Zechariah 6

Институт перевода Библии, 2022

← Chapter 5 Jump to: Chapter 7 →

1Men jáne názer taslaǵanımda, eki qola tawdıń arasınan shıǵıp kiyatırǵan tórt sawash arbasın kórdim.

2Birinshi sawash arba qızıl atlarǵa, ekinshisi qara atlarǵa,

3úshinshisi aq atlarǵa, tórtinshisi ala-shubar atlarǵa jegilgen edi. Bul atlardıń hámmesi kúshli edi.

4Men ózim menen sóylesip turǵan perishteden: – Mırzam, bular ne? – dep soradım.

5Perishte bılay dep juwap berdi: – Bular kóktegi tórt samal. Olar pútkil dúnyanıń Iyesiniń dárgayında bolǵannan keyin, aylanıwǵa shıǵadı.

6Qara atlarǵa jegilgen sawash arbası arqaǵa, aq atlarǵa jegilgen arba onıń izinen baradı, al ala-shubar atlarǵa jegilgen arba qublaǵa ketedi.

7Sol kúshli atlar jolǵa shıǵıp, jer júzin aylanıp shıǵıwǵa asıqtı. Perishte olarǵa: – Barıńlar, jer júzin aylanıp shıǵıńlar, – dedi. Sonda olar aylanıp shıǵıwǵa ketti.

8Keyin perishte maǵan dawıslap: – Qara! Atlar arqadaǵı elge bardı. Ol jerde Jaratqan Iyeniń erkin orınladı, Jaratqan Iye ǵázepten qayttı, – dedi.

9Jaratqan Iyeden maǵan tómendegi sóz tústi:

10– Babiloniya súrgininen qaytıp kelgen Xelday, Tobiya hám Edayadan sawǵaların alıp, sol kúni-aq, Sefaniya ulı Ioshiyanıń úyine bar.

11Berilgen gúmis hám altınnan taj soǵıp, onı Iosadaq ulı bas ruwxaniy Eshuanıń basına kiygiz.

12Oǵan bılay dep ayt: «Álemniń Jaratqan Iyesi bılay deydi: Mine, Shaqa degen adam! Ol turǵan jerinen shaqalap, Meniń Ibadatxanamdı quradı.

13Awa, Jaratqan Iyeniń, yaǵnıy Meniń Ibadatxanamdı quratuǵın ol boladı. Ol ullılıqqa bólenedi, taxtında otırıp, húkimdarlıq qıladı. Ruwxaniy de óz taxtında otıradı, ekewiniń arasında birlik ornaydı».

14Bul taj Xelem, Tobiya, Edaya hám Sefaniya ulı Xenniń ǵamxorlıǵına tapsırılıp, Jaratqan Iyeniń, yaǵnıy Meniń Ibadatxanamda estelik bolıp qaladı.

15Uzaqta jasaytuǵınlar kelip, Jaratqan Iyeniń Ibadatxanasınıń qurılısına qatnasadı. Solay etip, meni sizlerge Álemniń Jaratqan Iyesiniń jibergenin bilip alasız. Eger Qudayıńız Jaratqan Iyeniń sózlerin buljıtpay orınlasańız, usılardıń hámmesi orınlanadı.

← Chapter 5 Jump to: Chapter 7 →