1 Peter 4

Mien Bible (Thai Script) © Thailand Bible Society, 2007

← Chapter 3 Jump to: Chapter 5 →

1เหว่ย หฒุ กีตู่ เญย ซิน หฒุ เสี่ยว โค้ว, เม่ย บัว กั้น หย่า อ๋อย หฒุ เหธา นิ่น ต้ง หญู่ง ฮนั้ม เหว่ย โหฒว หวัวะ กิ่น, เหว่ย หฒุ หาย เต้า เญย ซิน หฒั่ง หฒุ เสี่ยว โค้ว, วั้ว เต้า ฯฒฯ กวั่ง, ไม้ โหฒว ฒุ์ย อ๊ะ.

2ฮนั้ง หน่าย, เม่ย บัว เยียม เสย หฒั่ง เหฒ่ง เหฌี่ย เญย เฒี่ยง โห่ อ๋อย หฒุ เอย ทิน-ฮู่ง เญย เอ๋ย โหฒว, ไม้ เอย ป้าม เมี่ยน เญย เฮญี้ยว หั่น โหฒว.

3เจี๋ย ต้าย เญย เฒี่ยง โห่ เม่ย บัว โหฒว ฮนั้ง ไม้ เสียน เญย เมี่ยน อ๋อย โหฒว เญย สี่ เก๋า อ๊ะ. วั้ว หฒั่น ขูง เซว่ย กั้น เญย เฮญี้ยว หั่น โหฒว เอ๊าะ สี่, หั่น เซียะ หั่น ตอน, ติ๊ว ฆวิน, กั๊บ ฒุ้น หญั่น เป๊ว ฮบ ฆวิน, เหธว หลุ่น หย่า โหฒว กั้ม เฑี้ย เญย สี่ ป๋าย หมิ่ว-ฝัง.

4ไม้ เสียน เญย เมี่ยน ฮนั้ม ไม้ เม่ง แปะ เม่ย บัว อี้ หฒั่น ไม้ มี่ง เหธา นิ่น บัว เหธว หลุ่น โหฒว หว่าย สี่, นิ่น บัว ฯฒฯ ก๊อง โตะ เม่ย บัว.

5มป่า ม่าย ฮนอย นิ่น บัว อ๋อย หฒุ ก๊อง เม่ง นิ่น บัว โหฒว เญย สี่ บั๋ว ทิน-ฮู่ง, ต้ง หลิ่ว เล์ย เหฒียง เซี้ยม เฒี่ยง เจี๊ยน เญย เมี่ยน เหธา ไต่ มี่ง เญย เมี่ยน วั้ว เต้า.

6เหว่ย น้าย, เลี่ยม ไต่ มี่ง เญย เมี่ยน ตุ๊ คู้ เฝียน ฒุ่น ปุน นิ่น บัว. ฮนั้ง หน่าย, ไม้ กุ๊น นิ่น บัว เยียม เสย หฒั่ง หฒุ เซี้ยม ฮนั้ง หฒวัง ป้าม เมี่ยน หฒุ เซี้ยม นอ, นิ่น บัว เญย ลี่ง ว่วน ตุ๊ หฒิว ทิน-ฮู่ง เญย หฒะเอ๋ย เฒี่ยง เจี๊ยน.

7หม่าน หมวด เญย เซ้ด เมว์ย ฮนอย เถา ฟัด อ๊ะ. เม่ย บัว อ๋อย หฒุ กุ๊น เจี๊ยน กั้น, กีง เจี๊ยน เฮญี้ยว เต๋า เก๋า.

8เก้า หล่ง เจี๊ยน เจี๋ย เซ อ๋อย หฒุ จอม เฮญี้ยว ล่าน ฮนั้ม ล่าน, เหว่ย หฒุ ล่าน ฮนั้ม ล่าน ฯฒฯ ไฮ่ กวั่ง ฆอย เมี่ยน เญย ฒุ์ย ธั้ม เญย.

9อ๋อย หฒุ อะเฮน้ย ล่าน ฒิบ ล่าน โหฒว แคะ, หย่า ไม้ ตู๋ง หละงบ.

10เต้าๆ ตุ๊ ฒิบ ทิน-ฮู่ง เญย ฒี่ง เหญ่ย หย่า อ๋อย หฒุ โก๋ว หลง. หาย เต้า ฒิบ หาย หญู่ง ฒี่ง เหญ่ย อ๋อย หฒุ หล่ง เถง หฒวัง เมี่ยน.

11หาย เต้า ฒุ่น โต์ อ๋อย หฒุ หฒะเก้ง โต่ว ทิน-ฮู่ง เญย หว่า. หาย เต้า ธ้วด ฟิม เถง เมี่ยน อ๋อย หฒุ หล่ง ทิน-ฮู่ง ปุน ต้าย เญย ชะ ฟู-สู. ฮนั้ง หน่าย เม่ย บัว โหฒว เญย หญู่งๆ ฯฒฯ ปุน เมี่ยน เต๊ง เยซู กีตู่ เญย บั๋ว เธง ทิน-ฮู่ง. เยซู กีตู่ เหยียด ลิ์ว ม่าย ฌัง-หล่าง, ม่าย ชะ เถา หม่าน โก๊ว หม่าน ต่อย. อาเมน.

12ฮนั้ม เญย ก๋อ-โย์ว อ่า, ไม้ ตู๋ง ฮนั้ม ไม้ เม่ง แปะ เม่ย บัว หฒุ ปวั้ง โค้ว ไห่ เญย สี่ เสย เม่ย บัว ฮนั้ง หฒุ โต์ว ปั๊ว นอ, หย่า ไม้ ตู๋ง ฝุน เม่ย บัว ปวั้ง เญย สี่ เซ กั้น หญู่ง.

13ต๋าว หฑวน อ๋อย หฒุ อะเฮน้ย เหว่ย หฒุ เม่ย บัว ตุ๊ เหธา กีตู่ จวั่ง เสี่ยว โค้ว. ฮนั้ง หน่าย กีตู่ เญย ฌัง-หล่าง หิ่น ธ้วด วั้ว หฒั่น เม่ย บัว ฯฒฯ เฌียน-โย่ว ออน-เหลาะ ไห่.

14สี ก๊อง เหว่ย เสียน กีตู่ เม่ย บัว หฒุ เมี่ยน ก๊อง โตะ, เม่ย บัว ฯฒฯ ม่าย ออน-เหลาะ อ๊ะ, เหว่ย หฒุ ทิน-ฮู่ง ฌัง-หล่าง เญย สีง ลี่ง เหธา เม่ย บัว เยียม.

15ไม้ ตู๋ง ปุน เม่ย บัว หาย เต้า หลาย ไต๋ เมี่ยน, โหฒว หฒะ, โหฒว หว่าย สี่, ไฟ ล่าม โฒ่ว เมี่ยน เญย สี่ หฒุ เสี่ยว โค้ว.

16มป่า สี ก๊อง เม่ย บัว หลาย เสียน กีตู่ หฒุ เสี่ยว โค้ว, ไม้ ตู๋ง ไญ้. อ๋อย หฒุ เธง ทิน-ฮู่ง เหว่ย หฒุ เม่ย บัว ตุ๊ ดาม กีตู่ เญย เม่ง.

17ทิน-ฮู่ง เจี์ย กอน เซี้ยม ฒุ์ย เญย เฒี่ยง โห่ เถา อ๊ะ. ทิน-ฮู่ง กั้น เญย เมี่ยน อ๋อย หฒุ เซี้ยม ด่าง. สี ก๊อง เยียม บัว เจี์ย กอน หฒุ เซี้ยม, ไม้ เสียน ทิน-ฮู่ง เญย คู้ เฝียน วั้ว เต๋ย, เซ้ด เมว์ย ฮนั้ง หาย นอ.

18ฮนั้ง กีง-โซว ก๊อง นอ, “สี ก๊อง คู้ เมี่ยน ตุ๊ เหฌียว เซ ด่ง หน่าย อะ, ไม้ เสียน ทิน-ฮู่ง วั้ว เต๋ย เหธา ฒุ์ย-เมี่ยน อ๋อย ฮนั้ง หาย นอ?”

19ฮนั้ง หน่าย, เอย ทิน-ฮู่ง เญย หฒะเอ๋ย หฒุ เสี่ยว โค้ว เญย เมี่ยน อ๋อย หฒุ แอ๋ง โหฒว เจี๊ยน คู้ สี่ มี่ง หย่า เฒาะ กั้น จิว ปุน ทิน-ฮู่ง, ต้ง เหฒย นิ่น บัว ต้าย หย่า เขา ตุ๊ ว้วน วั้ว เต้า.

← Chapter 3 Jump to: Chapter 5 →