Esther 2

Mien Bible (Thai Script) © Thailand Bible Society, 2007

← Chapter 1 Jump to: Chapter 3 →

1น้าย เต๋ย สี่ เจี๋ย ลิ์ว, ฆะฮ้า อาหะสุเอลัด เญย กะเฉีย ฟิว มี่ง, นิ่น จั๋ง เถา วัดชาที เหธา วัดชาที โหฒว เญย สี่, หย่า จั๋ง เถา นิ่น ฮนั้ง หาย นอ ตี่ง โหฒว ปุน วัดชาที.

2ฟู-สู ฮู่ง เตี๋ย วั้ว เต๋ย เจียน ฯฒฯ บั๋ว ฮู่ง เตี๋ย, “อ๋อย หฒุ ปุน เมี่ยน ล์อ ไม้ แก้ง หฑย่าว เจี๋ย ตอน เญย เซียะ-เหฑว่ย ปุน ฮู่ง เตี๋ย.

3ฮู่ง เตี๋ย อ๋อย หฒุ พ้าย เต๋ย เจียน เยียม เม่ย กุ๊น เญย นอมๆ แซ้ง, เห่ว นิ่น บัว ล์อ ไม้ แก้ง หฑย่าว เจี๋ย ตอน เญย เซียะ-เหฑว่ย ต้อ เถา สุสา ต้ม ฒี่ง เญย ฮู่ง ติ่น วั้ว นอม มเซียะ ตอน เญย เปย๊า. อ๋อย หฒุ จิว ปุน ฮู่ง เตี๋ย เญย เจียน, ต้ง โก๋ว มเซียะ ตอน วั้ว เต้า เฮไก, ปุน นิ่น โก๋ว, แอ๋ง ปุน เจี๊ยน ฑ้าด ซิน เญย โย่ว ดาง นิ่น บัว.

4หาย เต้า เซียะ เก้า หอบ ฮู่ง เตี๋ย เญย เฮญี้ยว, ฮู่ง เตี๋ย กุ๊น ปุน วั้ว เต้า โหฒว ฮู่ง หม่า ตี๊ วัดชาที.” น้าย หญู่ง หฒะเอ๋ย หอบ ฮู่ง เตี๋ย เญย เฮญี้ยว, นิ่น ฯฒฯ เอย เจี๊ยน โหฒว อ๊ะ.

5เยียม สุสา ฒี่ง ม่าย เต้า ยิวไท เมี่ยน, บั๋ว เห่ว โมเดไค. นิ่น เซ เบนยามิน ฝีง. นิ่น เญย เตีย เห่ว จาอี. นิ่น เญย อง เห่ว ซิเมอี. นิ่น เญย อง-ถาย เห่ว คี้ด.

6บาบีโลน กั๊วะ เญย เนบูคัดเน้ดซา ฮู่ง มี่ง เยลูซาเลม ฒี่ง ธ้าง ยูดา เต่ย เญย ฮู่ง, เยโคนียา, มี่ง วั้ว หฒั่น, โมเดไค หย่า เหธา เจี๊ยน เมี่ยน หฒุ กว๊าด มี่ง.

7โมเดไค เญย โย์ว-เตี๋ย ม่าย เต้า เซียะ, บั๋ว เห่ว ฮาดาซา, แอ๋ง ม่าย นอม บั๋ว เห่ว เอเซเท. น้าย เต้า เซียะ ไม้ ม่าย เตี๋ย หม่า, โมเดไค ฯฒฯ ต้อ นิ่น โฮล ต้าย. เอเซเท เฒี่ยง ตุ๊ หลง หย่า เหฑว่ย ไห่. นิ่น เญย เตี๋ย หม่า ไต่ วั้ว หฒั่น, โมเดไค ฯฒฯ เซียว ต้าย โหฒว กั้น เญย เซียะ.

8ฮู่ง เตี๋ย เหฌี่ย เญย หลี่ง ฒุ่น ก๋อม เต่ย-ปูง วั้ว หฒั่น ฯฒฯ ม่าย เซียะ ธั้ม เญย หฒุ กั๊บ ฒุ้น ต้อ เถา สุสา ต้ม ฒี่ง, จิว ปุน เฮไก โก๋ว. เอเซเท หย่า เหธา เจี๊ยน หฒุ ฝูง เปียะ ฮู่ง ติ่น, จิว ปุน โก๋ว มเซียะ ตอน วั้ว เต้า เฮไก โก๋ว.

9เฮไก อะเฮน้ย ไห่ เอเซเท, ปวัด เอเซเท หอบ นิ่น เญย เฮญี้ยว, ฯฒฯ ก๊าน เจี๊ยน เถง ล์อ ฑ้าด ซิน เญย โย่ว ดาง เหธา หอบ หฒุ ตุ๊ เญย ป่วน หญั่น ฮบ. นิ่น หย่า พ้าย เสี่ย เต้า เยียม ฮู่ง ติ่น กิ๊น ต้าย เญย มเซียะ โปว ฟู-สู เอเซเท, หย่า ปุน นิ่น เหธา นิ่น เญย โปว เยียม มเซียะ ตอน เญย เปย๊า เก้า หลง เจี๋ย เญย ต๋อง.

10เอเซเท ไม้ ปุน หาย เต้า ฮิ้ว ตุ๊ นิ่น โหฒว หาย ฝีง เมี่ยน, หย่า ไม้ ปุน หาย เต้า ฮิ้ว ตุ๊ นิ่น เญย เธียน-เธะ, เหว่ย หฒุ โมเดไค หัด นิ่น ไม้ ตู๋ง ปุน หาย เต้า ฮิ้ว.

11โมเดไค ฮนอยๆ มี่ง เถา วั้ว เต๋ย มเซียะ ตอน เยียม เญย เปย๊า เญย หลาด หฑะเฮมียน แหมง. นิ่น อ๋อย ฮิ้ว เอเซเท ฮนั้ง หาย นอ หย่า หมั่ง ก๋า นิ่น ม่าย หาย หญู่ง เจ๊า ธ้วด.

12เต้าๆ เซียะ ไม้ แก้ง เปียะ มี่ง ปวั้ง อาหะสุเอลัด ฮู่ง เญย เฒี่ยง โห่, น้าย เต๋ย เซียะ อ๋อย หฒุ เอย เล์ย-เหญ่ย หล่ง โย่ว ดาง ฑ้าด ซิน ปวั๊ง เหยียด หฮญัง. อ๋อย หฒุ หล่ง มูหย่อ น้ม ซิน จุ๊ หฮลา เหญียะ, หย่า หล่ง โย่ว ดาง ฑ้าด ซิน จุ๊ หฮลา.

13เซียะ เปียะ มี่ง ปวั้ง ฮู่ง เตี๋ย วั้ว หฒั่น เซ ฮนั้ง น้าย. เซียะ อ๋อย หล่ง เยียม มเซียะ ตอน เญย เปย๊า เญย หาย หญู่ง ต้อ มี่ง, กุ๊น ปุน นิ่น อ๊ะ.

14ลู่ง ม์าน-หฮมวัง, เซียะ เปียะ มี่ง ปวั้ง ฮู่ง เตี๋ย, ลู่ง ดอม ธ้วด ต้าย มี่ง เยียม มเซียะ ตอน เญย กั้น นอม เปย๊า, ม่าย ซาอัดกาด โก๋ว. ซาอัดกาด เซ ฮู่ง เตี๋ย เญย เจียน, โก๋ว ฮู่ง เตี๋ย เญย จ๊า-เฒ่ย เอ๊า. เยียม วั้ว เญย มเซียะ ตอน ไม้ ตุ๊ แอ๋ง หฑวน มี่ง ปวั้ง ฮู่ง เตี๋ย, ธ้วด ลิ์ว นิ่น หอบ ฮู่ง เตี๋ย เญย เฮญี้ยว, ฮู่ง เตี๋ย ฯฒฯ หฒิว นิ่น เญย บั๋ว เห่ว ต้าย.

15เถา โมเดไค เญย ต้ม เน์า, อาบีฮาอิน เญย เซียะ, เซ โมเดไค เซียว ต้าย โหฒว นิ่น กั้น เญย เซียะ วั้ว เต้า เอเซเท, เปียะ มี่ง ปวั้ง ฮู่ง เตี๋ย เญย เฒี่ยง โห่, นิ่น ไม้ โท้ หาย หญู่ง ธ้วด ลิ์ว โก๋ว มเซียะ ตอน วั้ว เต้า ฮู่ง เตี๋ย เญย เจียน, เฮไก, พ้าย ปุน นิ่น. หาย เต้า ปวัด เอเซเท หย่า อะเฮน้ย ไห่ นิ่น.

16ต้อ เอเซเท เปียะ ฮู่ง ติ่น มี่ง ปวั้ง ฮู่ง เตี๋ย วั้ว หฒั่น, อาหะสุเอลัด โหฒว ฮู่ง ตะเธี้ยด หฮญัง วั้ว หฮญัง, เหฒียบ หฮลา, เซ เทเบ๊ด หฮลา.

17ฮู่ง เตี๋ย ฮนั้ม เอเซเท เก้า ธั้ม วั้ว เต๋ย เหยียด ฒู้ง มเซียะ ตอน. เอเซเท หอบ นิ่น เญย เฮญี้ยว ไห่, ฮู่ง เตี๋ย ฯฒฯ อะเฮน้ย เอเซเท เก้า ธั้ม ไม้ เปว๋ย เจี๋ย ตอน เญย หฒวัง เซียะ. นิ่น ฯฒฯ เฒาะ ฮู่ง นี้ง ด๋ง เจี๊ยน เอเซเท เญย มฆ้อง, ปุน นิ่น โหฒว ฮู่ง หม่า ตี๊ วัดชาที.

18ฮู่ง เตี๋ย เหว่ย เอเซเท เบ่น ต๋น หฮนาง โฮล เญย หย่า ธี้ง นิ่น เญย หฒวัง เจียน เหธา โหฒว โฮล เญย เมี่ยน. นิ่น หย่า ฒุ่น ก๋อม นิ่น เญย กั๊วะ เห่ว เมี่ยน ต้ง วั้ว ฮนอย ตี้ง กง ฮิด ขวน หย่า โหฒว เฮญี้ยว จั๊ง เญย ฝูง ฒี่ง เหญ่ย ปุน เมี่ยน.

19ไม้ หฑย่าว เจี๋ย ตอน เญย เซียะ หฒุ กั๊บ ฒุ้น ตะเหญ่ย หฑุ่น วั้ว หฒั่น, โมเดไค เฒว์ย เจี๊ยน ฮู่ง ติ่น เญย หลาด แก้ง ด่าง.

20เอเซเท ไม้ ปุน หาย เต้า ฮิ้ว ตุ๊ นิ่น โหฒว หาย ฝีง เมี่ยน หย่า ไม้ ปุน หาย เต้า ฮิ้ว ตุ๊ นิ่น เญย เธียน-เธะ, ฮนั้ง โมเดไค หัด นิ่น วั้ว นอ, เหว่ย หฒุ นิ่น หธ่อ หมวัง โมเดไค เญย หว่า ฮนั้ง ฒิ่น ด่าง โมเดไค ต้อ นิ่น โฮล เญย เฒี่ยง โห่.

21โมเดไค เฒว์ย เจี๊ยน ฮู่ง ติ่น เญย หลาด แก้ง เญย เฒี่ยง โห่, ฒั้ว ฮู่ง เญย แก้ง วั้ว เต๋ย อี เต้า เจียน, บิกทาน เหธา เทเล้ด, เฉีย เจี์ย ไห่ อาหะสุเอลัด ฮู่ง, เป่ย เดี๊ย ต๊า หฒะเอ๋ย ไต๋ นิ่น.

22โมเดไค ฮิ้ว ตุ๊ น้าย เต๋ย สี่, นิ่น บั๋ว เอเซเท. เอเซเท ฯฒฯ ต้อ โมเดไค เญย หว่า มี่ง บั๋ว ฮู่ง เตี๋ย.

23เมี่ยน ฒ่า หมั่ง น้าย เต๋ย สี่, ปวัด หฒะเก้ง เฒียน เญย, ฯฒฯ เฒาะ น้าย เต๋ย อี เต้า เมี่ยน มี่ง ดิ๋ว จาง เญย ต๋อง ดิ๋ว จาง ไต่. น้าย เต๋ย เหยียด ฒู้ง สี่ ตอง เจี๊ยน ฮู่ง เตี๋ย เฟี้ย เจี๊ยน ฮู่ง โต้ว โซว.

← Chapter 1 Jump to: Chapter 3 →