Song of Solomon 1

Mien Bible (Thai Script) © Thailand Bible Society, 2007

Jump to: Chapter 2 →

1ซาโลมอน เก้า คู่ หมวัง เจี๋ย เญย ฑูง.

2โท้ เม่ย หล่ง เม่ย เญย ฑุ่ย ฒม เยีย, เหว่ย หฒุ เม่ย ฮนั้ม เยีย เซ เก้า หลง อะหงุ่น ติ๊ว.

3เม่ย ฑ้าด ซิน เญย โย่ว ฮว่วนๆ เญย ดาง, เม่ย เญย เม่ง ฮนั้ง โต๋ ธ้วด เญย โย่ว ดาง, เหว่ย น้าย หฒวัง เซียะ ฮนั้ม เม่ย.

4โท้ ต้อ เยีย เหธา เม่ย มี่ง. ปุน เยีย บัว เซี้ยบๆ เญย มี่ง ม่าะ! ฮู่ง เตี๋ย ต้อ เยีย เปียะ นิ่น เญย เกน. เยีย บัว ฯฒฯ เหว่ย เม่ย เฌียน-โย่ว ออน-เหลาะ. เยีย บัว ฯฒฯ อ๋อย เธง เม่ย ด่ง หน่าย ฮนั้ม เยีย เก้า ธั้ม อะหงุ่น ติ๊ว-คู้. หฒวัง มเซียะ ตอน ฮนั้ม เม่ย เซ หอบ เญย.

5โอ เยลูซาเลม เญย หฒวัง เซียะ อ่า, ไม้ กุ๊น เยีย เจี๊ยะ, มป่า เหฑว่ย เญย, ฮนั้ง เคดา เญย ด๊บ-ลิ่ว หย่า ฮนั้ง ซาโลมอน เญย ฮู่ง ติ่น เญย แบะ แก้ง เดีย.

6ไม้ ตู๋ง หมั่ง เผีย เยีย เหว่ย หฒุ เยีย เจี๊ยะ. เยีย เจี๊ยะ เหว่ย หฒุ หญุด พุย. เหธา เยีย จวั่ง มา เญย ก๋อ เฉีย เจี์ย เยีย, อ๊าบ เยีย โก๋ว อะหงุ่น หฮวีง, มป่า เยีย กั้น เญย อะหงุ่น หฮวีง เยีย ไม้ ตุ๊ โก๋ว.

7เยีย เญย เฮญี้ยว ฮนั้ม เญย เมี่ยน อ้า! โท้ เม่ย บั๋ว เยีย, เม่ย เยียม หาย นอม ต๋อง ปู๋ง ปะกี ยู่ง? ลู่ง อ๋าน เม่ย ปุน เม่ย เญย ปะกี ยู่ง ฮิด ขวน หาย นอม ต๋อง? เยีย เหว่ย หาย ติ่ว อ๋อย หฒุ ฮนั้ง บย์อง เจี๊ยน เฮมียน เญย มเซียะ ตอน เยียม เม่ย เญย ต่อย เญย ปะกี ยู่ง กวั้น กะเฮลน?

8เก้า เหฑว่ย เจี๋ย เญย เซียะ อ่า, สี ก๊อง เม่ย ไม้ ฮิ้ว นอ, ฒิ่ม เจี๊ยน ปะกี ยู่ง กวั้น เญย เต้ย มี่ง. กุ๊น ปู๋ง เม่ย เญย ยู่ง เยียม โก๋ว ยู่ง เมี่ยน เญย ด๊บ-ลิ่ว กะเฮลน.

9เยีย ฮนั้ม เญย เซียะ อ้า! เยีย เป๊ย เม่ย ฮนั้ง ฟาโล ฮู่ง ทอ เธีย เญย ม์า เหฑว่ย.

10เม่ย เญย อี ปูง ขัม-ปุย ม่าย ฒอง เหฑว่ย เญย กะน้าย, เม่ย เญย จาง ตั้ง เจี๊ยน หธุน ต้าย เญย โฒว-ปู๊.

11เยีย บัว อ๋อย หล่ง เจียม โหฒว เซียว-เซ้ด ปุน เม่ย, แอ๋ง หล่ง ญ่าน เฮยี้ยด ผุย เจี๊ยน.

12ฮู่ง เตี๋ย เฒว์ย เจี๊ยน นิ่น เญย เตี้ย เญย เฒี่ยง โห่, เยีย เญย โย่ว ดาง ธ้วด ดาง เญย เฉีย ปวั๊ง.

13เยีย ฮนั้ม เญย ตอน เหว่ย เยีย เซ ฮนั้ง เหยียด บัวะ มูหย่อ ดาง, หฒั่นๆ เยียม เยีย เญย หละค้วด.

14เยีย ฮนั้ม เญย ตอน เหว่ย เยีย เซ ฮนั้ง เหยียด จ้อย ฝ่ง ฟิน เปี้ยง เยียม เอนเกดี เญย อะหงุ่น หฮวีง กะญั์ว.

15เยีย ฮนั้ม เญย เซียะ อ่า, เม่ย เหฑว่ย ไห่. เม่ย หฒะเก้ง! เหฑว่ย. เม่ย เญย มฒีง ฮนั้ง แปะ ก๊บ นอ.

16เยีย ฮนั้ม เญย ตอน อ้า! เม่ย เหฑว่ย ไห่, เม่ย หฒะเก้ง! เหฑว่ย. บัว เญย โหธว เซ เมี้ย-เญี์ยม.

17บัว เญย เปย๊า เญย ตู์ง-แฮ่ง เซ สีดา ฒ่ง เดี๋ยง. ฒ่ง เดี๋ยง โหฒว บัว เญย แซ่ง เซี้ยว.

Jump to: Chapter 2 →