Zechariah 9

Институт перевода Библии, 2022

← Chapter 8 Jump to: Chapter 10 →

1Payǵambarshılıq sóz. Jaratqan Iyeniń sózi Xadrax jurtına, ásirese Damask qalasına qaratılǵan: Insanlardıń hám Izrail urıwlarınıń kózi Jaratqan Iyede.

2Bul sóz Xadrax penen shegaralas Xamatqa, Uqıplılarǵa tolı bolsa da, Tir hám Sidon qalalarına da qaratıladı.

3Tir ózine bir qorǵan qurdı, Gúmisti topıraqtay etip, Altındı daladaǵı qumday etip úydi.

4Degen menen, Iye onıń mal-dúnyasın alıp qoyadı, Baylıǵın teńizge ılaqtıradı, Qalanı bolsa, ot jalmaydı.

5Ashkelon bunı kórip, zárresi ushadı, Gaza da qorqınıshqa túsip, qaltıraydı, Usı awhalǵa túsken Ekron úmiti sónedi. Gaza óz patshasınan ayırıladı, Ashkelon qańırap bosap qaladı.

6Jaratqan Iye bılay deydi: «Ashdodta qanı aralas xalıq jasaydı, Filist xalqınıń tákabbirligine shek qoyaman.

7Men olardıń awızlarınan qanlı góshti, Tisleriniń arasınan haram awqatlardı alıp taslayman. Aman qalǵanları bolsa, Qudayǵa, Maǵan tiyisli boladı, Yahuda urıwınıń bir bólegine aylanadı. Ekron qalası ebus xalqı sıyaqlı Meniki boladı.

8Úyimniń dógeregine orda quraman, Basqınshılardan qorǵayman. Meniń Ózim onı baqlap turǵanım ushın, Hesh kim xalqımnıń jerine qarsı júre almaydı».

9«Háy, qız Sion, qattı shadlan! Háy, qız Erusalim, bálent dawısta shadlan! Mine, patshań saǵan kiyatır! Ol ádil, jeńimpaz hám kishipeyil. Eshekke, jas eshekke, Gúrrege minip saǵan kiyatır!

10Efrayımnan sawash arbaların, Erusalimnen atlardı alıp taslayman. Sawash sadaqları joq qılınadı, Patshańız xalıqlarǵa tınıshlıq járiyalaydı, Onıń húkimdarlıǵı teńizden teńizge, Evfrat dáryasınan dúnyanıń shetine deyin sozıladı».

11«Sion, sizlerge kelsek, qurbanlıq qanı menen bekitken kelisimim sebepli, Tutqındaǵı xalqıńızdı suwsız qudıq ishinen azat etemen.

12Háy, úmit etken tutqınlar, Qorǵanıńızǵa qaytıń. Búgin Men sizlerge aytaman, Joytqanlarıńızdı eki ese etip qaytaraman.

13Yahudanı sadaǵım sıyaqlı, Efrayımdı oq sıyaqlı qollanaman. Háy, Sion, seni qılıshtay etip qollanaman, Yawan xalqına qarsı qozǵayman».

14Sonda Jaratqan Iye Óz xalqınıń ústinde payda boladı, Onıń oǵı shaqmaqtay shaǵadı. Quday Iye kárnay shaladı, Qubla dawılları menen hújim qıladı.

15Álemniń Jaratqan Iyesi Óz xalqın qorǵaydı, Xalıq óz dushpanların joq qıladı, Saqpan tasları menen jeńiske erisedi. Olar sharap ishken máskúnemlerdey baqıradı, Olar qurbanlıq qanın serpiwge arnalǵan tabaqtay, Qurbanlıq orınnıń tórt múyeshindey qanǵa tolı boladı.

16Sol kúni olardıń Qudayı Jaratqan Iye, Shopan óz súriwin saqlaǵanday etip, olardı qorǵaydı. Onıń elinde olar taj gáwharınday jarqıraydı.

17Bul qanday ájayıp hám gózzal boladı! Jas jigit hám qızlar, Dán menen sharaptıń molshılıǵınan gúllep jasnaydı.

← Chapter 8 Jump to: Chapter 10 →