Amos 7

Mien Bible (Thai Script) © Thailand Bible Society, 2007

← Chapter 6 Jump to: Chapter 8 →

1เฒี้ยว ทิน-ฮู่ง หิ่น ปุน เยีย ปวัด นิ่น เหฒย ธ้วด เหยียด ต้ม กวั้น จ๊บ-เหญ่ย ต๋อย หฒุ จังๆ ธ้วด ตะเหญ่ย ถอง กะน้าย-หฒวัง, เซ ฮู่ง เตี๋ย ก๊าด ลิ์ว ต้าว ถอง แอ๋ง ธ้วด ตะเหญ่ย ถอง เญย เฒี่ยง โห่.

2จ๊บ- เหญ่ย หญั่น เหฑ่ง วั้ว นอม เต่ย-ปูง เญย เมี้ย, เยีย ก๊อง, “เฒี้ยว ทิน-ฮู่ง อ่า, โท้ กวั่ง ฆอย เม่ย เญย แปะ ฝีง เญย ฒุ์ย. นิ่น บัว ฮนั้ง หาย นอ ไฮ่ ตุ๊ แหม่ง ธ้วด? นิ่น บัว โหย่ว ไฝ โหย่ว โหฒะ.”

3เฒี้ยว ฯฒฯ ก๊อย นิ่น เญย เฮญี้ยว. เฒี้ยว ก๊อง, “น้าย เต๋ย สี่ ไม้ ฮนั้ง หน่าย ธ้วด อ๊ะ.”

4เฒี้ยว ทิน-ฮู่ง หิ่น ปุน เยีย ปวัด. เฒี้ยว ทิน-ฮู่ง เห่ว หล่ง โต์ว ตี่ง ฒุ์ย. โต์ว ฯฒฯ ปั๊ว เหฑ่ง โด เญย ค้อย หย่า ปั๊ว เจี๊ยน เดา-เป้ย.

5เยีย ฯฒฯ ก๊อง, “เฒี้ยว ทิน-ฮู่ง อ้า! โท้ เม่ย ตี้ง เหฌี่ย ม่าะ! เม่ย เญย แปะ ฝีง ฮนั้ง หาย นอ ไฮ่ ตุ๊ แหม่ง ธ้วด? นิ่น บัว โหย่ว ไฝ โหย่ว โหฒะ.”

6เฒี้ยว แอ๋ง ก๊อย นิ่น เญย เฮญี้ยว. เฒี้ยว ทิน-ฮู่ง ก๊อง, “น้าย เต๋ย สี่ ไม้ ฮนั้ง หน่าย ธ้วด อ๊ะ.”

7เฒี้ยว แอ๋ง ปุน เยีย หมั่ง เหยียด หญู่ง. เยีย ปวัด เฒี้ยว โซ้ว เจี๊ยน หล่ง ตี่ง หฒะ เญย ฮลาง โหฒว ต้าย เญย ฒี่ง หลาด กะเฮลน, ปั์ว นั้น เจี๊ยน ตี่ง หฒะ เญย ฮลาง.

8เฒี้ยว หน่าย เยีย, “อาโม้ด อ่า, เม่ย ปวัด หาย หญู่ง?” เยีย เตา, “ปวัด ติ้ว ตี่ง หฒะ เญย ฮลาง.” เฒี้ยว ก๊อง, “หมั่ง ม่าะ! เยีย เฒาะ ติ้ว ตี่ง หฒะ เญย ฮลาง ดิ๋ว เยีย เญย แปะ ฝีง, อิสะลาเอน เมี่ยน บุด๋ง. เยียม น้าย มี่ง เยีย ไม้ เลี่ยว นิ่น บัว อ๊ะ.

9“อีสัก เญย เฒ้ย-ฟุน เยียม ฮลัง หฒั่ง เฒี่ยน เญย ต๋อง เยีย อ๋อย ป่าย ฮวาง, หย่า ปุน อิสะลาเอน เญย นอมๆ สีง ติ่น หฒุ ป่าย หว่าย, แอ๋ง หล่ง หฑุ ด๊าว เหธา เยโลโบอัม เญย เฒ้ย-ฟุน เบ๊าะ จ๋า.”

10เบดเอน เญย ไซ เมี่ยน, อามาซิยา, พ้าย เมี่ยน มี่ง ล์อ อิสะลาเอน เญย ฮู่ง, เยโลโบอัม, ก๊อง, “อาโม้ด เยียม อิสะลาเอน เมี่ยน บุด๋ง ต๊า หฒะเอ๋ย แหง่ง ฮู่ง เตี๋ย. นิ่น ก๊อง เญย เหยียด ฒู้ง หว่า น้าย นอม เต่ย-ปูง ดาม ไม้ เจี์ย.

11เหว่ย หฒุ อาโม้ด ฮนั้ง น้าย ก๊อง, “‘เยโลโบอัม ฒู้ง อ๋อย หฒุ หฑุ ด๊าว ไต๋. อิสะลาเอน เมี่ยน ฒู้ง อ๋อย หฒุ กว๊าด มี่ง, เล่ย ฆอย กั้น เญย เต่ย-ปูง.’”

12อามาซิยา ก๊อง บั๋ว อาโม้ด, “เม่ย น้าย เต้า โต่ว หว่า เมี่ยน อ้า! มี่ง อ๊ะ. เปย๋า มี่ง เยียม ยูดา เต่ย-ปูง. เยียม วั้ว ปุน นิ่น บัว จวัง เม่ย แอ๋ง เยียม หน่าย โต่ว หว่า อ๊ะ.

13เยียม น้าย มี่ง ไม้ ตู๋ง แอ๋ง เยียม เบดเอน โต่ว เม่ย เญย หว่า, เหว่ย หฒุ เยียม น้าย ม่าย ฮู่ง เตี๋ย เญย สีง ติ่น, หย่า เป๋น ฮู่ง เตี๋ย มี่ง หฒั่ง เฒี่ยน เญย ต๋อง.

14อาโม้ด ก๊อง บั๋ว อามาซิยา, “เยีย ไม้ เฒ์ย โต่ว หว่า เมี่ยน, หย่า ไม้ เฒ์ย โต่ว หว่า เมี่ยน เญย ตอน. เยีย โหฒว เต้า โก๋ว แซง-คู้ เญย เมี่ยน เหธา เฝียว ง่ง หญอ เปี๊ยว เญย เมี่ยน.

15เฒี้ยว ต้อ เยีย ธ้วด ต้าย, ไม้ กัน ยู่ง กวั้น. เฒี้ยว ก๊อง บั๋ว เยีย, มี่ง โต่ว หว่า ปุน เยีย เญย แปะ ฝีง, อิสะลาเอน เมี่ยน.

16เหว่ย น้าย อี้ หฒั่น หมวัง เฒี้ยว เญย หว่า ม่าะ! เม่ย ก๊อง, “‘ไม้ ตู๋ง โต่ว หว่า ก๊อง อิสะลาเอน, หย่า ไม้ ตู๋ง ฒุ่น เจี๊ยน ก๊อง อีสัก เญย เฒ้ย-ฟุน.’

17“เหว่ย น้าย เฒี้ยว ฮนั้ง น้าย ก๊อง, “‘เม่ย เญย เอ๊า อ๋อย เยียม ฒี่ง กะญั์ว โหฒว หม่าย ซิน เญย มเซียะ ตอน, เม่ย เญย น่าม โญ์ว ฒู้ง อ๋อย หฒุ หฑุ ด๊าว ไต๋ ไต่. เม่ย เญย เดา, เมี่ยน อ๋อย แปง ฮลาง เดาะ ปุน ฆอย, เม่ย กั้น อ๋อย หฒุ ไต่ เยียม ม่าย หวุย เญย เต่ย-ปูง. อิสะลาเอน เมี่ยน ฒู้ง อ๋อย หฒุ ธ้าง มี่ง เล่ย ฆอย นิ่น บัว เญย ป๊วน-เต่ย-ปูง.’”

← Chapter 6 Jump to: Chapter 8 →