Daniel 5

Mien Bible (Thai Script) © Thailand Bible Society, 2007

1เบนซัดซา ฮู่ง เบ่น ต๋น หญั่น ฮบ โฮล! เญย, ปุน เหยียด ธิน เต้า นิ่น เญย โหฒว โฮล เญย เมี่ยน หญั่น. นิ่น หย่า เหธา นิ่น บัว ต๋อย เฮมียน ฮบ อะหงุ่น ติ๊ว.

2เบนซัดซา ฮบ ติ๊ว เญย เฒี่ยง โห่ นิ่น พ้าย เมี่ยน มี่ง เฒาะ ต้ง นิ่น เญย เตีย, เนบูคัดเน้ดซา, เยียม เยลูซาเลม, หฒั่ง ทิน-ฮู่ง เญย เปย๊า, ธ้าง ต้าย เญย เจียม ญ่าน จา-ต๋อง เหว่ย ปุน ฮู่ง เตี๋ย เหธา นิ่น เญย โหฒว โฮล เญย เมี่ยน, นิ่น เญย เอ๊า บัว, เหธา นิ่น เญย จ๊า-เฒ่ย เอ๊า หล่ง ฮบ ติ๊ว.

3นิ่น บัว ฯฒฯ ต้อ เยียม เยลูซาเลม เญย สีง ติ่น, หฒั่ง ทิน-ฮู่ง เญย เปย๊า, ธ้าง ต้าย เญย เจียม ญ่าน จา-ต๋อง. ฮู่ง เตี๋ย เหธา โหฒว โฮล เญย เมี่ยน, ฮู่ง เญย เอ๊า เหธา จ๊า-เฒ่ย เอ๊า ฯฒฯ หล่ง น้าย เต๋ย จา-ต๋อง ฮบ ติ๊ว.

4นิ่น บัว เหยียด ปิ่น ฮบ ติ๊ว, เหยียด ปิ่น เธง หล่ง เจียม ญ่าน, ต้ง ซิ, เฮลียะ, เดี๋ยง เหธา หละเปย๊ย โหฒว ต้าย เญย เฒี่ยน.

5เลี่ยม เฒ่ย ม่าย ป้าม เมี่ยน เญย ปั์ว-โด๊ะ หิ่น ธ้วด เยียม ฮู่ง ติ่น กะญั์ว, ตัง-จ๋า วั้ว ด่าง แหมง เญย หฌ่ง, เฟี้ย หฑั่ง. ฮู่ง เตี๋ย หมั่ง เจี๊ยน วั้ว เจี๊ยะ ปั์ว เฟี้ย หฑั่ง,

6นิ่น เญย เฮมียน เบี่ยน เหฑ่ง หมี่ อ๊ะ. กั้ม เหฑีย ไห่, ธี่ง เบาะ ฆ้าบ จ๋า, เหฒา เมา เหฑ่ง.

7ฮู่ง เตี๋ย เห่ว โหฒว ฟ้าด เญย เมี่ยน, สัม เหฮลย เญย เมี่ยน, เหธา ก๊าน เฮย เมี่ยน ต้าย ฯฒฯ บั๋ว บาบีโลน เญย น้าย เต๋ย เหยียด ฒู้ง ไกว-ช้าว เมี่ยน, “หาย เต้า โตะ เฟี้ย เจี๊ยน น้าย เต๋ย หฑั่ง แอ๋ง พ้อ ปุน เยีย หมวัง, เยีย ฯฒฯ ปุน วั้ว เต้า ฒุ เซ้ด หลัวะ เญย ลุย-ด๊าว แอ๋ง ปุน นิ่น เญย จาง ตั้ง เจี๊ยน เจียม-หลิ่ม. เยีย หย่า อ๋อย ออน นิ่น เยียม เยีย เญย กั๊วะ โหฒว ตะฟาม วั้ว เต้า.”

8ฮู่ง เตี๋ย เญย เหยียด ฒู้ง ไกว-ช้าว เมี่ยน ฯฒฯ เปียะ ต้าย มป่า นิ่น บัว ไม้ ไฮ่ โตะ น้าย เต๋ย หฑั่ง หย่า ไม้ ไฮ่ พ้อ เอ๋ย เล์ย.

9เบนซัดซา ฮู่ง เก้า ฟัด กั้ม เหฑีย, เฮมียน ฒู้ง ถุย เซ้ด, เบี่ยน เหฑ่ง หมี่ อ๊ะ. นิ่น เญย โหฒว โฮล เญย เมี่ยน เหยียด ฒู้ง ฮนั้ม ไม้ เม่ง แปะ.

10ฮู่ง หม่า ไฮ์ ฮู่ง เตี๋ย เหธา นิ่น โหฒว โฮล เญย เมี่ยน ก๊อง หว่า เญย เฉีย, นิ่น ฯฒฯ เปียะ เบ่น หญั่น ฮบ โฮล วั้ว ฉง เปย๊า. ฮู่ง หม่า ก๊อง, “โอ ฮู่ง เตี๋ย อ้า! โท้ ปุน ฮู่ง เตี๋ย เฒี่ยง ตุ๊ หม่าน ฝุย. ไม้ ตู๋ง กั้ม เหฑีย, ไม้ ตู๋ง ปุน เฮมียน เบี่ยน.

11เยียม เม่ย เญย กั๊วะ ม่าย เต้า เมี่ยน ม่าย สีง เฒี่ยน ปุน ต้าย เญย ธง-เม่ง เยียม นิ่น เญย เฮญี้ยว. เยียม เม่ย เญย เตีย เญย เสย เฒ้ย น้าย เต้า เมี่ยน ม่าย เฮญี้ยว-ฒ่อย หลง, ม่าย ว่วน ฒาง เหธา ธง-เม่ง ฮนั้ง เฒี่ยน เญย ธง-เม่ง นอ. เม่ย เญย เตีย, เนบูคัดเน้ดซา ฮู่ง, เซ ฮู่ง เญย เตีย, เหลียบ นิ่น โหฒว หฮวา-ญิ์น, โหฒว ฟ้าด, สัม เหฮลย เหธา ก๊าน เฮย เญย เมี่ยน เญย เปย๊ย.

12น้าย เต้า เมี่ยน, ดานีเอน, ต้ง ฮู่ง เตี๋ย เห่ว เบนเทซัดซา, ม่าย เฮญี้ยว-ฒ่อย หลง, ม่าย ว่วน ฒาง, ม่าย ธง-เม่ง, ม่าย ปั้น เหฒ่ย พ้อ เบ๋ย, ไฮ่ ไธ ตุ๊ ธ้วด หว่า-อ๊อม หย่า ไฮ่ ไจ๊ ขวน เฮญี้ยว เญย สี่. เห่ว ดานีเอน ต้าย, นิ่น ฯฒฯ พ้อ เม่ง เฟี้ย เจี๊ยน น้าย เต๋ย หว่า เญย เอ๋ย เล์ย.”

13นิ่น บัว ฯฒฯ ต้อ ดานีเอน ต้าย เยียม ฮู่ง เตี๋ย เญย หฑะเฮมียน. ฮู่ง เตี๋ย หน่าย ดานีเอน, “เม่ย เซ ต้ง เยียม ยูดา หฒุ กว๊าด ต้าย, เซ เยีย เญย เตีย, ฮู่ง เตี๋ย, เยียม ยูดา ต้อ ต้าย วั้ว เต้า ดานีเอน ไฟ?

14เยีย ไฮ์ ก๊อง เม่ย ม่าย สีง เฒี่ยน ปุน ต้าย เญย ธง-เม่ง เยียม เม่ย กะญั์ว. เม่ย ม่าย เฮญี้ยว-ฒ่อย หลง, ม่าย ว่วน ฒาง, ม่าย ธง-เม่ง หลง ไห่.

15อี้ หฒั่น เมี่ยน ต้อ ไกว-ช้าว เมี่ยน เหธา โหฒว ฟ้าด เญย เมี่ยน ต้าย โตะ น้าย เต๋ย หฑั่ง แอ๋ง พ้อ เอ๋ย เล์ย ปุน เยีย, มป่า นิ่น บัว ไม้ ไฮ่ พ้อ อ๊ะ.

16เยีย ไฮ์ ก๊อง เม่ย ไฮ่ พ้อ เม่ง หย่า ไฮ่ ไจ๊ ขวน เฮญี้ยว เญย สี่. สี ก๊อง เม่ย ไฮ่ โตะ น้าย เต๋ย หฑั่ง แอ๋ง พ้อ หฑั่ง เญย เอ๋ย เล์ย, เม่ย ฯฒฯ ตุ๊ ฒุ ลุย-ด๊าว-หลัวะ, จาง หย่า ตุ๊ ตั้ง เจี๊ยน เจียม-หลิ่ม, เยียม กั๊วะ กะญั์ว เม่ย หย่า ตุ๊ โหฒว ตะฟาม วั้ว เต้า.”

17ดานีเอน ฯฒฯ เตา ฮู่ง เตี๋ย, “เม่ย เญย ฒี่ง เหญ่ย กุ๊น เลี่ยว เม่ย กั้น ไฟ เฒาะ เม่ย เญย ฒี่ง เหญ่ย ปุน กั้น เต้า. มป่า เยีย อ๋อย เหว่ย ฮู่ง เตี๋ย โตะ น้าย เต๋ย หฑั่ง แอ๋ง พ้อ หฑั่ง เญย เอ๋ย เล์ย.

18“โอ ฮู่ง เตี๋ย อ้า! เยียม ฮลัง เจี๋ย เญย ทิน-ฮู่ง เหธย โฮล ไห่ เญย กั๊วะ ปุน เม่ย เญย เตีย, เนบูคัดเน้ดซา, โหฒว ฮู่ง หย่า ปุน นิ่น โหฒว โฮล, ม่าย ฌัง-หล่าง เหธา ฮ่าง ต้าว.

19เหว่ย หฒุ ทิน-ฮู่ง ปุน นิ่น โหฒว โฮล, หม่าน กั๊วะ, หม่าน ฝีง, หม่าน หญู่ง หว่า เญย เมี่ยน เยียม นิ่น เญย หฑะเฮมียน กั้ม เหฑีย, ซิน หฒิน. ฮู่ง เตี๋ย อ๋อย ไต๋ หาย เต้า นิ่น ฯฒฯ ไต๋, อ๋อย เลี่ยว หาย เต้า นิ่น ฯฒฯ เลี่ยว อ๊ะ. นิ่น อ๋อย เหลียบ หาย เต้า โหฒว โฮล นิ่น ฯฒฯ โหฒว อ๊ะ. อ๋อย ฒัด หาย เต้า เหฌี่ย ไอ๊ นิ่น ฯฒฯ โหฒว อ๊ะ.

20มป่า นิ่น เญย เฮญี้ยว เหมา เจี๊ยน ฝาว, เฮญี้ยว แหง่ง, โหฒว ตุ๊ เหมา, นิ่น ฯฒฯ หฒุ ถุย ธ้วด นิ่น เญย ฮู่ง เหว่ย เหธา โหฒว ฮู่ง เญย ฌัง-หล่าง.

21นิ่น เยียม ป้าม เมี่ยน บุด๋ง หฒุ หฒุ่น ธ้วด. นิ่น เญย เฮญี้ยว หย่า ฮนั้ง เฮยี่ย ฒ่อย เญย เฮญี้ยว. นิ่น เหธา เฮยี่ย ล่อ เยียม, หญั่น เมี้ย ฮนั้ง ง่ง นอ. นิ่น เญย ซิน หย่า หฒุ ลู่ง เญย บยู่ง-ซุ้ย ผิน ดอน เหฑ่ง, ฒั้ว เถา นิ่น ฮิ้ว ตุ๊ เยียม ฮลัง เจี๋ย เญย ทิน-ฮู่ง กุ๊น ป้าม เมี่ยน เญย กั๊วะ หย่า เซว่ย เอ๋ย เหลียบ นิ่น กิ๊น ต้าย เญย เมี่ยน กุ๊น.

22“โอ เบนซัดซา อ่า, เม่ย โหฒว นิ่น เญย ตอน. ไม้ กุ๊น เม่ย ฮิ้ว ตุ๊ น้าย เต๋ย เหยียด ฒู้ง สี่, เม่ย หย่า ไม้ ฒัด กั้น เญย เฮญี้ยว เหฌี่ย.

23ต๋าว หฑวน, เม่ย ท่าย กั้น โหฒว โฮล, แหง่ง เยียม ลู่ง หฒั่ง เญย เฒี้ยว. เม่ย เห่ว เมี่ยน มี่ง เฒาะ น้าย เต๋ย จา-ต๋อง เยียม นิ่น เญย สีง ติ่น ต้าย เยียม เม่ย เญย หฑะเฮมียน. เม่ย เหธา เม่ย เญย โหฒว โฮล เญย เมี่ยน, เม่ย เญย เอ๊า เหธา จ๊า-เฒ่ย เอ๊า หล่ง ฮบ ติ๊ว. เม่ย แอ๋ง เธง วั้ว เต๋ย หล่ง เจียม หล่ง ญ่าน, หล่ง ต้ง ซิ, หล่ง เฮลียะ, หล่ง เดี๋ยง, หล่ง หละเปย๊ย โหฒว ต้าย เญย เฒี่ยน. น้าย เต๋ย เฒี่ยน หมั่ง ไม้ ปวัด, หมวัง ไม้ ไฮ์, หย่า ไม้ ไฮ่ เปียะ เฮญี้ยว. มป่า เม่ย ไม้ ท่าย ทิน-ฮู่ง, ต้ง ปุน เม่ย เท้า เญย เฉีย เหธา เม่ย เญย เหยียด ฒู้ง เจ๊า-โหล่ว เยียม นิ่น เญย ปั์ว-ฒ้าง-ออ วั้ว เต้า.

24เหว่ย น้าย ทิน-ฮู่ง ปุน เจี๊ยะ ปั์ว หิ่น ธ้วด ต้าย เฟี้ย น้าย เต๋ย หฑั่ง.

25“น้าย เต๋ย หฑั่ง ฮนั้ง น้าย นอ เฟี้ย. เมเน, เมเน, เทเคน, ปาซิน

26“น้าย เต๋ย หว่า เญย เอ๋ย เล์ย เซ ฮนั้ง น้าย. เมเน เซ ทิน-ฮู่ง ซ้าว เม่ย เญย กั๊วะ เญย หฮญัง-ต้าว ปวั๊ง ฯฒฯ เถา เซ้ด เมว์ย อ๊ะ.

27เทเคน เซ เม่ย หฒุ เยียม ทิน-แป้ง เหฑียง เฑียง, ปวัด เม่ย ธา เต๋ย.

28ปาซิน เซ เม่ย เญย กั๊วะ ปุน ฆอย เป๋น มีเดีย เมี่ยน เหธา เปเซีย เมี่ยน เญย.”

29เบนซัดซา ฯฒฯ พ้าย หว่า. เมี่ยน เฒาะ ลุย-ด๊าว-หลัวะ ปุน ดานีเอน ฒุ เจี๊ยน, หย่า เฒาะ เจียม-หลิ่ม ตั้ง เจี๊ยน นิ่น เญย จาง. เมี่ยน แอ๋ง ฒุ่น ก๊อง, เยียม กั๊วะ กะญั์ว ดานีเอน ตุ๊ โหฒว ตะฟาม วั้ว เต้า.

30ต้ง วั้ว ม์วน บาบีโลน เญย ฮู่ง, เบน ซัดซา, หฒุ ไต๋.

31มีเดีย เมี่ยน เญย ฮู่ง, ดาลิอัด, ตุ๊ ธ้าง เต่ย-ปูง หมี่ อ๊ะ. วั้ว หฒั่น นิ่น ตุ๊ หลัวะ เหฒียบ เหญ่ย หฮญัง.

← Chapter 4 Jump to: Chapter 6 →