1 Timothy 3

Mien Bible (Thai Script) © Thailand Bible Society, 2007

← Chapter 2 Jump to: Chapter 4 →

1น้าย โจ๋ว หว่า เซ หฒะเก้ง เฒียน เญย. “หาย เต้า ม่าย เฮญี้ยว อ๋อย โหฒว จิว-ปาง เญย เมี่ยน โก๋, วั้ว เต้า อ๋อย โหฒว เญย เซ หลง ไห่ เญย กง.”

2จิว-ปาง เญย เมี่ยน โก๋ อ๋อย หฒุ โหฒว ไม้ ม่าย ต๋อง ต้าน เญย เมี่ยน, ขูง หล่ง ดุ เต้า เอ๊า, ไฮ่ ฒั้น กั้น, กุ๊น ตุ๊ กั้น, โหฒว ต้อ เล์ย เญย เมี่ยน, ม่าย เฮญี้ยว ฒิบ แคะ, หย่า ไฮ่ หฌาว เมี่ยน.

3นิ่น ไม้ เหง ฮบ ติ๊ว, ไม้ โหฒว เธี้ยว เบ๊าะ เมี่ยน, เฮญี้ยว ส่วน เญย, ไม้ อ๋อย เหธา เมี่ยน แฑง จ๋า, หย่า ไม้ เม้า ญ่าน.

4อ๋อย หฒุ ไฮ่ กุ๊น ตุ๊ หลง กั้น เญย ฮมวั้ง ต่อย, หฌาว กั้น เญย ฝุเจว๊ย ท่าย นิ่น, หมวัง นิ่น เญย หว่า.

5สี ก๊อง เมี่ยน ไม้ ไฮ่ กุ๊น ตุ๊ กั้น เญย ฮมวั้ง ต่อย, นิ่น ฮนั้ง หาย นอ ไฮ่ โก๋ว ทิน-ฮู่ง เญย จิว-ปาง?

6เซียง-เสียน เญย เมี่ยน ไม้ หอบ หฒุ โหฒว จิว-ปาง เญย เมี่ยน โก๋. เฑ่า เหย นิ่น ไฮ่ เธง-โฮล ฯฒฯ หฒุ ตี่ง ฒุ์ย, ฮนั้ง เมี้ยน เญย ฮู่ง หฒุ ตี่ง ฒุ์ย วั้ว นอ.

7โหฒว เมี่ยน โก๋ เญย เมี่ยน อ๋อย หฒุ ต้ง จิว-ปาง กะเหญี่ย เญย เมี่ยน ฝุน เม่ง โห่ หลง เญย เมี่ยน. นิ่น ฯฒฯ ไม้ หฒุ เมี่ยน ต้าน หย่า ไม้ หฒุ เมี้ยน เญย ฮู่ง แฒง โขว ฮลบ นิ่น.

8จิว-ปาง เญย ปอง-ปั์ว เมี่ยน ฟี่ ฮนั้ง. อ๋อย หฒุ เป๋น เมี่ยน ท่าย เญย เมี่ยน, นิ่น บัว ก๊อง เญย หว่า ไฮ่ เขา ตุ๊ หฒุ, ไม้ เหง ฮบ ติ๊ว, หย่า ไม้ เม้า ฒิ่น ฒ่อย.

9นิ่น บัว อ๋อย หฒุ หล่ง ธีง-เหฑ่ง เญย ล่าง ฟิม เสียน ว้วน ทิน-ฮู่ง ปุน บย๋าง ย่าง ธ้วด ต้าย เญย เฒียน เล์ย.

10หาย เต้า อ๋อย โหฒว ปอง-ปั์ว เมี่ยน อ๋อย หฒุ เสย นิ่น บัว ด่าง. ปวัด นิ่น บัว ไม้ ม่าย ต๋อง ต้าน นอ, กุ๊น พ้าย นิ่น บัว โหฒว น้าย หญู่ง กง อ๊ะ.

11ฟู-สู เฒี้ยว เญย มเซียะ ตอน หย่า ฟี่ ฮนั้ง เญย อ๋อย หฒุ ม่าย เม่ง เต้า หลง, ไม้ ก๊อง หว่า-ฮู้, ไฮ่ ฒั้น ตุ๊ กั้น, เยียม หม่าน สี่ หย่า โหฒว เฮญี้ยว หฒีง เญย เมี่ยน.

12ปอง- ปั์ว เมี่ยน อ๋อย หฒุ หล่ง ดุ เต้า เอ๊า ฮนั้ง, หย่า ไฮ่ กุ๊น ตุ๊ หลง กั้น เญย ฝุเจว๊ย เหธา เปย๊า ฒง เมี่ยน.

13นิ่น บัว โหฒว ตุ๊ กง หลง ฯฒฯ ตุ๊ เมี่ยน ท่าย หย่า ตุ๊ ปู๋ง หล่าง เญย ฒุ่น นิ่น บัว เสียน กีตู่ เยซู เญย เจ๊า-โหล่ว.

14เยีย ฮนั้ม ต้าย ไม้ หนั่ง เล่า เยีย อ๋อย มี่ง เม่ย หน่าย, มป่า เยีย เฟี้ย น้าย เฒ้ย เฝียน ปุน เม่ย ฮิ้ว ตุ๊ น้าย เต๋ย สี่ ด่าง.

15ฮนั้ง หน่าย, สี ก๊อง ม่าย หาย หญู่ง ฒ้อ เยีย, เม่ย ฯฒฯ ฮิ้ว ตุ๊ ทิน-ฮู่ง เญย เปย๊า ฒง เมี่ยน, ต้ง เฒี่ยง เจี๊ยน เญย ทิน-ฮู่ง เญย จิว-ปาง, อ๋อย หฒุ ฮนั้ง หาย นอ เยียม. จิว-ปาง โหฒว เฒียน เล์ย เญย เดี้ยว เหธา กอน-โด๊ะ.

16บัว อ๋อย หฒุ เหญี่ยม บัว เสียน เญย เจ๊า บย๋าง ย่าง ธ้วด ต้าย เญย สี่ หฒะเก้ง โฮล ไห่ อ๊ะ. นิ่น หิ่น ธ้วด เป๋น เต้า ป้าม เมี่ยน, สีง ลี่ง ปิ๋ว เม่ง นิ่น หอบ เหฑ่ง, ฟิน-เมี่ยน หย่า ตุ๊ ปวัด นิ่น, ม่าย เมี่ยน ฒุ่น นิ่น เญย เจ๊า ปุน หม่าน ฝีง หมวัง, ลู่ง เดี๊ย นอมๆ ต๋อง ม่าย เมี่ยน เสียน นิ่น, ทิน-ฮู่ง หย่า ฒิบ นิ่น ฝาว เถา ฌัง-หล่าง เญย ต๋อง.

← Chapter 2 Jump to: Chapter 4 →