Amos 2

Mien Bible (Thai Script) © Thailand Bible Society, 2007

← Chapter 1 Jump to: Chapter 3 →

1เฒี้ยว ฮนั้ง น้าย ก๊อง, “เหว่ย โมอับ ป์าม ฒุ์ย ปัว หฑุ่น, แอ๋ง ป์าม เปยย หฑุ่น, เยีย ฒู้ง ตี่ง ฒุ์ย, ไม้ กวั่ง, เหว่ย หฒุ นิ่น บัว ปั๊ว เอโดม ฮู่ง เญย บู๊ง ชุย ฮนั้ง ฮวุย นอ.

2เยีย อ๋อย ปุน โต์ว เหฌี่ย โมอับ, โต์ว ฯฒฯ ปั๊ว ชุย เคลิโอด เว่ย ว้วน เญย ติ่น. เบ๊าะ จ๋า เญย เฉีย บุย, ปย๊ม จอง เญย เฒี่ยง โห่, โมอับ เมี่ยน ฒู้ง อ๋อย หฒุ ไต่ อ๊ะ.

3เยีย อ๋อย เหมียด กุ๊น เต่ย-ปูง วั้ว เต้า, หย่า อ๋อย ปุน นิ่น เญย หฒวัง เจียน เหธา เจี๊ยน หฒุ ไต่.” น้าย เซ เฒี้ยว ก๊อง เญย หว่า.

4เฒี้ยว ฮนั้ง น้าย ก๊อง, “เหว่ย ยูดา ป์าม ฒุ์ย ปัว หฑุ่น, แอ๋ง ป์าม เปยย หฑุ่น, เยีย ฒู้ง ตี่ง ฒุ์ย, ไม้ กวั่ง. เหว่ย หฒุ นิ่น บัว กวั่ง เฒี้ยว เญย เล์ย-หลัด, ไม้ เอย เจี๊ยน นิ่น เญย เล์ย. นิ่น บัว ก๊อง-แปะ เญย สี่ ดั๊ว นิ่น บัว มี่ง ต่อง เจ๊า, กัน นิ่น บัว เญย อง-ถาย เญย หญู่ง โหฒว.

5เยีย ฯฒฯ ปุน โต์ว เหฌี่ย ยูดา, โต์ว ฯฒฯ ปั๊ว ชุย เยลูซาเลม เว่ย ว้วน เญย ติ่น.”

6เฒี้ยว ฮนั้ง น้าย ก๊อง, “เหว่ย อิสะลาเอน ป์าม ฒุ์ย ปัว หฑุ่น, แอ๋ง ป์าม เปยย หฑุ่น, เยีย ฒู้ง ตี่ง ฒุ์ย, ไม้ กวั่ง. นิ่น บัว หม่าย คู้ เมี่ยน เหว่ย ตุ๊ ญ่าน, หย่า หม่าย ตั๋ง-ต๋น เญย เมี่ยน เหว่ย ตุ๊ เหยียด แหล่ง เฮ่.

7นิ่น บัว ธ้าย เมี่ยน จ่ม เมี่ยน เญย มฆ้อง เหฌี่ย กะเดี๊ย เดา เญย เนีย-บูง, หย่า ไม้ ปุน หฒุ เหฒย เญย เมี่ยน ตุ๊ แป้ง ฟิม เญย เจ๊า. อี ตอน-เตี๋ย จวั่ง เต้า เซียะ เหฮยียน, ปุน เยีย เญย ธีง-เหฑ่ง เม่ง ม่าย หวุย.

8นิ่น บัว เยียม นอมๆ เหฒี่ย-ต้อง กะเฮลน เฒาะ เมี่ยน ต้อ ต้าย ต๋อง เญย ลุย ติ่ม เจี๊ยน เปว๋ย. เยียม นิ่น บัว เญย เฒี่ยน เญย เปย๊า, นิ่น บัว ฮบ ปาด เมี่ยน ตุ๊ ต้าย เญย ติ๊ว.

9“มป่า เยีย เยียม นิ่น บัว เญย หฑะเฮมียน เหมียด อาโมไล เมี่ยน ไม้ กุ๊น นิ่น บัว โฮล ฮลัง ฮนั้ง สีดา ฒ่ง เดี๋ยง, หย่า เฮ้น ฮนั้ง บะอง เฒวย เดี๋ยง, เยีย เลี่ยม ฆว่า เลี่ยม ฑู่ง เหมียด เหฑ่ง.

10“เยีย หย่า ต้อ เม่ย บัว เยียม อียิบ เต่ย-ปูง ธ้วด ต้าย, หย่า เยียม เต่ย-ปูง-ฮวาง ต้อ เม่ย บัว เฝย เหฒียบ หฮญัง, เหว่ย ปุน เม่ย บัว ตุ๊ หฑิบ อาโมไล เมี่ยน เญย เดา.

11เยีย เยียม เม่ย บัว เญย ตอน บุด๋ง เหลียบ โต่ว หว่า เมี่ยน, แอ๋ง เยียม เม่ย บัว เญย เมี่ยน หลุน เมี่ยน เหลียบ นาสี เมี่ยน. โอ อิสะลาเอน เมี่ยน อ่า, น้าย เซ หฒะเก้ง เฒียน เญย ไม้ เฒ์ย?” น้าย เซ เฒี้ยว ก๊อง เญย หว่า.

12“มป่า เม่ย บัว อ๊าบ นาสี เมี่ยน ฮบ อะหงุ่น ติ๊ว, หย่า หัด โต่ว หว่า เมี่ยน, ‘ไม้ ตู๋ง โต่ว หว่า.’

13“หมั่ง ม่าะ! เยีย อ๋อย ฒัด เม่ย บัว เหฌี่ย เม่ย บัว เยียม เญย ต๋อง, ฮนั้ง เบย้า เฒ้ย ตั๊บ ปวั๊ง เธีย งัด เจี๊ยน เหฒียด เญย.

14ถิว เซี้ยบ เญย เมี่ยน เปย๋า ไม้ ดุ๊ด. เมี่ยน เฮ้น เมี่ยน เญย ชะ อ๋อย หฒิด หมี่ อ๊ะ. เมี่ยน เฮ้น เมี่ยน ไม้ ไฮ่ เหฌียว ไม้ ตุ๊ กั้น เญย แหม่ง.

15นั้น จวัง-หฒิน เญย เมี่ยน โซ้ว ไม้ เจี๊ยน. เหฒา เซี้ยบ เญย เมี่ยน ไม้ ไฮ่ เหฌียว กั้น, เก้ ม์า เญย เมี่ยน หย่า ไม้ ไฮ่ เหฌียว ไม้ ตุ๊ กั้น.

16ไม้ กุ๊น ต๊าม โฮล เจี๋ย เญย เบ๊าะ จ๋า แปง, เถา วั้ว ฮนอย นิ่น บัว อ๋อย หฒุ ฌัง ซิน ธี้ ลี้ เญย เปย๋า.” น้าย เซ เฒี้ยว ก๊อง เญย หว่า.

← Chapter 1 Jump to: Chapter 3 →