →

1เม่ย บัว โหฒว เอ๊า เญย เมี่ยน หย่า ฟี่ ฮนั้ง เญย อ๋อย หฒุ บัวะ กั้น เญย โหฆ. ฮนั้ง หน่าย, หาย เต้า โหฆ ไม้ แก้ง เสียน ทิน-ฮู่ง เญย โต์, นิ่น เญย เอ๊า โหฒว เญย สี่ ฯฒฯ ปุน นิ่น อ๋อย เสียน, เลี่ยม ไม้ หฒุ ขวิน เหยียด โจ๋ว.

2เหว่ย หฒุ โหฆ ปวัด เยียม เอ๊า โหฒว เญย หญู่ง เฒ้ย ม่าย เฮญี้ยว ท่าย หย่า ธีง-เหฑ่ง เญย.

3เม่ย บัว ฒอง เหฑว่ย ไม้ ตู๋ง ขูง ฒอง เป้ย หฒั่ง, กิ๊ด บะเปยย-บิ์น, ฒอง เจียม ฒอง ญ่าน, ฒุ เธี่ยว ตุ่น เญย ลุย-โหว.

4ต๋าว หฑวน อ๋อย หฒุ ฒอง กะญั์ว เฮญี้ยว, เซ อ๋อย หฒุ เฮญี้ยว ส่วน เฮญี้ยว ด๊าว. น้าย เซ ฒอง เหฑว่ย หย่า เหยียด ลิ์ว ไม้ ไฮ่ หฒิด. เอย ทิน-ฮู่ง หมั่ง หย่า จ๋าย ไห่.

5ฒิ่น ด่าง กัน หลง ทิน-ฮู่ง, เสียน เขา นิ่น วั้ว เต๋ย มเซียะ ตอน ฮนั้ง น้าย นอ ฒอง เหฑว่ย. นิ่น บัว บัวะ กั้น เญย โหฆ กุ๊น,

6ฮนั้ง ซาลา หมวัง อับลาฮัม นอ, เห่ว อับลาฮัม โหฒว นิ่น เญย เฒี้ยว. สี ก๊อง เม่ย บัว โหฒว หอบ หย่า ไม้ กั้ม เหฑีย หาย หญู่ง, เม่ย บัว ฯฒฯ โหฒว นิ่น เญย เซียะ.

7เม่ย บัว โหฒว โหฆ เญย เมี่ยน หย่า อ๋อย หฒุ ฟี่ ฮนั้ง เญย ฮิ้ว ตุ๊ ค้อ-เลี่ยน กั้น เญย เอ๊า, เหว่ย หฒุ มเซียะ ตอน เก้า เมา มจั่ง ตอน. หย่า อ๋อย หฒุ ท่าย เอ๊า เหว่ย หฒุ นิ่น บัว เหธา เม่ย บัว ฟี่ ฮนั้ง เญย ตุ๊ ทิน-ฮู่ง เหธย ปุน เญย เอน, เซ ตุ๊ หฑิบ เหยียด ลิ์ว เญย แหม่ง. อ๋อย หฒุ ฮนั้ง น้าย นอ โหฒว เหว่ย ไม้ ปุน หาย หญู่ง ล่าน เม่ย บัว เต๋า เก๋า เญย หว่า.

8เยีย ก๊อง เต๋ย เซ้ด เมว์ย หว่า. เม่ย บัว เหยียด ฒู้ง อ๋อย หฒุ ต้ง ติ่ว เฮญี้ยว, ล่าน ค้อ-เลี่ยน ล่าน, ฮนั้ม เสียน เยซู เญย ก๋อ-โย์ว, ล่าน โหฒว หลง ปุน ล่าน, หย่า เหญี่ยม กั้น โหฒว ไฝ.

9ไม้ ตู๋ง โหฒว เอ๊าะ วิ่น เอ๊าะ. หฒุ เมี่ยน ก๊อง โตะ หย่า ไม้ ตู๋ง ก๊อง โตะ เมี่ยน. ต๋าว หฑวน อ๋อย หฒุ ปวัง หว่า นิ่น บัว, เหว่ย หฒุ ทิน-ฮู่ง เห่ว เม่ย บัว ฮนั้ง น้าย นอ โหฒว, นิ่น ฯฒฯ เหธย ฟุ ปุน เม่ย บัว.

10ฮนั้ง กีง-โซว ก๊อง นอ, “หาย เต้า อ๋อย เยียม เสย หฒั่ง ตุ๊ ออน-เหลาะ, หย่า อ๋อย ตุ๊ หลง เญย ฮนอย, วั้ว เต้า อ๋อย หฒุ กุ๊น เจี๊ยน เบียด, ไม้ ตู๋ง ก๊อง หว่า-โตะ. หย่า อ๋อย หฒุ กุ๊น เจี๊ยน ฑุ่ย, ไม้ ตู๋ง ก๊อง-แปะ ดั๊ว เมี่ยน.

11อ๋อย หฒุ กวั่ง ฆอย เอ๊าะ สี่, โหฒว หลง เญย สี่ ฮนั้ง. อ๋อย หฒุ เหลียบ ตี่ง เฮญี้ยว ล์อ แป้ง ออน หย่า หูง เจี๊ยน แป้ง ออน เญย เจ๊า มี่ง.

12เหว่ย หฒุ เฒี้ยว เญย มฒีง หมั่ง เจี๊ยน เหธา นิ่น หอบ เฮญี้ยว วั้ว เต๋ย. นิ่น เญย มน่อม หย่า หมวัง นิ่น บัว เต๋า เก๋า เญย หว่า. มป่า เฒี้ยว เญย เฮมียน ไม้ ฮวิน หมั่ง โหฒว เอ๊าะ สี่ วั้ว เต๋ย เมี่ยน อ๊ะ.”

13สี ก๊อง เม่ย บัว จอม เฮญี้ยว โหฒว คู้ สี่, หาย เต้า อ๋อย ห่อย เม่ย บัว?

14มป่า ไม้ กุ๊น เม่ย บัว เหว่ย โหฒว หอบ เญย เจ๊า หฒุ เสี่ยว โค้ว, เม่ย บัว ฯฒฯ ม่าย ออน-เหลาะ. “ไม้ ตู๋ง กั้ม เหฑีย หาย เต้า, หย่า ไม้ ตู๋ง เฮญี้ยว ฮวาง.”

15เยียม เม่ย บัว เญย เฮญี้ยว เม่ย บัว อ๋อย หฒุ ท่าย กีตู่, ปุน นิ่น โหฒว เฒี้ยว. อ๋อย หฒุ หฒั่นๆ หลิ่ว เล์ย เหฒียง เฮญี้ยว, ไฮ่ พ้อ เม่ง ปุน เต้าๆ อ๋อย ฮิ้ว เญย เมี่ยน เม่ย บัว เหว่ย หาย ติ่ว ฮนั้ง น้าย ม่าย ลั่ม ฮนั้ม. เม่ย บัว ฯฒฯ ม่าย หว่า เตา, มป่า อ๋อย หฒุ หล่ง ส่วน เฮญี้ยว ต้อ เล์ย เญย เตา นิ่น บัว.

16หย่า อ๋อย หฒุ ม่าย ไม้ ม่าย ต๋อง เฆ่ม เญย ล่าง ฟิม. ฮนั้ง หน่าย, เม่ย บัว หฒุ เมี่ยน ก๊อง โตะ เม่ย บัว เขา กีตู่ โหฒว เญย คู้ สี่, นิ่น บัว ฯฒฯ เหว่ย นิ่น บัว ก๊อง เญย หว่า หฒุ ไญ้.

17สี ก๊อง ทิน-ฮู่ง เญย หฒะเอ๋ย เซ ปุน เม่ย บัว หลาย โหฒว คู้ สี่ หฒุ เสี่ยว โค้ว, น้าย หธ่อ เก้า หลง หลาย โหฒว หว่าย สี่ หฒุ เสี่ยว โค้ว.

18กีตู่ เหว่ย ฒุ์ย ไต่ เหยียด หฑุ่น ต๋อง เหยียด ลิ์ว. เหยียด ล่าน ไม้ ม่าย ฒุ์ย เญย เมี่ยน ตี๊ หฒวัง ฒุ์ย-เมี่ยน ไต่ เหว่ย ต้อ บัว เถา ทิน-ฮู่ง. กีตู่ เญย ซิน หฒุ ไต๋ ไต่ มป่า สีง ลี่ง ปุน นิ่น แอ๋ง นั่ง ต้าย.

19นิ่น เขา สีง ลี่ง มี่ง ฒุ่น โต์ ปุน หววน เจี๊ยน โล่ วั้ว เต๋ย เมี่ยน เญย ว่วน หมวัง,

20เซ ต้ง โนยา กั๊บ ฑั้ง วั้ว หฒั่น ทิน-ฮู่ง โหฒว เฮญี้ยว ด๊าว ฒั้ว เจี๊ยน มป่า นิ่น บัว ไม้ หมวัง ทิน-ฮู่ง เญย หว่า วั้ว เต๋ย. เยียม ฑั้ง กะญั์ว เญย เมี่ยน โหฒะ, ขูง ม่าย เหฮยียด ล่าน ฮนั้ง เขา ววม ตุ๊ เหฌียว.

21น้าย ววม ปิ๋ว เม่ง เจี๋ย ววม เญย เล์ย, ต้ง อี้ หฒั่น เหฌียว เม่ย บัว น้าย หญู่ง เล์ย. น้าย ไม้ เฒ์ย หฑาว ซิน หฒั่ง เญย เตี้ยน, เซ หล่ง เหฒียบ ฒัวะ เญย ล่าง ฟิม แล์ง กัน หลง ทิน-ฮู่ง. น้าย หญู่ง เล์ย เหฌียว เม่ย บัว เหว่ย หฒุ เยซู กีตู่ ไต่ มี่ง แอ๋ง นั่ง ต้าย.

22นิ่น ฒู้ง ฝาว ทิน-ต้อง เยียม ทิน-ฮู่ง เญย บย่าว แหมง, หย่า ม่าย หฒวัง ฟิน-เมี่ยน เหธา เยียม ด๊าม-ลู่ง เหยียด ฒู้ง ม่าย หลี่ง ม่าย ชะ เญย เยียม นิ่น เญย ปั์ว-เดี๊ย.

← Chapter 2 Jump to: Chapter 4 →