James 5

Mien Bible (Thai Script) © Thailand Bible Society, 2007

← Chapter 4 Jump to:

1ปุ๊ด- ฒ่อย เมี่ยน อ้า! หมวัง เยีย ก๊อง โอ่. อ๋อย หฒุ เหว่ย เม่ย บัว อ๋อย ปวั้ง เญย โค้ว หน่าน ปู๋ง-ซีง ปู๋ง-เฉีย เญย เญี้ยม.

2เม่ย บัว เญย ฒิ่น ฒ่อย หยุ เหฑ่ง, ลุย-โหว หฒุ แกง หงาด หว่าย เหฑ่ง.

3เม่ย บัว เญย เจียม ญ่าน เจี๋ย หฑีง หมี่ อ๊ะ. น้าย หฑีง โหฒว ฒอง-เหฒง ปุน ธีง เม่ย บัว ต่อง. หฑีง หย่า อ๋อย ฮนั้ง โต์ว นอ, ปั๊ว เหฑ่ง เม่ย บัว เญย ซิน. เยียม น้าย เต๋ย ฆะฮ้า ลาย เญย ฮนอย เม่ย บัว ขูง เซียว เจี๊ยน ฒิ่น ฒ่อย ฮนั้ง.

4เม่ย บัว ไม้ คอย กง-ฒิ่น ปุน เถง เม่ย บัว โหฒว เด่ย เญย เมี่ยน. น้าย เต๋ย กง-ฒิ่น เห่ว เจี๊ยน โก๋ เม่ย บัว. หมวัง ก๋า! เถง เม่ย บัว เซียว แกง-หฒวัง เญย เมี่ยน เญย เฉีย ฝาว เถา เน่น เจี๋ย เญย เฒี้ยว เญย มน่อม.

5เม่ย บัว เยียม เสย หฒั่ง ขูง หญั่น หลง ฮบ หลง หฒาว เฮ่น เบี๋ยน ฮนั้ง. น้าย เซ ฮนั้ง หวุย กั้น จุ่น ฒั้ว หฒุ ไต๋ วั้ว ฮนอย.

6เม่ย บัว ตี่ง ฒุ์ย หย่า ไต๋ คู้ เมี่ยน, นิ่น หย่า ไม้ แหง่ง เม่ย บัว.

7ก๋อ- โย์ว อ่า, เม่ย บัว อ๋อย หฒุ หล่ง หน่อย ฒั้ว เถา เฒี้ยว แอ๋ง ต้าย. หมั่ง ก๋า! โหฒว เด่ย เญย เมี่ยน ด่ง หาย หล่ง หน่อย ฒั้ว เจี๊ยน เซียว เด่ย จ๋าย ไห่ เญย ล่าง หฒิ. นิ่น หย่า หล่ง หน่อย ฒั้ว เธียว-เกน บยู่ง เหธา ธุน-เกน บยู่ง ต้าย.

8เม่ย บัว หย่า อ๋อย หฒุ หล่ง หน่อย, เหลียบ ตี่ง เฮญี้ยว เหว่ย หฒุ เฒี้ยว ต้าย เญย ฮนอย เถา ฟัด อ๊ะ.

9ก๋อ-โย์ว อ่า, เม่ย บัว ไม้ ตู๋ง ล่าน งบ ล่าน เหว่ย ปุน เม่ย บัว ไม้ หฒุ เซี้ยม ฒุ์ย. หมั่ง ก๋า, เซี้ยม ฒุ์ย เจียน ฒู้ง โซ้ว เจี๊ยน วั้ว แก้ง ด่าง อ๊ะ!

10เยีย เญย ก๋อ-โย์ว อ่า, จั๋ง เจี๊ยน ฒิ่น ด่าง เต๊ง เฒี้ยว เญย บั๋ว ก๊อง วั้ว เต๋ย โต่ว หว่า เมี่ยน. นิ่น บัว เสี่ยว โค้ว หย่า หล่ง หน่อย เตี๊ย. เม่ย บัว อ๋อย หฒุ หล่ง นิ่น บัว โหฒว หญู่ง เฒ้ย.

11บัว ก๊อง, หล่ง หน่อย เตี๊ย เถา ต้าว เญย เมี่ยน ม่าย ออน-เหลาะ. เม่ย บัว ไฮ์ เจี๋ย วั้ว เต้า โย้บ หล่ง หน่อย เตี๊ย ตุ๊ โค้ว. หย่า ฮิ้ว ตุ๊ เซ้ด เมว์ย เฒี้ยว ด่ง หาย ค้อ-เลี่ยน เมี่ยน, โหฒว หลง ปุน เมี่ยน.

12เยีย เญย ก๋อ-โย์ว อ่า, เก้า เจี๊ยน เจี๋ย เซ ไม้ ตู๋ง เฒี้ยง ลู่ง เฒี้ยง เดา ไฟ เฒี้ยง หาย หญู่ง แล์ง หว่า. หาย หญู่ง “เฒ์ย” ฯฒฯ ก๊อง “เฒ์ย.” หาย หญู่ง “ไม้ เฒ์ย” ฯฒฯ ก๊อง “ไม้ เฒ์ย” เหว่ย ปุน เม่ย บัว ไม้ หฒุ ตี่ง ฒุ์ย.

13เยียม เม่ย บัว กะญั์ว หาย เต้า ม่าย ขวน น่าน ไฟ? วั้ว เต้า อ๋อย หฒุ เต๋า เก๋า. หาย เต้า ม่าย ออน-เหลาะ ไฟ? อ๋อย หฒุ ป๋าว เธง ทิน-ฮู่ง เญย ฑูง.

14เม่ย บัว หาย เต้า ปุ๊ด แป่ง ไฟ? นิ่น อ๋อย หฒุ เห่ว จิว-ปาง เญย เมี่ยน โก๋ ต้าย เถง เต๋า เก๋า หย่า เต๊ง เฒี้ยว เญย บั๋ว เฒาะ โย่ว เฮยี้ยด เจี๊ยน นิ่น เญย ซิน.

15หล่ง เสียน ฟิม เต๋า เก๋า ฯฒฯ เหฌียว ตุ๊ แป่ง เมี่ยน, เฒี้ยว หย่า อ๋อย ปุน นิ่น หลง ต้าย. สี ก๊อง นิ่น ป์าม ฒุ์ย, ทิน-ฮู่ง ฯฒฯ กวั่ง นิ่น เญย ฒุ์ย หมี่ อ๊ะ.

16ฮนั้ง หน่าย, เม่ย บัว ล่าน อ๋อย หฒุ เหญี่ยม ฒุ์ย ปุน ล่าน, ล่าน อ๋อย หฒุ เถง ล่าน เต๋า เก๋า. เม่ย บัว เญย แป่ง ฯฒฯ หลง หมี่ อ๊ะ. คู้ เมี่ยน เต๋า เก๋า, นิ่น เต๋า เก๋า เญย หว่า ม่าย ชะ หย่า ลี่ง ไห่.

17เอลียา เซ เหยียด เต้า ป้าม เมี่ยน, เหธา บัว ฟี่ ฮนั้ง เญย. นิ่น หล่ง เฮญี้ยว เหฌี่ย ชะ เต๋า เก๋า โท้ ทิน-ฮู่ง ไม้ ตู๋ง ปุน ลู่ง ตุ้ย บยู่ง. ลู่ง ฯฒฯ ไม้ ตุ้ย บยู่ง ปัว หฮญัง-เปี๋ยน.

18เอลียา แอ๋ง เต๋า เก๋า, ลู่ง ฯฒฯ ตุ้ย บยู่ง. เดา หย่า ธ้วด แกง-หฒวัง อ๊ะ.

19เยีย เญย ก๋อ-โย์ว อ่า, สี ก๊อง เยียม เม่ย บัว กะญั์ว ม่าย เต้า เล่ย เฒียน เล์ย มี่ง ต่อง เจ๊า, แอ๋ง ม่าย เต้า เคน นิ่น หฑวน ต้าย นอ,

20อ๋อย หฒุ จั๋ง เจี๊ยน หาย เต้า เคน ยั่ง ต่อง เจ๊า เญย ฒุ์ย-เมี่ยน หฑวน ต้าย, วั้ว เต้า ฯฒฯ เหฌียว ฒุ์ย-เมี่ยน ไม้ หฒุ ไต่. ม่าย ฒุ์ย ธั้ม มป่า ตุ๊ ทิน-ฮู่ง กวั่ง เหฑ่ง หมี่ อ๊ะ.

← Chapter 4 Jump to: