Amos 7

Институт перевода Библии, 2022

← Chapter 6 Jump to: Chapter 8 →

1Quday Iye maǵan mınanı kórsetti: patshaǵa tiyisli ot-shóp jıynap alınǵannan soń, jańadan shópler shıǵa baslaǵanda, Jaratqan Iye shegirtke úyirin payda qıldı.

2Shegirtkeler eldegi barlıq jasıl shóplerdi jep tawısqanda, men: – Quday Iye, ótinemen keshir! Yaqıp bunnan qalay aman qaladı? Ol júdá hálsiz xalıq! – dedim.

3Jaratqan Iye Óz ırayınan qayttı. – Bulay bolmaydı, – dedi Ol.

4Quday Iye jáne maǵan mınanı kórsetti: Quday Iye ot jawdırdı, ot tereń suwlardı jalmap tasladı hám jerdi jandıra basladı.

5Sonda men: – Quday Iye, ótinemen, toqtat! Yaqıp bunnan qalay aman qaladı? Ol júdá hálsiz xalıq! – dedim.

6Jaratqan Iye Óz ırayınan qayttı. – Bulay bolmaydı, – dedi Quday Iye.

7Basqa ayanda maǵan mınanı kórsetti: Iye bir ólshew jibin uslap, órilgen tik diywaldıń qasında turdı.

8Jaratqan Iye: – Ne kórip tursań, Amos? – dep soradı. Men: – Bir ólshew jibin, – dedim. Iye bılay dedi: – Mine, xalqım Izraildıń ortasına da bir ólshew jibin qoyaman. Endi artıq olardı keshirmeymen.

9Ísaq áwladınıń sıyınatuǵın orınları joq boladı, Izraildıń muxaddes orınları qıyratıladı, Qılısh jalańashlayman Yarobam násiline qarsı.

10Beyt-Eldegi ruwxaniy Amasiya Izrail patshası Yarobamǵa xabar jiberip, bılay dedi: «Amos Izrail xalqınıń arasında saǵan qarsı til biriktirip atır. Jer onıń sózlerin kótere almaydı.

11Sebebi Amos bılay dep atır: „Yarobam qılısh penen óltiriledi, Izrail óz jerinen alısqa, Sózsiz súrgin etip áketiledi“».

12Sonnan keyin, Amasiya Amosqa: – Háy, wáliy, bul jerden ketip, Yahudaǵa qash. Nanıńdı sol jerden tawıp, sol jerde payǵambarshılıq et.

13Endi artıq Beyt-Elde payǵambarshılıq qılma. Óytkeni bul jer patshanıń muxaddes jeri, patshalıqtıń ibadatxanası, – dedi.

14Amos oǵan bılay dep juwap berdi: – Men payǵambar da emespen, payǵambardıń shákirti de emespen. Men mal baǵıp, jabayı ánjir aǵashların ósiremen.

15Súriw baǵıp júrgenimde, Jaratqan Iye meni shaqırıp: «Bar, xalqım Izrailǵa payǵambarshılıq qıl», – dedi.

16Endi Jaratqan Iyeniń sózlerine qulaq sal. Sen: «Izrailǵa qarsı payǵambarshılıq qılma, Ísaq áwladına qarsı sóyleme!» – deyseń.

17Sonıń ushın, Jaratqan Iye bılay deydi: «Hayalıń qalada jezókshe boladı, Ul hám qızlarıń qılısh júzinen ótkiziledi. Jeriń ólshenip, basqalarǵa bólistirip beriledi, Al óziń haram sanalǵan bir jurtta óleseń. Izrail xalqı óz jerinen alısqa, Sózsiz súrgin etip áketiledi».

← Chapter 6 Jump to: Chapter 8 →