Zechariah 10

Институт перевода Библии, 2022

← Chapter 9 Jump to: Chapter 11 →

1Erte báhárde Jaratqan Iyeden jawın tileń, Jawın bultların jiberetuǵın, Adamlarǵa jawın jawdıratuǵın, Dalalarda ósimlik ósiretuǵın Jaratqan Iye boladı.

2Kiyeli músinlerdiń sóyleytuǵını ótirik, Palkerlerdiń ashqan palı jalǵan, Olar kórmegen túslerin jalǵannan toqıydı, Paydası joq jubanısh sózlerin aytadı. Sonıń ushın, bul xalıq súriwdey gezip júr, Shopansız bolǵanı ushın azap shegip atır.

3Jaratqan Iye bılay deydi: «Ǵázebim shopanlarǵa qarsı lawladı, Jolbasshılardı jazalayman. Álemniń Jaratqan Iyesi bolǵan Men Óz súriwime, Yahuda xalqına ǵamxorlıq qılaman. Olardı ájayıp sawash atı sıyaqlı qılaman.

4Kúshli múyesh tası, shatırdıń qazıǵı hám sawash quralınday, Barlıq basshılar Yahudadan shıǵadı.

5Olar sawashta kóshedegi batpaqtı basqılaǵan jawıngerlerdey boladı, Jaratqan Iye, Men olar menen birge bolǵanım ushın, Olar urısqa shıǵıp, Dushpanınıń atlıların shermende qıladı.

6Yahuda xalqın kúsheytemen, Yusup áwladın qutqaraman, Olarǵa rehim qılaman, Súrginnen qaytarıp alıp kelemen. Men olardan hesh qashan júz burmaǵanımday boladı, Sebebi Men olardıń Qudayı Jaratqan Iyemen, Olarǵa qulaq salaman.

7Efrayım xalqı batır jawıngerlerdey boladı, Sharap iship alǵanday, júrekleri yoshadı. Balaları bunı kórip, shadlanadı, Júrekleri Jaratqan Iyede shadlanadı.

8Shopanday shaqırıp, olardı jıynayman, Men olardı azat qılaman. Burınǵıday, olar jáne kóbeyedi.

9Olardı xalıqlardıń arasına tarqatıp jibersem de, Uzaq jerlerde Meni esleydi, Balaları menen birge aman qalıp, qaytıp keledi.

10Olardı Mısırdan qaytarıp alıp shıǵaman, Assiriya jerinen jıynap alaman. Olar kóbeygenlikten, óz elindegi jerlerge sıymaydı, Sonıń ushın, olardı Giladqa hám Lebanonǵa alıp kelemen.

11Xalqım apat teńizinen ótedi, Olar teńizdiń tolqınların tınıshlandıradı, Nil dáryasınıń túbi qurıp qaladı. Assiriyanıń tákabbirligi basıladı, Mısır patshalıq hasasınan ayırıladı.

12Xalqımdı Óz kúshim menen qúdiretli qılaman, Olar Meniń atım menen júredi». Bular Jaratqan Iyeniń sózi.

← Chapter 9 Jump to: Chapter 11 →