Song of Solomon 5

Mien Bible (Thai Script) © Thailand Bible Society, 2007

← Chapter 4 Jump to: Chapter 6 →

1เยีย เญย หมั่ว, เยีย เญย เซียง-บวั์ง อ่า, เยีย เปียะ เยีย เญย หฮวีง, เยีย เซียว เยีย เญย มูหย่อ เหธา เยีย เญย ดาง เญย กะน้าย. เยีย หญั่น เยีย เญย เมว์ย-ต้อง เหธา เยีย เญย เมว์ย-เผง. เยีย ฮบ ลิ์ว เยีย เญย อะหงุ่น ติ๊ว เหธา ง่ง หญอ อ๊ะ. โอ อะหฑย่าว ต่อย อ้า! กุ๊น หญั่น กุ๊น ฮบ. โอ เม่ย บัว เหยียด ฒู้ง ฮนั้ม จ๋า เญย เมี่ยน อ่า, กุ๊น ฮบ เถา เป๊ว.

2เยีย มฌ่อม หมี่ อ๊ะ, มป่า เยีย เญย เฮญี้ยว กีง เจี๊ยน เญย. หมวัง ม่าะ! เยีย ฮนั้ม เญย เมี่ยน แง้ง แก้ง. เยีย เญย หมั่ว, เยีย ฮนั้ม เญย เซียะ, เยีย เญย เหนาะ โฆ, เยีย เญย ตุ้น ยุ่น เญย เมี่ยน อ้า! โท้ เถง เยีย คอย แก้ง เหว่ย หฒุ เยีย เญย มฆ้อง หฒุ บยู่ง-ซุ้ย ดอน เหฑ่ง, เยีย เญย บะเปยย หฒุ ลู่ง ม์วน หฒั่น เญย โหม่ว-เยี์ย ผิน ฮนัม.

3เยีย ไจ๊ ฆอย ลุย-โหว, เยีย ฮนั้ง หาย นอ แอ๋ง ไฮ่ ฒุ เจี๊ยน? เยีย หฑาว ลิ์ว เหฒา, เยีย เหว่ย หาย ติ่ว อ๋อย หฒุ แอ๋ง ปุน, เยีย เญย เหฒา ไล่ ฮลบ?

4เยีย ฮนั้ม เญย เมี่ยน ซูง นิ่น เญย ปั์ว เปียะ แก้ง ซอน เญย ค้วด, เยีย เญย เฮญี้ยว ไฮ์ อะเฮน้ย ไห่.

5เยีย เจี์ย ซิน ต้าย อ๋อย คอย แก้ง ปุน เยีย ฮนั้ม เญย เมี่ยน เปียะ. เยีย เญย ปั์ว ม่าย มูหย่อ เดี๊ยบ เหฌี่ย. เยีย เญย ปั์ว-โด๊ะ ม่าย มูหย่อ ววม เดี๊ยบ เจี๊ยน แกง-ซอน.

6เยีย เหว่ย เยีย ฮนั้ม เญย เมี่ยน คอย แก้ง. มป่า นิ่น มี่ง หมี่ อ๊ะ. นิ่น ก๊อง หว่า วั้ว หฒั่น เยีย เญย เฮญี้ยว ฒู้ง กัน นิ่น มี่ง. เยีย ล์อ นิ่น, มป่า ล์อ ไม้ ปวัด. เยีย เห่ว นิ่น, มป่า นิ่น ไม้ เตา.

7ฒั้ว ฒี่ง เญย เมี่ยน โย่ว เจี๊ยน ฒี่ง มี่ง นิ่น บัว ปวั้ง หฒุ เยีย. นิ่น บัว เบ๊าะ เยีย, ปุน เยีย หฒุ มุน. ฒั้ว ฒี่ง หลาด เญย เมี่ยน หย่า ธ้าง เยีย ปุ๋ย เญย ลุย-ด๊าว หมี่ อ๊ะ.

8โอ เยลูซาเลม เญย หฒวัง เซียะ อ้า! เยีย จา หว่า เม่ย บัว. สี ก๊อง เม่ย บัว ปวัด เยีย ฮนั้ม เญย ตอน, โท้ บั๋ว นิ่น, เหว่ย หฒุ เยีย ฮนั้ม เกา นิ่น, เป๋น แป่ง หมี่ อ๊ะ.

9โอ เยียม หฒวัง เซียะ บุด๋ง เก้า เหฑว่ย เจี๋ย เญย เซียะ อ่า, เม่ย ฮนั้ม วั้ว เต้า ม่าย หาย หญู่ง เก้า หลง กั้น เต้า? เม่ย ฮนั้ม วั้ว เต้า ม่าย หาย หญู่ง เก้า หลง กั้น เต้า เม่ย หธีง ต้าย ฮนั้ง น้าย นอ จา หว่า เยีย บัว?

10เยีย ฮนั้ม วั้ว เต้า เหฑว่ย แป๊ดๆ, เฒี่ยง ตุ๊ เฮ้น. เป๊ย เหยียด หว่าน เต้า นิ่น เก้า หลง เจี๋ย.

11นิ่น เญย มฆ้อง ฮนั้ง เฒียน เจี๋ย เญย เจียม, นิ่น เญย บะเปยย ญ้วดๆ, เจี๊ยะ เญย, ฮนั้ง เหนาะ อา.

12นิ่น เญย มฒีง ฮนั้ง เยียม ววม-เฮลน เญย แปะ ก๊บ, ฮนั้ง หล่ง ง่ง หญอ หฑาว หย่า ผุย ตุ๊ หอบ.

13นิ่น เญย ขัม-ปุย ฮนั้ง ฮูน หฒวัง ดาง เญย เมี้ย ปวั๊ง, นิ่น เญย ฑุ่ย เหมย ฮนั้ง แปะ เหาะ เปี้ยง เดี๊ยบ มูหย่อ ววม.

14นิ่น เญย ปั์ว ฮนั้ง เจียม-แกว๊ง, ตั้ง เจี๊ยน จ๋าย เญย, เหฑว่ย เญย กะน้าย. นิ่น เญย ซิน ฮนั้ง ติว ต้าย เญย ฒ์าง-ญ่า, ฒอง เจี๊ยน บั๊น บั๊ว, ฑัง เญย หละเปย๊ย-จ๋าย.

15นิ่น เญย เหฒา ฮนั้ง หละเปย๊ย-เมา เญย เดี้ยว, ตน เจี๊ยน เจียม-ท้าบ กู้ หงว่าย. นิ่น เญย ฝัง เฒ้ย ฮนั้ง เลบานอน บง, ฮนั้ง เก้า หลง เจี๋ย เญย สีดา ฒ่ง เดี๋ยง.

16นิ่น เญย หว่า หฒะเก้ง กาม ไห่, เฒี่ยง เต้า เมี่ยน ม่าย หยัวะ เฟย ฝัง. โอ เยลูซาเลม เญย หฒวัง เซียะ อ้า! น้าย เซ เยีย ฮนั้ม เญย เมี่ยน. น้าย เซ เยีย เญย ต่อย.

← Chapter 4 Jump to: Chapter 6 →