Amos 3

Mien Bible (Thai Script) © Thailand Bible Society, 2007

← Chapter 2 Jump to: Chapter 4 →

1โอ อิสะลาเอน เมี่ยน อ่า, เม่ย บัว อ๋อย หฒุ หมวัง เฒี้ยว ก๊อง เม่ย บัว น้าย เต๋ย หว่า, เซ ก๊อง หฒุ เยีย เยียม อียิบ ต้อ ธ้วด ต้าย เญย เหยียด ฝีง เมี่ยน. นิ่น ก๊อง,

2“เยียม ลู่ง เดี๊ย ฝีงๆ เมี่ยน บุด๋ง เยีย ขูง กิ๊น เม่ย บัว ฮนั้ง. เหว่ย น้าย เยีย ฯฒฯ ตี่ง เม่ย บัว ป์าม เญย เหยียด ฒู้ง ฒุ์ย.”

3สี ก๊อง อี ล่าน เมี่ยน ไม้ ตุ๋น เหฒียง กั๊บ ต่อย, นิ่น บัว ไฮ่ จวั่ง เจ๊า ยั่ง เญย ไฟ?

4สี ก๊อง เซี่ยน เฒาะ ไม้ ตุ๊ อ๊อ หญั่น, นิ่น เยียม วั้ว หล่ม เห่ว เญย ไฟ? สี ก๊อง เซี่ยน หลุน เฒาะ ไม้ ตุ๊ กะน้าย, นิ่น เยียม นิ่น เญย ค้วด เห่ว เญย ไฟ?

5สี ก๊อง เยียม เดา แฒง โขว ไม้ อัน แกง, เหนาะ ไฮ่ ต้าย หฒุ โขว ฮลบ เญย ไฟ? สี ก๊อง แฒง หย่า ไม้ ม่าย กะน้าย เปียะ, เยียม เดา เญย โขว ไฮ่ ฑิด เญย ไฟ?

6สี ก๊อง เยียม ฒี่ง ปย๊ม เบ๊าะ จ๋า เญย หฑัด บุย, ฒี่ง กะญั์ว เญย เมี่ยน ซิน หฒิน เหฑ่ง ไม้ เฒ์ย? สี ก๊อง ม่าย นอม ฒี่ง หฒุ เหฒะ หน่าน, เซ เฒี้ยว ปุน หฒุ ไม้ เฒ์ย?

7เฒี้ยว ทิน-ฮู่ง หฒะเก้ง ไม้ โหฒว หาย หญู่ง ธ้วด ลิ์ว นิ่น เฒาะ เกม เจี๊ยน เญย สี่ บั๋ว นิ่น เญย โปว, โต่ว หว่า เมี่ยน.

8เซี่ยน ฌุ่น เญย เฒี่ยง โห่, ม่าย หาย เต้า ไม้ กั้ม เหฑีย? เฒี้ยว ทิน-ฮู่ง ก๊อง หว่า, ม่าย หาย เต้า ไม้ เถง นิ่น โต่ว หว่า ไฟ?

9มี่ง ฒุ่น บั๋ว อัดโดด เว่ย ว้วน เญย ติ่น เญย เมี่ยน, หย่า มี่ง บั๋ว อียิบ เว่ย ว้วน เญย ต๋อง วั้ว เต๋ย, ก๊อง, “เม่ย บัว อ๋อย หฒุ กั๊บ ฒุ้น เยียม สะมาเลีย เญย บง, หมั่ง ก๋า ฒี่ง กะญั์ว ฟ้าน หลุ่น, ม่าย ล่าน ห่อย ล่าน เญย สี่.”

10เฒี้ยว ฮนั้ง น้าย ก๊อง, “นิ่น บัว ฒู้ง ไม้ ฮิ้ว ตุ๊ โหฒว หอบ เญย เจ๊า. นิ่น บัว เว่ย ว้วน เญย ติ่น ตั๊บ ปวั๊ง โหฒว โตะ, ธ้าง ต้าย เญย กะน้าย.”

11เหว่ย น้าย, เฒี้ยว ทิน-ฮู่ง ฮนั้ง น้าย ก๊อง, “วิน- วั้ง อ๋อย ต้าย เว่ย ก๋อม เต่ย-ปูง, แธะ เม่ย บัว เว่ย ว้วน เญย ต๋อง, ลู้ เหฑ่ง เม่ย บัว เญย ติ่น.”

12เฒี้ยว ฮนั้ง น้าย นอ ก๊อง, “ฮนั้ง หมั่ง ยู่ง เมี่ยน เยียม เซี่ยน เญย ฑุ่ย ธ้าง ธ้วด อี นอม ฒุ่ย ไฟ เหยียด หฆัน มน่อม, เยียม สะมาเลีย เญย อิสะลาเอน เมี่ยน อ๋อย ตุ๊ เหฌียว, เหธา เจี๊ยน เหยียด นอม โหธว-เก๊าะ เหธา ติ๊ เตียน สวัง-ติ่ม.”

13เฒี้ยว ทิน-ฮู่ง, เซ เน่น เจี๋ย เญย ทิน-ฮู่ง, ฮนั้ง น้าย ก๊อง. “หมวัง ม่าะ! หย่า โหฒว ฒอง-เหฒง โก๋ ยาโค้บ เญย เฒ้ย-ฟุน.

14“ต้ง เยีย ตี่ง อิสะลาเอน เญย ฒุ์ย วั้ว ฮนอย, เยีย อ๋อย เหมียด เบดเอน เญย นอมๆ เหฒี่ย-ต้อง. นอมๆ เหฒี่ย-ต้อง เญย จอง อ๋อย หฒุ ฮงะ ดุ๊ด ด๊อด เหฌี่ย เดา.

15เยีย อ๋อย แธะ นิ่น บัว ตง-เกน เญย เปย๊า เหธา นิ่น บัว ฆาย กอง เญย เปย๊า. หล่ง ฒ์าง-ญ่า ฒอง วั้ว เต๋ย เปย๊า อ๋อย หฒุ เหมียด, โฮล ฮลัง เญย เปย๊า หย่า อ๋อย หฒุ ป่าย เหฑ่ง.” น้าย เซ เฒี้ยว ก๊อง เญย หว่า.

← Chapter 2 Jump to: Chapter 4 →