Esther 3

Mien Bible (Thai Script) © Thailand Bible Society, 2007

← Chapter 2 Jump to: Chapter 4 →

1น้าย เต๋ย สี่ เจี๋ย ลิ์ว, อาหะสุเอลัด ฮู่ง ท่าย อากัก เมี่ยน, ฮัมเมดาทา เญย ตอน, ฮามาน, หย่า จา นิ่น เญย เจียน-เม่ง โฮล ฝาว, ปุน นิ่น โหฒว เก้า โฮล เจี๋ย เหธา นิ่น โหฒว เจียน เญย เหยียด ฒู้ง เมี่ยน.

2เยียม ฮู่ง ติ่น เญย หลาด แก้ง เญย หฒวัง เจียน เกว่ย เหฌี่ย ป๋าย ฮามาน, เหว่ย หฒุ ฮู่ง เตี๋ย หัด นิ่น บัว ฮนั้ง น้าย นอ โหฒว. มป่า โมเดไค ไม้ เกว่ย หย่า ไม้ ป๋าย.

3เยียม ฮู่ง ติ่น ฟู-สู ฮู่ง เตี๋ย เญย เจียน หน่าย โมเดไค, “เม่ย เหว่ย หาย ติ่ว แหง่ง ฮู่ง เตี๋ย เญย หว่า?”

4วั้ว เต๋ย เมี่ยน ฮนอยๆ ขวิน นิ่น, มป่า นิ่น ไม้ หมวัง. นิ่น บัว ฯฒฯ มี่ง บั๋ว ฮามาน, อ๋อย หมั่ง ก๋า โมเดไค ไฮ่ แหง่ง ตุ๊ เถา หาย หฒั่น, เหว่ย หฒุ โมเดไค บั๋ว นิ่น บัว นิ่น เป๋น ยิวไท เมี่ยน.

5ฮามาน ปวัด โมเดไค ไม้ เกว่ย ไม้ ป๋าย, นิ่น ฯฒฯ เฉีย เจี์ย! ฑย้าม เบว๋ย ไห่.

6มป่า ฮามาน ฮิ้ว ตุ๊ โมเดไค เซ ยิวไท เมี่ยน, นิ่น ฯฒฯ ฮนั้ม ต้าย ขูง ไต๋ โมเดไค กั้น ฮนั้ง เซ ไม้ ฝาว ตุ๊ โหฒว. นิ่น ฯฒฯ ต๊า หฒะเอ๋ย ไต๋ เยียม ก๋อม อาหะสุเอลัด ฮู่ง เญย กั๊วะ เหยียด ฒู้ง เหธา โมเดไค จวั่ง ยิวไท ฝีง เญย เมี่ยน.

7อาหะสุเอลัด โหฒว ฮู่ง เหฒียบ เหญ่ย หฮญัง วั้ว หฮญัง, ฒี่ หฮลา, เซ นิสาน หฮลา, เมี่ยน เยียม ฮามาน เญย หฑะเฮมียน แกว๋ง ปูอา ล์อ หฮลา ล์อ ฮนอย, ด๊อด หฒุ เหฒียบ เหญ่ย หฮลา, เซ อาดา หฮลา, เหฒียบ ฟาม วั้ว ฮนอย.

8ฮามาน ก๊อง บั๋ว อาหะสุเอลัด ฮู่ง, “ม่าย ฝีง เมี่ยน ฟ้าด หฑาน หฒอบ เจี๊ยน เยียม เม่ย กุ๊น เญย กั๊วะ เญย นอมๆ แซ้ง เญย แปะ ฝีง กะญั์ว. นิ่น บัว เญย เล์ย เหธา หม่าน ฝีง เมี่ยน เญย เล์ย กั้น หญู่ง. นิ่น บัว หย่า ไม้ เอย ฮู่ง เตี๋ย เญย เล์ย-หลัด โหฒว. สี ก๊อง ฮู่ง เตี๋ย เลี่ยว เจี๊ยน นิ่น บัว นอ, เซ ไม้ ลั่ม หล่ง, เถง ไม้ ตุ๊ ฮู่ง เตี๋ย.

9ฮู่ง เตี๋ย ปวัด หอบ นอ, โท้ เหฌี่ย ติ้ว หลี่ง เหว่ย เหมียด นิ่น บัว. เยีย ฯฒฯ เฒาะ อี สิน เหยียด หว่าน จ้อย ญ่าน ฝูง เปียะ ฮู่ง เตี๋ย เญย ญ่าน ลั์ม เหว่ย โหฒว ฮู่ง เตี๋ย เญย กั๊วะ กะญั์ว เญย กง.”

10ฮู่ง เตี๋ย ฯฒฯ ฮลุด นิ่น เญย ปั์ว-โด๊ะ-แฑง เหยียน ปุน ยิวไท เมี่ยน เญย วิน-วั้ง, อากัก เมี่ยน, ฮัมเมดาทา เญย ตอน, ฮามาน.

11ฮู่ง เตี๋ย ก๊อง บั๋ว ฮามาน, “น้าย เต๋ย ญ่าน เหธา น้าย ฝีง เมี่ยน เยีย จิว ปุน เม่ย. เม่ย ปวัด หอบ หฒุ ฮนั้ง หาย นอ โหฒว, เซว่ย เม่ย โหฒว อ๊ะ.”

12ฒี่ หฮลา เหฒียบ ฟาม วั้ว ฮนอย, ฮามาน เห่ว ฮู่ง เตี๋ย เญย โซว-ปิ๊ว กั๊บ ฒุ้น เฟี้ย โซว ปุน โหฒว โฮล, เถง ฮู่ง เตี๋ย กุ๊น กั๊วะ เญย เหยียด ฒู้ง เจียน, เหธา นอมๆ แซ้ง เญย แซ้ง-เฒี้ยว, เหธา หฒวัง เจียน หฒิว นอมๆ แซ้ง เญย หฑั่ง เหธา ฝีงๆ เมี่ยน เญย หว่า. โซว เหฌี่ย อาหะสุเอลัด ฮู่ง เญย บั๋ว หย่า หล่ง ฮู่ง เตี๋ย เญย ปั์ว-โด๊ะ-แฑง ฆ้าบ เจี๊ยน เหยียน.

13ฝูง เฝียน เญย เมี่ยน ฝูง โซว มี่ง เถา ฮู่ง เตี๋ย กุ๊น เญย นอมๆ แซ้ง. โซว ก๊อง, “อ๋อย หฒุ ไต๋ เหฑ่ง, เหมียด เหฑ่ง ยิวไท เมี่ยน, โก๋ หลุน, มจั่ง มเซียะ เหธา ฝุเจว๊ย. เหฒียบ เหญ่ย หฮลา, เซ อาดา หฮลา, เหฒียบ ฟาม วั้ว ฮนอย กะญั์ว, อ๋อย หฒุ ไต๋ เถา เหฑ่ง, ไม้ ตู๋ง เลี่ยว เหยียด เต้า ธ้วด สีง แหม่ง. เลี่ยม นิ่น บัว เญย จา-ตี้ง กะน้าย อ๋อย หฒุ ลู้ เหฑ่ง.”

14อ๋อย หฒุ เธว น้าย ติ้ว ฮู่ง หลี่ง ฝูง มี่ง เถา นอมๆ แซ้ง, ฒุ่น ปุน ฝีงๆ เมี่ยน ฮิ้ว เหว่ย ปุน นิ่น บัว หลิ่ว เล์ย เหฒียง ฒั้ว เจี๊ยน วั้ว นอม ฮนอย.

15ฝูง เฝียน เญย เมี่ยน ฯฒฯ เต๊ง ฮู่ง เตี๋ย เญย หลี่ง ก๊าน เจี๊ยน ธ้วด มี่ง. วั้ว ติ้ว ฮู่ง หลี่ง หย่า เยียม สุสา ต้ม ฒี่ง ฒุ่น ธ้วด. ฮู่ง เตี๋ย เหธา ฮามาน เฒว์ย เจี๊ยน ฮบ ติ๊ว, มป่า สุสา ฒี่ง เญย แปะ ฝีง หลุ่น เหฑ่ง อ๊ะ.

← Chapter 2 Jump to: Chapter 4 →