Amos 3

Институт перевода Библии, 2022

← Chapter 2 Jump to: Chapter 4 →

1Háy, Izrail xalqı, Jaratqan Iyeniń sózlerine qulaq salıń. Ol sizlerge, Mısırdan Ózi alıp shıqqan barlıq urıwıńızǵa qarsı bılay deydi:

2«Jer júzindegi barlıq xalıqlar arasınan, Tek ǵana sizlerdi tańlap aldım, Sonlıqtan sizlerdi hámme jınayatlarıńız ushın jazalayman».

3Óz ara kelisip almay turıp, eki adam birge jolǵa shıǵa ma?

4Oljası bolmasa, toǵayda arıslan aqıra ma? Uslaǵan hesh nársesi bolmasa, jırtqısh arıslan ininen dawıs shıǵara ma?

5Jerdegi duzaqqa jem qoyılmasa, Duzaqqa qus túse me? Duzaqqa hesh nárse túspese, Duzaqtıń jibi tartıla ma?

6Qalada qáwipli jaǵday sebepli kárnay shalınsa, Xalıqtı qorqınısh baspay ma? Jaratqan Iye jibermese, Qalaǵa apat kele me?

7Shınında, qulı payǵambarlarǵa Óz jobasın ashpay turıp, Quday Iye hesh nárse qılmaydı.

8Arıslan aqırǵanda, kim qorqpaydı? Quday Iye sóylegende, Kim payǵambarshılıq qılmaydı?

9Ashdod saraylarında járiyalań, Mısır saraylarında da bılay dep járiyalań: «Samariya tawlarında jıynalıń, Qalanıń ishindegi ullı tártipsizliklerdi, Ondaǵı eziwshiliklerdi kóriń.

10Olar ádalatlıqtı qalay islewdi bilmeydi, – deydi Jaratqan Iye, – Qorǵan qalalarında zulımlıq hám zorlıq jıynaydı».

11Sonıń ushın, Quday Iye bılay deydi: «Dushpan qorshap almaqta jerińdi, Kúsh-quwattan ayırıp seni, Qorǵan qalalarıńdı talan-taraj qıladı».

12Jaratqan Iye bılay deydi: «Bir shopan arıslannıń awzınan qoydıń eki tuyaǵın, Yamasa qulaǵınıń bir bólegin alıp qalǵanınday, Samariyada jasap atırǵan izraillılar da, Tóseginiń bir sheti hám juqa kórpesi menen ǵana aman qaladı.

13Qulaq salıń hám Yaqıptıń urpaqların eskertiń!» Quday Iye, Álemniń Qudayı bılay deydi:

14«Jınayatları sebepli Men Izraildı jazalaǵan kúni, Beyt-Eldiń qurbanlıq orınların joq qılaman, Kesilip jerge túsedi qurbanlıq orınnıń shaqları.

15Qısqı hám jazǵı saraylardı buzıp taslayman, Pil súyegi menen bezelgen saraylar wayran qılınadı, Kóp úyler joq boladı», – deydi Jaratqan Iye.

← Chapter 2 Jump to: Chapter 4 →