2 Chronicles 17

Jinghpaw Common Language Bible © Bible Society of Myanmar, 2009

← Chapter 16 Jump to: Chapter 18 →

1Yehoshahpat gaw shi a kawa Asa a hkang hta hkawhkam tai wa nhtawm Israela hpe ninghkap lu hkra nga, shi a daru magam ahkang aya n-gun da ting da wu ai.

2Shi gaw Yuda mung na bunghku kum ai mare ni hta mung, Yuda mung shara shagu hkan mung, Asa e gasat dang da ai Ehprim mung na mare ni hta mung hpyen hpung ni hpe jahkrat tawn da wu ai.

3Yehoshahpat gaw shi kawa a shawng daw na asak hkrun lam a kasi hkan nna Bala n nawku wu ai majaw dai Madu shi hpe shaman ya nga ai.

4Shi gaw Israela hkawhkam ni galaw ai zawn n hkan galaw ai sha shi kawa a Karai Kasang hpe daw jau nhtawm Karai Kasang a hkang da ai ga ni hpe madat mara wu ai.

5Yuda mungdan hpe ngang ngang up hkang lu na ahkang, dai Madu gaw Yehoshahpat hpe jaw ya wu ai. Amyu masha ni yawng mung shi a matu kumhpa ni la sa ya mu ai majaw sut su wa nna arawng sadang shagrau shatsaw ai hkrum wu ai.

6Shi gaw dai Madu hpe nawku daw jau ai amu hta awng sharawng nga ai rai nna, tara maigan masha ni a nawku shara ni yawng hte Yuda mung na Ashera karai num a hkrang sumla ni hpe sharun jahten kau wu ai.

7Shi hkaw dung ai masum ning hta shi gaw Yuda mare ni hta sharin achyin ya na matu Benhaila, Obadia, Zehkaria, Nehtanela hte Mihka ngu ai du salang ni hpe shangun dat wu ai.

8Shanhte hte rau Lewi masha jahku hte hkinjawng lahkawng mung hkan nang nga ma ai. Lewi masha ni gaw Shemaia, Nehtania, Zebadia, Asahela, Shemiramot, Yonahtan, Adoniya, Tobiya, Tobadoni hte hkinjawng lahkawng gaw Elishama hte Yehoram ni rai ma ai.

9Shanhte gaw dai Madu a Tara laika la lang nhtawm Yuda mung ting na mare ni de jawt hkawm let amyu masha ni hpe sharin achyin ya ma ai.

10Dai Madu gaw grup yin mungdan ni yawng, Hkawhkam Yehoshahpat hpe majan n pru gasat gwi mat hkra hkrit gari shangun wu ai.

11Hpilisti masha nkau mi mung Yehoshahpat hpang de gumhpraw hte kaga kumhpa law law sa sak jaw ma ai; Arab masha ni mung sagu 7,700 hte bainam 7,700 sa sak jaw ma ai.

12Dai rai nna Yehoshahpat gaw grau grau daru magam n-gun ja wa wu ai. Yuda mung ting hta ngang ai hpyen dap ni hte

13sut rai law law tawn da ai mare ni hpe de da nga ai. Shi gaw Yerusalem mare hta gumhkawng ai du salang ni hpe tawn da nhtawm,

14shanhte a dap lakung hte maren, Adna gaw Yuda amyu lakung ni a hpyen hpung hpe up hkang nga ai wa rai nna shi a npu hta hpyenla 300,000 nga nga ai.

15Lahkawng ngu na arawng kaba lu ai wa gaw Yehohanan rai nga ai; shi hta hpyenla 280,000 rawng nga ai.

16Masum ngu na Zihkri a kasha Amasia rai nna shi hte rau hpyenla 200,000 lawm nga ai. (Amasia chyawm gaw shi a myit hku dai Madu hpe daw jau yu nu ai.)

17Benyamin amyu lakung ni hta na hpyen hpung ni hpe up hkang ai wa gaw Eliada rai nna ndan hte ninggang lang ai hpyenla 200,000 hte hpe up hkang nna gumhkawng ai hpyenla wa rai nga ai.

18Shi a lawu hprut re ai up hkang du gaw Yehozaba rai nna majan gasat na matu jin jin rai hpyen hking sumraw da ai masha 180,000 mung lawm nga ai.

19Ndai masha ni gaw Yerusalem mare hta hkawhkam wa hpe daw jau ma ai; dai sha n-ga, shi gaw kaga hpyenla ni hpe Yuda mung na bunghku kum ai kaga mare ni hkan tawn da wu ai.

← Chapter 16 Jump to: Chapter 18 →