Zephaniah 1

Институт перевода Библии, 2022

Jump to: Chapter 2 →

1Yahuda patshası Amon ulı Ioshiya dáwirinde Xizkiya áwladınan bolǵan Kushiydiń ulı, Gedaliyanıń aqlıǵı, Amariyanıń shawlıǵı Sefaniyaǵa Jaratqan Iyeden sóz tústi.

2«Jer júzinen hámme nárseni sıpırıp taslayman, – deydi Jaratqan Iye, –

3Adamlardı, haywanlardı, Aspandaǵı quslardı, teńizdegi balıqlardı, Azǵıratuǵın zatlardı hám jawız adamlardı sıpırıp taslayman. Joq etemen jer júzinen adamzattı, – deydi Jaratqan Iye. –

4Men Yahudaǵa hám Erusalim turǵınlarına qarsı qol kóteremen. Baalǵa tabınıwshılıqtıń izlerin, But ruwxaniyleriniń hám Óz ruwxaniylerimniń atların óshiremen.

5Tamǵa shıǵıp, aspan denelerine tabınıp turıp, Maǵan da sıyınatuǵınlardı, Meniń aldımda ant iship turıp, Molox haqı da ant ishetuǵınlardı joq qılaman.

6Olar Mennen júz burdı, izimnen júrmedi, Mennen járdem de, jol-jorıq ta sorawdı qálemeydi».

7Quday Iyeniń aldında únsizlik saqlań, Óytkeni Onıń húkim kúni jaqınlastı. Jaratqan Iye qurbanlıq asın tayarlap, Miymanların mirát etti.

8Jaratqan Iye bılay deydi: «Sol qurbanlıq kúni, Hámeldarlardı, patsha ulların, Jat xalıqtıń kiyimlerin kiygenlerdiń hámmesin jazalayman.

9Bosaǵadan atlap ótetuǵınlardı, Zorlıq hám aldaw jolı menen, Xojayınlarınıń úylerin baylıqqa toltırǵanlardı, Sol kúni jazalayman».

10Jaratqan Iye bılay deydi: «Sol kúni Erusalimniń Balıq dárwazasınan dad, Qalanıń taza bóliminen páriyad, Tóbeshiklerden kúshli wayrangershilik dawısı esitiledi.

11Qalanıń bazar tárepinde jasaytuǵınlar, páriyad shegiń. Barlıq sawdagerlerińiz joq boladı, Aldı-sattı qılatuǵınlar qırıp taslanadı.

12Sol kúni shıra menen Erusalimdi aralap izleymen, „Jaratqan Iyeniń qolınan jaqsılıq ta, jamanlıq ta kelmeydi“, – dep, Ózlerinshe oylaǵanlardı, Ómirden zawıqlanıp, biyǵam júrgenlerdi jazalayman.

13Olardıń baylıǵı talan-taraj bolıp, Úyleri wayran etip buzıladı. Qurǵan úylerinde jasamaydı, Tikken júzimzarlarınıń sharabınan ishpeydi».

14Jaratqan Iyeniń ullı húkim kúni jaqınlastı, Az qaldı, ol júdá tez kiyatır. Qulaq salıń! Jaratqan Iyeniń kúni keldi, Jawıngerlerdiń dawısı ashshı boladı.

15Sol kún Qudaydıń ǵázep kúni! Qayǵı hám azap kún, Qıyraw hám apat kún, Tas túnek hám qarańǵı kún, Bultlı hám gúńgirtli kún boladı.

16Sol kúni sawash kárnayları shalınıp, sawash dawısları shıǵadı, Qorǵanlı qalalar menen minaralarǵa qarsı shabıwıl jasaladı.

17Jaratqan Iye bılay deydi: «Adamlardıń basına apat keltiremen, Soqır adamday olar súrnigedi, Sebebi olar Maǵan qarsı gúna isledi. Olardıń qanı suwday aǵadı, Deneleri jerde qıy sıyaqlı shashılıp jatadı».

18Jaratqan Iyeniń ǵázep kúni, Gúmis hám altınları olardı qutqara almaydı. Jaratqan Iyeniń qızǵanısh otı pútkil dúnyanı jandırıp, joq qıladı. Jaratqan Iye jer júzinde jasap atırǵanlardıń hámmesin, Qorqınıshlı tárizde qıyratadı.

Jump to: Chapter 2 →