Amos 5

Javanese KJS17 (Kitab Jawa Suriname)

← Chapter 4 Jump to: Chapter 6 →

1Pada rungokna tembung sing tak utyapké kanggo kowé kabèh iki kanggo kidung pesambat, hé, turunané Israèl:

2“Putriné Israèl wis pada tiba, lan bakal ora ngadek menèh, ambruk ing lemahé, ora ana sing nangèkké.”

3Awit mengkéné tembungé Gusti Allah marang turunané Israèl: “Kuta sing ngluruk perang nggawa suradadu 1000, bakal kèri 100, lan sing ngluruk perang nggawa suradadu 100, bakal kèri sepuluh.”

4Awit mengkéné tembungé GUSTI marang turunané Israèl: “Kowé pada nggolèkana Aku, mesti bakal urip!

5Aja nggolèki marang Bétel, lan aja menyang Gilgal, lan ya aja mlaku menyang Bèrsyéba, awit Gilgal mesti bakal mlebu ing pembuwangan, lan Bétel bakal entèk.”

6Pada nggolèkana GUSTI, mesti bakal urip, supaya Panjenengané aja nganti nekani turunané Yosèf kaya geni, sing bakal mangan nganti entèk, Bétel ora ana sing nyirepké geni.

7Hé, para sing ngowahi keadilan dadi pait, lan sing mbanting kabenaran ing lemah!

8Panjenengané sing wis nggawé lintang-lintangé Wuluh lan lintang-lintangé Luku, sing ndadèkké pepeteng dadi ésuk mruput, lan sing ndadèkké awan dadi peteng kaya mbengi; Panjenengané sing nyeluk banyu segara, lan ngesokké kuwi marang ing nduwuré bumi, kuwi asmané disebut GUSTI.

9Panjenengané nibakké karusakan marang sing kuwat, nganti panggonan sing karo bèntèng ya kelakon dadi gempuran.

10Wong kuwi pada sengit marang sapa waé sing melèhké ing gapurané kuta, lan jelèh marang sing ngutyapké tembung-tembung karo éklas.

11Awit kowé pada ngidak-idak marang wong apes, lan jagungé kok pajeki, mulané senajan kowé wis pada nggawé omah watu tatahan, nanging kuwi bakal ora kowé sing ngenggoni; senajan kowé wis nggawé kebon anggur sing apik, nanging kowé ora bakal ngombé angguré.

12Awit Aku ngerti yèn okèh dosamu lan okèh tyatyahé dosamu, hé! kowé sing pada nggawé sumpekké atiné wong bener, lan sing pada nampani beselan, lan sing ngiwakké wong mlarat ing gapura.

13Mulané ing waktu kuwi, sapa sing nduwé pikiran bakal meneng waé, awit waktu kuwi waktu sing ala.

14Pada nggolèkana sing betyik aja sing ala, supaya kowé urip; uga GUSTI, Gusti Allah sing ngwasani langit lan bumi bakal nunggal karo kowé, kaya sing dadi tembungmu.

15Sing ala kuwi sengitana lan rumaketa marang kabetyikan, jejekna keadilan ing gapurané kuta, menawa GUSTI, Gusti Allah sing ngwasani langit lan bumi bakal gelem ngekèki kawelasan marang turahé turunané Yosèf.

16Lan GUSTI, Gusti Allahé sing ngwasani langit lan bumi, ya Gustiku, ngomong mengkéné: “Pesambat bakal dirungokké ing kabèh alon-alon; lan ing sak kabèhé sak uruté dalan wong bakal ngaduh-aduh: Oh, aku piyé, oh, aku piyé! Wong tani diundang supaya ngaduh-aduh, mengkono uga wong sing pinter nangis, supaya nganakké petangisan.

17Lan ing kebon-kebon anggur bakal ana pesambat, yèn Aku mlaku ing tengahmu,” mengkono tembungé GUSTI.

18Tyilaka wong sing pada ngarep-arep marang dinané GUSTI! Apa gunané dinané GUSTI kuwi kanggo kowé? Dina kuwi pepeteng, duduk pepadang!

19Upamané kaya wong sing mlayu sangka ngarepé singa, dadakan kepetuk karo bruwang, lan bareng tekan ing omahé, lan sèndèn ing témbok karo tangané ditèmplèkké, terus dityokot ula.

20Dinané GUSTI kuwi apa ora pepeteng, duduk pepadang, apa ora peteng ndedet tanpa semlorot?

21“Ing dina-dina riyayamu Tak sengiti, ya Tak rèmèhké. Aku ora seneng marang pasamuanmu gedé.

22Tenan, yèn kowé masrahaké marang Aku kurbanmu obongan, lan kurbanmu panganan, kuwi ora ndadèkké senengé ati-Ku, lan kurbanmu keslametan sing rupa pedèt lemu, kuwi ora Tak sawang.

23Nyanyianmu sing ramé kuwi adohna sangka ngarep-Ku, lan swarané siter Aku ora gelem ngrungokké.

24Nanging keadilan kuwi ngglundunga kaya banyu, lan sing bener kaya kali sing tansah mili.”

25“Hé, turunané Israèl. Ing ara-ara samun patang puluh taun suwéné kuwi apa kowé ngekèki kurban sing dibelèh lan kurban panganan marang Aku?

26Malah saiki kowé pada ngusung Sakut, retya ratumu lan Kéwan, retyamu lintang, retya-retyamu sing kowé nggawé.

27Mulané kowé bakal Tak buwang adoh ngliwati panggonané Damaskus,” mengkono tembungé GUSTI, sing asmané disebut Gusti Allah sing ngwasani langit lan bumi.

← Chapter 4 Jump to: Chapter 6 →