Zephaniah 2

Институт перевода Библии, 2022

← Chapter 1 Jump to: Chapter 3 →

1Háy, arsız xalıq! Órteliw ushın jıynalǵan saban sıyaqlı toplanıńlar!

2Qudaydıń pármanı orınlansa, Táwbe qılıw múmkinshiligińiz samal ushırǵan qawıqtay joq boladı. Sonlıqtan Jaratqan Iyeniń lawlaǵan ǵázebine ushıramasıńızdan aldın, Jaratqan Iyeniń ǵázep kúni kelmesinen aldın, esińizdi jıynap alıń!

3Háy, Jaratqan Iyeniń nızamlarına ámel qılatuǵınlar, Eldegi barlıq kishipeyilliler, Jaratqan Iyege keliń. Haq hám kishipeyil bolıwǵa umtılıń. Sonda Jaratqan Iyeniń ǵázep kúninde aman saqlanıwıńız múmkin.

4Gaza qalası qańırap, bosap qaladı, Ashkelon qalası qarabaqanaǵa aylanadı, Ashdod turǵınları túske deyin quwıp shıǵarıladı, Ekron qalası túp-tamırı menen joq qılınadı.

5Kritten kelip, teńiz boyında jasap atırǵanlar, hásiret shegesiz! Háy, filistlerdiń jeri Qanan, Jaratqan Iyeniń saǵan qarsı húkimi mınaday: «Men seni birde bir turǵınıń qalmaǵansha, qırıp taslayman».

6Teńiz boyındaǵı elińiz, Qoy-eshkilerdiń jaylawlarına, Súriwlerdiń qoralarına aylanadı.

7Yahuda xalqınıń aman qalǵanları sol elge iyelik qıladı, Ol jerde súriwlerin otlatadı, Ashkelondaǵı úylerde túneydi. Óytkeni Qudayı Jaratqan Iye olarǵa ǵamxorlıq qıladı, Burınǵı abadanshılıǵına eristiredi.

8«Men moablılardıń kemsitken mısqıllı sózlerin, Ammon xalqınıń mazaq sózlerin esittim. Olar Meniń xalqımdı ayaq astı qılıp, Xalqımnıń jerine kóz alayttırǵanın esittim.

9Sonlıqtan, tiriligim haqı ant ishemen, – deydi Izraildıń Qudayı, Álemniń Jaratqan Iyesi, – Moab eli Sodom, ammon xalqınıń eli Gomora sıyaqlı bolıp qaladı. Sonda olardı jabayı shópler qaplap, Duzlı shuqırlarǵa tolıp ketedi, Máńgi qańıraǵan elsiz dalaǵa aylanadı. Xalqımnıń aman qalǵanları olardı tonaydı, Yahudada aman qalǵanları olardıń jerlerin múlik etip aladı».

10Olardıń menmenlikleri ushın, Álemniń Jaratqan Iyesiniń xalqın ayaq astı qılıp, Olardıń jerine kóz alayttırǵanı ushın, Usı apatlar olardıń basına túsedi.

11Jaratqan Iye olarǵa qarsı aybat qıladı, Jer júzindegi barlıq qudaylardı qurtadı. Teńiz jaǵalarındaǵı barlıq milletler, Óz ellerinde Jaratqan Iyege sıyınadı.

12«Háy, xabashstanlılar, Sizler de Meniń qılıshımnan ólesiz», – deydi Jaratqan Iye.

13Jaratqan Iye arqa tárepke qarsı qol kóterip, Assiriyanı joq qıladı. Nineviya qalasın wayran qıladı, Onı suwsız shólge aylandıradı.

14Onıń ortası súriwlerdiń, Hár túrli jabayı haywanlardıń jatatuǵın ornı boladı. Sútinlerdiń joqarısında uzaqsha hám bayıwlılar uyıqlaydı, Aynalardan olardıń dawısı shıǵadı. Qulatılǵan tasları bosaǵalarında úyilip qaladı, Tek ǵana kedr aǵashları qaladı.

15Mine, tınıshlıq ishinde jasaǵan maqtanshaq qala, «Maǵan teńlese alatuǵını joq», – dep ózinshe aytqan edi. Al endi bolsa, ol wayran boldı, Jabayı haywanlardıń mákanına aylandı. Janınan ótken-ketkenler, Kórgenlerine qolların shoshaytıp, tabalap ketedi.

← Chapter 1 Jump to: Chapter 3 →