James 3

Mien Bible (Thai Script) © Thailand Bible Society, 2007

← Chapter 2 Jump to: Chapter 4 →

1เยีย เญย ก๋อ-โย์ว อ่า, เม่ย บัว ไม้ หฒุ ม่าย เมี่ยน ธั้ม โหฒว ฟิน-แซง, เหว่ย หฒุ เม่ย บัว ฮิ้ว ตุ๊ เยีย บัว โหฒว ฟิน-แซง เญย เมี่ยน อ๋อย หฒุ เซี้ยม เก้า เฮนี้ย เจี๋ย ไม้ โหฒว เญย เมี่ยน.

2บัว เต้าๆ โหฒว ต่อง ธั้ม-หญู่ง เญย. หาย เต้า เหยียด ลิ์ว ไม้ ก๊อง ต่อง หาย หญู่ง, วั้ว เต้า เซ ตุ้น ยุ่น เญย เมี่ยน, ไฮ่ กุ๊น ตุ๊ เหฑ่ง นิ่น กั้น เญย ซิน.

3บัว เฒาะ ฮลาง-โค้ว ฟับ เจี๊ยน ม์า เญย ฑุ่ย แป๋ง เหว่ย ปุน ม์า หมวัง บัว. บัว ฯฒฯ ไฮ่ กุ๊น เหฑ่ง นิ่น เญย ซิน, ปุน นิ่น มี่ง หาย หย่า ตุ๊.

4ฮนั้ม หมั่ง ก๋า ฑั้ง! ไม้ กุ๊น ฑั้ง ด่ง หาย โฮล หย่า หฒุ ต้ม หฑยาว ป่วน มี่ง, ฑั้ง-เจียน หล่ง ฑั้ง-เบียด ไฝ! เญย, เอย นิ่น เญย เฮญี้ยว ก๊อย มี่ง ก๊อย ต้าย.

5เบียด หย่า ฟี่ ฮนั้ง เญย. ไม้ กุ๊น เซ ซิน หฒั่ง เญย เหยียด หญู่ง ไฝ เญย, มป่า ไฮ่ ปู๋ง ตุ๊ ต้ม หว่า. หย่า ฮนั้ม หมั่ง ก๋า! ติ๊ เตียน โต์ว-เบียด ฮนั้ง มป่า ไฮ่ เหฒียะ เหฑ่ง ต้ม เก้ม.

6เบียด เซ ฮนั้ง โต์ว นอ. เบียด โหฒว ซิน เญย เหยียด หญู่ง หย่า เอ๊าะ ไห่, ปุน เอ๊าะ เญย สี่ ธ้วด ปวั๊ง เหฑ่ง ซิน. เบียด เตี๊ยม เจี๊ยน เยียม เต่ย หญัวะ ต้าย เญย โต์ว. เหยียด เสย ม่าย น้าย หญู่ง โต์ว เหฒียะ เจี๊ยน บัว เยียม.

7หญู่งๆ แซง-คู้, เฮยี่ย ฒ่อย, เหนาะ, นาง, เบย์า, ป้าม เมี่ยน ไฮ่ กุ๊น ตุ๊ ฮี่ง, ฒู้ง กุ๊น ตุ๊ บัวะ หมี่ อ๊ะ.

8มป่า เบียด, ไม้ ม่าย หาย เต้า ไฮ่ กุ๊น ตุ๊ เจี๊ยน. เบียด เซ เอ๊าะ ไห่, ไม้ ไฮ่ กุ๊น ไม้ เจี๊ยน, ม่าย แหล่ง ไต่ เมี่ยน เญย เดีย ปวั๊ง เหฑ่ง.

9บัว หล่ง เบียด เธง เฒี้ยว หฒั่ง เตี๋ย, หย่า หล่ง เหฒียว เมี่ยน, ต้ง หฒั่ง เตี๋ย เหฒย ธ้วด ต้าย ฒวั้ง นิ่น กั้น หย่า ฮนั้ง นิ่น กั้น นอ.

10เธง เญย หว่า เหธา เหฒียว เญย หว่า จวั่ง ซูง ฑุ่ย ธ้วด. เยีย เญย ก๋อ-โย์ว อ้า! ฮนั้ง หน่าย หฒะเก้ง ไม้ หอบ เหยียด เต๋ย.

11คู้ เญย ววม เหธา ไม้ คู้ เญย ววม ไฮ่ จวั่ง นอม ฒี้ง ธ้วด ไฟ?

12เยีย เญย ก๋อ-โย์ว อ้า! ง่ง หญอ เดี๋ยง ไฮ่ เฒี่ยง กะลั้น เปี๊ยว ไฟ? อะหงุ่น เฮมย ไฮ่ เฒี่ยง ง่ง หญอ เปี๊ยว ไฟ? ววม-ฑ่าย ฒี้ง หย่า ไม้ ไฮ่ ธ้วด คู้ เญย ววม.

13เยียม เม่ย บัว หน่าย, ม่าย หาย เต้า ไกว เญย, ธง-เม่ง เญย ไฟ? นิ่น อ๋อย หฒุ หล่ง ส่วน เฮญี้ยว, หล่ง ธง-เม่ง โหฒว คู้ สี่ ปุน ธีง นิ่น ต้ง หน่าย หญู่ง เมี่ยน.

14สี ก๊อง เม่ย เฮญี้ยว อิม, เหมว่ย เจี๊ยะ, ขูง โต้ว กั้น ตุ๊ หลง ฮนั้ง, ไม้ ตู๋ง เธง กั้น ม่าย ธง-เม่ง. ไม้ ตู๋ง ก๊อง-แปะ แหง่ง เฒียน เล์ย.

15น้าย หญู่ง ธง-เม่ง เซ ไม้ ฮนั้ง เยียม กู้ หงว่าย ต้าย เญย ธง-เม่ง. เซ ป้าม เกน เญย, ต้ง เยียม เมี่ยน เญย เฮญี้ยว ธ้วด ต้าย เญย, หย่า เยียม เมี้ยน ธ้วด ต้าย เญย ธง-เม่ง.

16หาย นอม ต๋อง ม่าย เมี่ยน เหมว่ย เจี๊ยะ, โต้ว กั้น ตุ๊ หลง, วั้ว นอม ต๋อง ฯฒฯ เหธว หลุ่น, ม่าย หญู่งๆ หว่าย สี่ ธ้วด.

17เยียม กู้ หงว่าย ต้าย เญย ธง-เม่ง ตะเยี้ยด เซ ธีง-เหฑ่ง เญย, หย่า แป้ง ออน เญย, ส่วน เญย, เห่ ตุ๊ ก๊อง เญย. น้าย หญู่ง ธง-เม่ง ปุน ล่าน ค้อ-เลี่ยน ล่าน, หย่า ขูง โหฒว ธ้วด คู้ สี่ ฮนั้ง, ไม้ หมั่ง ไฝ หาย เต้า, หย่า ไม้ ม่าย เป้ย หฒะ เฮญี้ยว ฌ้วด เญย สี่.

18หาย เต้า ขวิน อี ปูง เมี่ยน หอบ เฮญี้ยว ต้าย เซ หฒวัง แป้ง ออน เญย ญิม. เซียว ต้าย เญย เหยียด ฒู้ง ฯฒฯ หลง เญย.

← Chapter 2 Jump to: Chapter 4 →