bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Karakalpak
/
Институт перевода Библии, 2022
/
Matthew 12
Matthew 12
Институт перевода Библии, 2022
← Chapter 11
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 13 →
1
Bir Shabbat kúni Iysa biyday atızınıń arasınan ótip baratır edi. Shákirtleri ash bolıp, biydaydıń masaqların úzip alıp jey basladı.
2
Bunı pariseyler kórip, Oǵan: – Qara, Seniń shákirtleriń Shabbat kúninde islewge bolmaytuǵın isti islep atır, – dedi.
3
Iysa olarǵa: – Ózi de, qasındaǵılar da ash bolǵanda, Dawıttıń ne islegenin sizler oqımaǵansızlar ma?
4
Ol Qudaydıń Úyine kirip, ruwxaniylerden basqa ózine de, qasındaǵılarǵa da jewge bolmaytuǵın, usınılǵan nanlardı jegen emes pe?
5
Shabbat kúninde ruwxaniyler Ibadatxanada Shabbat kúnine baylanıslı qaǵıydanı buzsa da gúnasız bolatuǵının Muxaddes Nızamda oqımaǵansızlar ma?
6
Sizlerge aytatuǵınım: bul jerde Ibadatxanadan da ullı Birew bar.
7
Eger sizler: «Men qurbanlıqtı emes, al miyrim-shápáátti qáleymen», – degen sózdiń mánisin túsingenińizde edi, gúnasızlardı ayıplamaǵan bolar edińiz.
8
Adam Ulı Shabbat kúniniń de iyesi, – dedi.
9
Iysa ol jerden ketip, olardıń májilisxanasına kirdi.
10
Sol jerde bir qolı láń adam bar edi. Pariseyler Iysanı ayıplamaqshı bolıp, Oǵan bılay dep soraw qoydı: – Shabbat kúninde awırıw adamǵa shıpa beriw nızamǵa tuwrı kele me?
11
Iysa olarǵa: – Sizlerdiń arańızdaǵı birińizdiń jalǵız ǵana qoyı bolsa, ol Shabbat kúni bir shuqırǵa túsip ketse, onı shıǵarıp almay ma?
12
Adam qoydan góre, anaǵurlım artıq emes pe? Demek, Shabbat kúni jaqsılıq islew nızamǵa tuwrı keledi, – dedi.
13
Sońınan Ol qolı láń adamǵa: – Qolıńdı soz! – dedi. Adam qolın sozǵanda, ekinshisindey sap-saw bolıp qaldı.
14
Sonda pariseyler sırtqa shıǵıp, Iysanı joq qılıw tuwralı til biriktire basladı.
15
Biraq Iysa bunı bilip, sol jerden ketip qaldı. Onıń izine kóp xalıq erip júrdi. Ol awırıwlardıń hámmesine shıpa berip,
16
Óziniń kim ekenligin ashıq aytıwdı olarǵa qadaǵan etetuǵın edi.
17
Bul Qudaydıń Iyshaya payǵambar arqalı aytqan sózleriniń orınlanıwı ushın boldı:
18
«Bul – tańlap alǵan Qulım, Kewlim unatqan Súyiklim. Men Óz Ruwxımdı Oǵan beremen. Ol hámme milletlerge ádalattı járiyalaydı.
19
Tartıspaydı da, baqırmaydı da, Kóshelerde Onıń sesti esitilmeydi.
20
Ádalat jeńiske erispegenshe, Ol mayısqan qamıstı sındırmaydı, Pısqıp turǵan pilikti de óshirmeydi.
21
Xalıqlar Onıń atına úmit baylaydı».
22
Sol waqıtta adamlar Iysaǵa jin urıp, gúń hám soqır bolǵan adamdı alıp keldi. Iysa oǵan shıpa bergenlikten, gúń-soqırdıń kózi ashılıp, sóyley basladı.
23
Adamlardıń hámmesi qattı tań qalısıp: – Dawıttıń Urpaǵı – Usı emes pe eken? – desti.
24
Bunı esitken pariseyler: – Ol jinlerdi tek jinlerdiń baslıǵı Belzebúl-shaytannıń kúshi menen ǵana quwıp shıǵarıp júr, – dedi.
25
Al Iysa olardıń oyların bilip, bılay dedi: – Óz ara qarsı bolıp bólingen hár bir patshalıq joq boladı, óz ara qarsı bolıp bólingen hár bir qala yamasa úy qulaydı.
26
Al eger shaytan ózin ózi quwıp shıǵarsa, onda onıń óz ara qarsı bolıp bólingeni boladı. Olay bolsa, onıń patshalıǵı qalay saqlanadı?
27
Eger Men jinlerdi Belzebúl-shaytannıń kúshi menen quwıp shıǵarıp júrgen bolsam, onda sizlerdiń shákirtlerińiz olardı kimniń kúshi menen quwıp shıǵarıp júr? Solay etip, olar sizlerdiń nadurıs ekenińizdi áshkaralaydı.
28
Biraq Men jinlerdi Qudaydıń Ruwxı menen quwıp shıǵarıp atırǵan bolsam, onda sizlerge Qudaydıń Patshalıǵınıń jetip kelgeni.
29
Kim dáslep kúshli adamdı baylap taslamay turıp, onıń úyine kirip, mal-múlkin tartıp ákete aladı? Tek onı baylaǵannan keyin ǵana onıń úyin tonay aladı.
30
Kim de kim Meniń menen birge bolmasa, ol Maǵan qarsı. Kim de kim Meniń menen birge jıynamasa, ol shashadı.
31
Sonlıqtan sizlerge aytatuǵınım: adamlar hár qanday gúna islese de, Qudayǵa til tiygizse de keshiriledi, biraq Muxaddes Ruwxqa til tiygizse, keshirilmeydi.
32
Kim de kim Adam Ulına qarsı bir sóz aytsa, keshiriledi, biraq Muxaddes Ruwxqa qarsı sóylegen házir de, keleshekte de keshirilmeydi.
33
Terekti jaqsı dep sanasańlar, miywesin de jaqsı dep sanańlar, al terekti jaman dep sanasańlar, miywesin de jaman dep sanańlar. Sebebi terek miywesinen bilinedi.
34
Háy, uwlı jılanlardıń tuqımları! Sizler ózlerińiz jaman bola tura, qalay jaqsı sózler sóyley alasızlar? Adamnıń kewli nege tolıp tassa, awzınan sol shıǵadı.
35
Jaqsı adam kewlindegi jaqsılıq ǵáziynesinen jaqsılıq shıǵaradı, al jaman adam kewlindegi jamanlıq ǵáziynesinen jamanlıq shıǵaradı.
36
Sizlerge aytatuǵınım mınaw: adamlar aytqan hár bir bos sózi ushın húkim shıǵarılatuǵın qıyamet-qayım kúninde juwap beriwi shárt.
37
Óytkeni sen óz sózleriń menen aqlanasań da, óz sózleriń ushın ayıplanasań da.
38
Sonda diniy muǵallimler menen pariseylerdiń geybirewleri Iysaǵa: – Ustaz! Seni Qudaydıń jibergenligin dálilleytuǵın káramatlı belgi kórsetiwińdi qáleymiz, – dedi.
39
Biraq Iysa olarǵa bılay dep juwap qaytardı: – Jaman hám opasız áwlad káramatlı belgi talap etpekte. Biraq oǵan Yunus payǵambardıń káramatlı belgisinen basqası kórsetilmeydi.
40
Yunustıń úlken balıqtıń ishinde úsh kún, úsh tún bolǵanınday, Adam Ulı da jer qoynında úsh kún, úsh tún boladı.
41
Nineviya turǵınları húkim shıǵarılatuǵın qıyamet-qayım kúni usı áwlad penen birge ornınan turıp, bul áwladtıń adamların ayıplaydı. Óytkeni Yunus járiyalaǵanda, olar táwbe etti. Biraq bul jerde Yunustan da ullı Birew bar.
42
Qubladaǵı hayal patsha húkim shıǵarılatuǵın qıyamet-qayım kúni usı áwlad penen birge ornınan turıp, bul áwladtıń adamların ayıplaydı. Sebebi ol Sulaymannıń danalıǵın esitiw ushın, jer betiniń arǵı shetinen kelgen edi. Biraq bul jerde Sulaymannan da ullı Birew bar.
43
– Jawız ruwx adamnan shıqqannan keyin suwsız jerlerdi gezip, dem alıwǵa orın izleydi, biraq taba almaydı.
44
Sonda ol ózine: «Shıqqan úyime qaytayın», – deydi hám qaytıp kelgende, úydiń bos bolıp, tazalanıp hám jıynalıp turǵanın kóredi.
45
Sonda ol barıp, ózinen de jawız jeti ruwxtı ertip keledi de, kirip sol úyde turadı. Solay etip, sol adamnıń sońǵı awhalı burınǵıdan da jaman boladı. Bul jaman áwladqa da sonday boladı!
46
Iysa xalıqqa sóylep turǵanda, anası hám tuwısqanları keldi. Olar sırtta turıp, Onıń menen sóylespekshi boldı.
47
Sonda birew Oǵan: – Anań menen tuwısqanlarıń Seniń menen sóylespekshi bolıp, sırtta turıptı, – dedi.
48
Ol bunı aytqan adamǵa qarap: – Meniń anam kim, tuwısqanlarım kimler? – dedi de,
49
Óziniń shákirtlerin qolı menen kórsetip bılay dedi: – Mine, Meniń anam hám tuwısqanlarım!
50
Sebebi kim de kim Meniń aspandaǵı Ákemniń erkin orınlasa, Meniń tuwısqanım da, anam da – sol.
← Chapter 11
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 13 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25
26
27
28