Amos 5

Институт перевода Библии, 2022

← Chapter 4 Jump to: Chapter 6 →

1Izrail xalqı, sizler haqqında aytatuǵın, Joqlaw jırıma qulaq salıń:

2«Qız Izrail jıǵıldı, Endi qaytıp tura almaydı, Ol jalǵız awnap jatır óz jerinde, Onı turǵızatuǵın hesh kim joq».

3Quday Iye bılay deydi: «Qaladan Izrail xalqınıń mıń jawıngeri shıqsa, Júz jawıngeri ǵana aman qaladı, Qaladan júz jawıngeri shıqsa, On jawıngeri ǵana aman qaladı».

4Sonıń ushın, Jaratqan Iye Izrail xalqına bılay deydi: «Maǵan qaytıń, sonda jasaysız,

5Beyt-Elge barmańlar, Gilgalǵa ayaq baspańlar, Beer-Shebaǵa ótip ketpeńler, Sebebi Gilgal xalqı sózsiz súrgin etiledi, Beyt-El hesh nárse bolmay qaladı».

6Jaratqan Iyeni izleń, sonda jasaysız, Bolmasa, Ol Yusuptiń xalqına qarsı ottay lawlaydı, Beyt-Eldi jaǵıp joq qıladı. Jalındı óshiretuǵın hesh kim bolmaydı.

7Háy, ádalattı ashshı juwsanǵa aylandırǵanlar, Haqlıqtı jerge urǵanlar!

8Úrker hám Orion juldız toparların jaratqannıń, Túpsiz qarańǵılıqtı tań nurına aylandırıp, Kúndizdi túndey qarańǵı qılǵannıń, Teńiz suwların shaqırıp, Jer júzine quyǵannıń atı Jaratqan Iyedur.

9Ol kúshlilerdi jıldırımday jıǵadı, Qorǵan qalanı jer menen jeksen qıladı.

10Sizler qala dárwazasındaǵı jıyında ádalatlı qazılardan jerkenesiz, Haqıyqattı sóylegenlerdi jaman kóresiz.

11Kámbaǵaldı ezesiz, Oǵan awır salıq salıp, biydayın tartıp alasız, Tastan jonıp úy salsańız da, onda jasay almaysız. Gózzal júzimzar otırǵızsańız da, onıń sharabın ishpeysiz.

12Jınayatlarıńız sózsiz kóp, Gúnalarıńız sansız ekenin bilemen. Haq adamdı jábirlep, para alasız, Qala dárwazasındaǵı húkim jıynalısı waqtında, Biysharanıń haqın jeysiz!

13Sonıń ushın, sonday zamanda, Aqıllı adam únsizlik saqlaydı, Sebebi bul jaman zamandur.

14Jamanlıqqa emes, jaqsılıqqa umtılıń, Sonda sizler jasaysız, Solay etip, ózlerińiz aytqanday, Jaratqan Iye, Álemniń Qudayı sizler menen birge boladı.

15Jamanlıqtı jek kóriń, Jaqsılıqtı súyiń, Qala dárwazasındaǵı húkim jıynalısında ádalattı tikleń. Múmkin, Jaratqan Iye, Álemniń Qudayı, Yusuptiń xalqınan aman qalǵanlarına rehim qılar.

16Sonlıqtan, Jaratqan Iye, Álemniń Qudayı, Iye bılay deydi: «Barlıq maydanlarda xalıq zar jılasadı, Barlıq kóshelerde olar way-way salısadı, Diyxanlardı aza tutıw ushın, Joqlaw aytatuǵınlardı jılaw ushın shaqıradı.

17Barlıq júzimzarlarda zar jılaw esitiledi, Óytkeni Men arańızdan ótemen». Bular Jaratqan Iyeniń sózleri.

18Jaratqan Iyeniń kúnin ańsap kútip atırǵanlar, hásiret shegesiz! Jaratqan Iyeniń húkim kúnin kútiwdiń ne keregi bar? Ol kún jaqtılıq emes, qarańǵılıq boladı.

19Sol kúni bir adam arıslannan qashsa, Aldınan ayıw shıqqanday bolar, Onnan da qashıp, úyine aman qaytsa, Qolı menen diywalǵa súyenip turǵanda, Onı jılan shaǵıp alǵanday bolar.

20Jaratqan Iyeniń kúni qarańǵılıq emes, jaqtılıq bola ma? Ol qoyıw qarańǵılıq, onda jaqtılıq joq.

21Jaratqan Iye bılay deydi: «Bayramlarıńızdı jek kóremen, Olardan jerkenemen, Xosh kórmeymen muxaddes jıynalıslarıńızdı.

22Jandırılatuǵın qurbanlıq hám ǵálle sadaqalarıńızdı, Maǵan usınsańız da, olardı qabıl etpeymen. Semirtilgen mallarıńızdan tatıwlıq qurbanlıqların berseńiz de, Men olarǵa názerimdi de salmayman.

23Uzaqlastırıń Mennen shawqımlı qosıqlarıńızdı, Tıńlamayman arfa menen shertken sazlarıńızdı.

24Onıń ornına ádalat aǵın suw sıyaqlı, Haqıyqatlıq máńgi aǵatuǵın dáryaday aǵıp tursın.

25Háy, Izrail xalqı, shólde qırıq jıl dawamında, Usınǵan qurbanlıqlar hám ǵálle sadaqalarıńız Maǵan ba edi?

26Patsha dep ataǵan Sakkut butın, Juldız qudayı dep ataǵan Kaywan músinin, Ózlerińiz ushın islep alǵan usı músinlerdi alıp júresiz.

27Damasktiń arǵı jaǵına sizlerdi jáne súrgin qılaman». Bular Jaratqan Iyeniń sózleri, Onıń atı – Jaratqan Iye, Álemniń Qudayı.

← Chapter 4 Jump to: Chapter 6 →