James 4

Mien Bible (Thai Script) © Thailand Bible Society, 2007

← Chapter 3 Jump to: Chapter 5 →

1เยียม เม่ย บัว กะญั์ว หาย หญู่ง ปุน เม่ย บัว แฑง จ๋า เบ๊าะ จ๋า? เซ หลาย เม่ย บัว เญย เฮญี้ยว ม่าย หั่น เญย สี่ หธีง ห่อย เม่ย บัว เบ๊าะ จ๋า ไม้ เฒ์ย?

2เม่ย บัว หั่น อ๋อย ตุ๊ กะน้าย หย่า ไม้ ไฮ่ ตุ๊ ฯฒฯ ไต๋ เมี่ยน. เม้า เมี่ยน เญย กะน้าย มป่า ไม้ ไฮ่ ตุ๊ ฯฒฯ แฑง จ๋า เบ๊าะ จ๋า. เม่ย บัว อ๋อย หล่ง เญย เม่ย บัว ไม้ ม่าย เหว่ย หฒุ เม่ย บัว ไม้ โท้ ทิน-ฮู่ง.

3เม่ย บัว โท้ ลิ์ว หย่า ไม้ ตุ๊ เหว่ย หฒุ เม่ย บัว โท้ ต่อง, ขูง อ๋อย หล่ง ต้อ มี่ง โหฒว เฮ่น เบี๋ยน ฮนั้ง.

4ม่าย เฮยี่ย เฮญี้ยว เญย เมี่ยน อ้า! เม่ย บัว ไม้ ฮิ้ว ตุ๊ ไฟ? เหธา ป้าม เกน โหฒว ต่อย เซ เหธา ทิน-ฮู่ง ต๊า วิน. หาย เต้า ตี่ง เหธา ป้าม เกน โหฒว ต่อย, วั้ว เต้า เป๋น ทิน-ฮู่ง เญย วิน-วั้ง อ๊ะ.

5เม่ย บัว ฮนั้ม ต้าย น้าย เต๋ย กีง-โซว เญย หว่า ไม้ ม่าย เอ๋ย เล์ย ไฟ? กีง-โซว ก๊อง, “ทิน-ฮู่ง ปุน เยียม บัว เญย เฮญี้ยว วั้ว เต้า สีง ลี่ง แฑง เจี๊ยน อ๋อย กุ๊น บัว.”

6มป่า นิ่น หย่า จา เหธย เอน เก้า ธั้ม. เหว่ย น้าย กีง-โซว ก๊อง, “ทิน-ฮู่ง แหง่ง เจี๊ยน เธง-โฮล เญย เมี่ยน, มป่า นิ่น เหธย เอน ปุน เหญี่ยม กั้น โหฒว ไฝ เญย เมี่ยน.”

7ฮนั้ง หน่าย อ๋อย หฒุ บัวะ ทิน-ฮู่ง กุ๊น. อ๋อย หฒุ แหง่ง เจี๊ยน เมี้ยน เญย ฮู่ง, ซาตาน, นิ่น ฯฒฯ เปย๋า เม่ย บัว อ๊ะ.

8อ๋อย หฒุ มี่ง นิด เจี๊ยน ทิน-ฮู่ง, ทิน-ฮู่ง ฯฒฯ ต้าย นิด เจี๊ยน เม่ย บัว. ฒุ์ย-เมี่ยน อ้า! อ๋อย หฒุ หฑาว เหฑ่ง ปั์ว. อี ติ่ว เฮญี้ยว เญย เมี่ยน อ้า! อ๋อย หฒุ หฑาว เม่ย บัว เญย เฮญี้ยว ธีง-เหฑ่ง ต้าย.

9อ๋อย หฒุ เฑ่า ไห่, ปู๋ง-ซีง ปู๋ง-เฉีย เญย เญี้ยม. เม่ย บัว คู่ จั๊ด, อ๋อย หฒุ ก๊อย ต้าย เญี้ยม. เม่ย บัว เฌียน-โย่ว, ออน-เหลาะ, อ๋อย หฒุ ก๊อย ต้าย เป๋น โยว-เฑ่า.

10อ๋อย หฒุ เยียม เฒี้ยว เญย หฑะเฮมียน เหญี่ยม กั้น โหฒว ไฝ, นิ่น ฯฒฯ ท่าย เม่ย บัว ฝาว.

11ก๋อ- โย์ว อ่า, ล่าน ไม้ ตู๋ง ต้าน ล่าน. หาย เต้า ต้าน นิ่น เญย ก๋อ-โย์ว ไฟ ตี่ง ก๋อ-โย์ว ม่าย ฒุ์ย, วั้ว เต้า หย่า ฟี่ ฮนั้ง เญย ต้าน เล์ย-หลัด หย่า ตี่ง เล์ย-หลัด เซ ไม้ หอบ. สี ก๊อง เม่ย ตี่ง เล์ย-หลัด เซ ไม้ หอบ, เม่ย ฯฒฯ ไม้ เฒ์ย เอย เล์ย-หลัด เญย เมี่ยน. เม่ย โหฒว ตี่ง เล์ย-หลัด เญย เมี่ยน.

12ขูง ม่าย ดุ เต้า เหลียบ เจี์ย เล์ย-หลัด หย่า โหฒว เซี้ยม ฒุ์ย เจียน, เซ ต้ง ทิน-ฮู่ง, ต้ง ไฮ่ เหฌียว เมี่ยน หย่า ไฮ่ เหมียด เมี่ยน วั้ว เต้า. วั้ว หญู่ง เม่ย กั้น นี? เม่ย โหฒว หาย เต้า หธีง ต้าย ไฮ่ ตี่ง เม่ย ก๋อ-โย์ว เญย ฒุ์ย?

13ก๊อง น้าย เต๋ย หว่า เญย เมี่ยน หมวัง เยีย ม่าะ! เม่ย บัว ก๊อง, “อี้ ฮนอย ไฟ ฌัง ฮนอย เยีย บัว อ๋อย มี่ง น้าย นอม ฒี่ง ไฟ วั้ว นอม ฒี่ง, เยียม วั้ว โหฒว เหยียด หฮญัง เญย แซง-เอ๋ย ตุ๊ เหล่ย.”

14มป่า เม่ย บัว เลี่ยม ไม้ ฮิ้ว ตุ๊ ฌัง ฮนอย เม่ย บัว เญย แหม่ง อ๋อย ฮนั้ง หาย นอ. เม่ย บัว เซ ฮนั้ง ติ๊ เตียน โหม่ว นอ, ธ้วด ตั้ง ฮนั้ง แอ๋ง หมิด หมี่ อ๊ะ.

15เม่ย บัว หอบ หฒุ ก๊อง, “สี ก๊อง เฒี้ยว เญย หฒะเอ๋ย, เยีย บัว ไฮ่ เฒี่ยง เจี๊ยน โหฒว น้าย หญู่ง, โหฒว วั้ว หญู่ง.”

16มป่า เม่ย บัว เธง-โฮล, ปู๋ง หว่า-เหมา. ปู๋ง น้าย หญู่ง ต้ม หว่า เหยียด ฒู้ง เซ เอ๊าะ ไห่.

17ฮนั้ง หน่าย, หาย เต้า ฮิ้ว ตุ๊ นิ่น หอบ หฒุ โหฒว หาย หญู่ง คู้ สี่, นิ่น หย่า ไม้ โหฒว, วั้ว เต้า ฯฒฯ ม่าย ฒุ์ย อ๊ะ.

← Chapter 3 Jump to: Chapter 5 →