1 Timothy 5

Mien Bible (Thai Script) © Thailand Bible Society, 2007

← Chapter 4 Jump to: Chapter 6 →

1ไม้ ตู๋ง เหม เมี่ยน โก๋ เมี่ยน. อ๋อย หฒุ ขวิน นิ่น ฮนั้ง ขวิน กั้น เญย เตีย นอ. อ๋อย หฒุ ขวิน หฮญัง-เจ๊ย หลุน เญย วั้ว เต๋ย ฮนั้ง กั้น เญย ก๋อ, กั้น เญย โย์ว นอ.

2หฮญัง-เจ๊ย โก๋ วั้ว เต๋ย มเซียะ ตอน อ๋อย หฒุ ขวิน ฮนั้ง กั้น เญย มา. เก้า หลุน วั้ว เต๋ย อ๋อย หฒุ ขวิน ฮนั้ง กั้น เญย ต่อ, กั้น เญย หมั่ว, หย่า อ๋อย หฒุ โหฒว เฮญี้ยว ธีง-เหฑ่ง ต๋าย นิ่น บัว.

3อ๋อย หฒุ ท่าย กิ๋น ไม้ ลั่ม เขา ต๋อง เญย เอ๊า-กว๊า.

4หาย เต้า เอ๊า-กว๊า ม่าย ตอน-เจว๊ย ฟุน-ฟะ, นิ่น เญย ตอน-เจว๊ย ฟุน-ฟะ ตะเยี้ยด อ๋อย หฒุ โหะ เอย เจี๊ยน นิ่น บัว เสียน เญย เจ๊า โหฒว, โก๋ว กั้น เญย ฮมวั้ง ต่อย. ฮนั้ง หน่าย ไฮ่ วิ่น นิ่น บัว อง กู๋ เตี๋ย หม่า เญย เอน-ฒี่ง, เหว่ย หฒุ ฮนั้ง น้าย โหฒว เซ หอบ ทิน-ฮู่ง เญย เฮญี้ยว.

5มป่า ต้ง ไม้ ลั่ม เขา ต๋อง เญย เอ๊า-กว๊า-โดะ, นิ่น เยียม ทิน-ฮู่ง ม่าย ลั่ม ฮนั้ม ฯฒฯ ฮนอยๆ ม์วนๆ โท้ ทิน-ฮู่ง เถง.

6ขูง ฮนั้ม อ๋อย กั้น ตุ๊ เฌียน-โย่ว เญย เอ๊า-กว๊า, นิ่น เฒี่ยง เจี๊ยน มป่า ต๋อง ไต่ หมี่ อ๊ะ.

7อ๋อย หฒุ ฮนั้ง น้าย นอ หฌาว หฒวัง เมี่ยน หธีง ต้าย ไม้ ม่าย หาย เต้า หฒุ ต้าน.

8สี ก๊อง หาย เต้า ไม้ โก๋ว กั้น เญย เธียน-เธะ, เหล่ง เจ๊ย โก๋ว กั้น เญย ฮมวั้ง ต่อย, วั้ว เต้า เซ แหง่ง เฒียน โต์ อ๊ะ. นิ่น ฒู้ง เก้า หว่าย เจี๋ย ไม้ เสียน เยซู เญย เมี่ยน.

9เอ๊า-กว๊า อ๋อย หฒุ ปวั๊ง หลัวะ เหฒียบ หฮญัง หย่า หล่ง เจี๋ย ดุ ถอง โหฆ ฮนั้ง หธีง ต้าย ฝาว บั๋ว เยียม เอ๊า-กว๊า ตาน.

10นิ่น หย่า อ๋อย หฒุ ม่าย เม่ง เต้า โหฒว คู้ สี่, ต้อ หลง นิ่น เญย ฝุเจว๊ย, ม่าย เฮญี้ยว ฒิบ แคะ, เถง กีตู่ เมี่ยน หฑาว เจี๋ย เหฒา, เถง เจี๋ย ด๊อด หน่าน เมี่ยน, หย่า เจี้ยน ธ้วด ฟิม โหฒว หญู่งๆ คู้ สี่, หธีง ตุ๊ ฝาว บั๋ว เยียม เอ๊า-กว๊า ตาน.

11หลุน วั้ว เต๋ย เอ๊า-กว๊า, ไม้ ตู๋ง ฝาว บั๋ว เยียม เอ๊า-กว๊า ตาน, เหว่ย หฒุ นิ่น บัว แอ๋ง ไฮ์ อ๋อย ตอง จา ฯฒฯ กวั่ง กีตู่ หมี่ อ๊ะ.

12ฮนั้ง หน่าย, นิ่น บัว หฒุ ตี่ง ฒุ์ย เหว่ย หฒุ นิ่น บัว ไม้ เอย ฒิ่น ด่าง นิ่น บัว แล์ง เจี๋ย เญย แหง่ง หว่า.

13นิ่น บัว หย่า โหะ ซาว ล์าง กวั่ง เฒี่ยง โห่ เปียะ น้าย นอม เปย๊า, ธ้วด วั้ว นอม เปย๊า. ไม้ ตาน บัวะ น้าย ฮนั้ง, นิ่น บัว หย่า ก๊อง หว่า-ฮู้, ล่าม โฒ่ว เมี่ยน เญย สี่, ไม้ หอบ หฒุ ก๊อง เญย หย่า ก๊อง.

14เหว่ย น้าย เยีย อ๋อย หลุน วั้ว เต๋ย เอ๊า-กว๊า แอ๋ง หล่ง โหฆ, ยู์ง ฝุเจว๊ย, ฒ้าง หลง จา, ปุน บัว เญย วิน-วั้ง ไม้ ม่าย ต๋อง ต้าน.

15ม่าย เต๋ย เอ๊า-กว๊า-หลุน ฒู้ง ฮวิน ฆาง กัน ซาตาน หมี่ อ๊ะ.

16สี ก๊อง เสียน เยซู เญย มเซียะ ตอน ม่าย มั์ว-ต่อย เธียน-เธะ โหฒว เอ๊า-กว๊า, นิ่น อ๋อย หฒุ โก๋ว, ไม้ ตู๋ง เฝย หลุ่ย จิว-ปาง, เหว่ย ปุน จิว-ปาง ไฮ่ เถง หฒะเก้ง ไม้ ลั่ม เขา เญย เอ๊า-กว๊า.

17กุ๊น ตุ๊ จิว-ปาง หลง วั้ว เต๋ย เมี่ยน โก๋, เหล่ง เจ๊ย เญย เจี้ยน ฒุ่น โต์ เหธา หฌาว เมี่ยน วั้ว เต๋ย, อ๋อย หฒุ ฝุน ผุย ตุ๊ ฒิบ ซูง-โก๊ว เญย ฟิน-โค้ว.

18เหว่ย หฒุ กีง-โซว ก๊อง, “ง่ง หลิ่น เบย้า เญย เฒี่ยง โห่ ไม้ ตู๋ง โตว ง่ง เญย ฑุ่ย แป๋ง.” หย่า ก๊อง, “โหฒว กง เญย เมี่ยน หอบ หฒุ ตุ๊ กง-ฒิ่น.”

19สี ก๊อง ม่าย หาย เต้า โก๋ จิว-ปาง เญย เมี่ยน โก๋, ธ้วด ลิ์ว ม่าย อี เหฒีย ล่าน ฒอง-เหฒง เมี่ยน, ไม้ ตู๋ง เสียน.

20สี ก๊อง หาย ล่าน จิว-ปาง เญย เมี่ยน โก๋ หฒั่นๆ ป์าม ฒุ์ย, อ๋อย หฒุ ตอง เจี๊ยน หฒวัง เมี่ยน ก๊อง นิ่น, เหว่ย ปุน หฒวัง เมี่ยน กั้ม เหฑีย.

21เยีย ตอง เจี๊ยน ทิน-ฮู่ง เหธา กีตู่ เยซู เหธา กิ๊น ต้าย เญย หฒวัง ฟิน-เมี่ยน หลงๆ ขวิน เม่ย, อ๋อย หฒุ เอย เจี๊ยน เยีย บั๋ว เม่ย น้าย เต๋ย หว่า. หย่า อ๋อย หฒุ แป้ง ฟิม เญย โหฒว, ไม้ ตู๋ง หมั่ง หาย เต้า เญย เฮมียน.

22ไม้ ตู๋ง ฮวาง เจี๊ยน มาน หาย เต้า เหว่ย ออน นิ่น. ไม้ ตู๋ง เหธา หาย เต้า ม่าย ป่วน โหฒว ฒุ์ย. อ๋อย หฒุ โก๋ว กั้น โหฒว ธีง-เหฑ่ง เมี่ยน.

23ยั่ง น้าย เจี๋ย, ไม้ ตู๋ง ขูง ฮบ ววม ฮนั้ง. อ๋อย หฒุ ฮบ เต๋ย ป๊า อะหงุ่น ติ๊ว เถง เม่ย เญย กะเซีย เหว่ย หฒุ เม่ย ปุ๊ด แป่ง หมะ ไห่.

24ม่าย เต๋ย เมี่ยน ป์าม เญย ฒุ์ย เซ แหฆ่ง เญย, ปุน ธีง นิ่น บัว ฒู้ง หฒุ ตี่ง ฒุ์ย อ๊ะ. มป่า ม่าย เต๋ย เมี่ยน ป์าม เญย ฒุ์ย ฆะฮ้า หธีง ต้าย ปวัด ตุ๊ เม่ง.

25ฟี่ ฮนั้ง เญย, คู้ สี่ เซ ปวัด ตุ๊ แหฆ่ง เญย. ไม้ แหฆ่ง วั้ว เต๋ย ฒู้ง ปี๋ง ไม้ เจี๊ยน.

← Chapter 4 Jump to: Chapter 6 →