2 Chronicles 20

Jinghpaw Common Language Bible © Bible Society of Myanmar, 2009

← Chapter 19 Jump to: Chapter 21 →

1Ya aten ram ram na ai hpang, Moba hte Amon hpyen luksuk ni gaw shanhte a myit hkrum manang Meuni masha ni hte rau Yuda mung hpe shang gasat ma ai.

2Dat kasa nkau mi gaw Hkawhkam Yehoshahpat kaw sa nna ning ngu nna tsun ndau ma ai: “Jum Nawng a wora hkran, Edom mung na hpyen luksuk kaba gaw nang hpe sa gasat na matu du sa wa mara ai. Shanhte gaw Hazazon Tama mare hpe mung gasat dang la kau manu ai.” (Dai gaw Engedi hpe tsun ai kaga mying langai rai nga ai.)

3Yehoshahpat chyawm gaw hkrit kahpra ai hte lam madun la na matu dai Madu kaw akyu hpyi wu ai. Dai hpang Yuda mungdan ting lusha gam na matu hkang dat wu ai.

4Yuda mung mare shagu na masha ni gaw lam madun la na matu dai Madu kaw hpyi nem na nga, Yerusalem de tin tin sa wa shajang ma ai rai nna,

5shanhte hte Yerusalem mare masha ni gaw Nawku Htingnu a wang nnan hta sa hpawng nga ma ai. Shaloi Yehoshahpat gaw shanhte a man e sa tsap let,

6“O Madu anhte a kaji kawa ni a Karai Kasang e, nang gaw mungkan ga na amyu baw ni yawng hpe sumsing lamu kaw nna up hkang nga ndai. Nang gaw daru magam n-gun hte chyalai n-gun hpring nga ndai majaw kadai mung nang hpe n lu ninghkap lu nga ai.

7Nang gaw anhte a Karai Kasang rai nga ndai; na a amyu masha Israela ni ndai mung de shang bang wa ma yang, ndai mung e nga nga ai masha ni hpe nang shaden kau nhtawm na a jinghku Abraham a amyu matu mara ni hpe htani htana shanhte a mung tai nga na matu nang jaw da nit dai.

8Shanhte mung ndai mung ga e nga nga nna nang hpe shagrau sha-a na matu Nawku Htingnu langai gaw gap da nga ma ai.

9Shanhte hpe hpyen majan, ana zinli hte hkuwa wa shangun ai hku ari jaw let ru yak shoihpa jahkrum yang, ndai nang hpe nawku ai Nawku Htingnu a man de shanhte sa tsap let shanhte a tsin-yam tsindam hkrum sha ai hta nang kaw akyu hpyi ma ai shaloi, shanhte a akyu hpyi ga hpe na ya nna shanhte hpe hkye mawai la na rai nga ndai.

10“Ya chyawm gaw Amon, Moba hte Edom masha ni anhte hpe gasat mani ai. Anhte a kaji kawa ni Egutu mung kaw nna pru wa ma ai shaloi dai mungdan ni de shang na ahkang nang n jaw ndai majaw anhte kaji kawa ni koi kau da ai hte shanhte hpe n jahten sharun kau da nga ai.

11Shanhte mahtang nang anhte hpe jaw da sai ndai mung kaw nna anhte hpe shaden shapraw kau na matu sa masai; Yu u, dai gaw anhte hpe bai htang ai lam rai nga ai.

12Nang gaw anhte a Karai Kasang rai nga ndai, shanhte hpe ari jaw u; anhte hpe gasat nga ai ndai hpyen luksuk kaba a man hta anhte gaw karum la lam n lu ai ni she rai nga saga ai. Kaning rai galaw na mung anhte n chye saga ai, rai ti mung anhte chyawm gaw karum la hkrum na matu nang hpe sha mada yu nga saga ai law,” ngu nna nsen ja ja hte hpyi jahtau wu ai.

13Yuda masha ni yawng gaw shanhte a madu jan ni hte kashu kasha ni hte rau dai yang na Nawku Htingnu hta e tsap nga ma ai.

14Dai Madu a wenyi gaw shawa hpawng hta lawm nga ai Lewi masha langai mi kaw du sa nga ai. Shi a mying gaw Zehkaria a kasha Yahaziela rai nga ai; shi gaw Asap amyu lakung na rai nna Matania, Yeiela hte Benaia amyu matu hku yu wa ai wa rai nga ai.

15Yahaziela gaw, “Madu hkawhkam hte Yuda, Yerusalem mare masha ni yawng hte e, dai hpyen luksuk kaba hte hkrum na myit hkum daw myit, hkrit mung hkum hkrit nga myit. Dai hpyen gasat ai gaw nanhte a amu n rai; Karai Kasang hte she seng nga ai.

16Shanhte gaw hpawt ni na aten hta Ziza uhkan hku rawt lung wa ai shaloi htim gasat mu, Yeruela makau na nam mali de sa wa ai kadit jahtum e shanhte hte hkrum na marin dai.

17Nanhte gaw ndai majan hpe n gasat ra na myit dai; shara sha la nna ala nga mu; dai Madu gaw nanhte hpe awng padang jaw ai hpe mu lu na marin dai. Yuda mung hte Yerusalem mare e nga ai amyu masha ni e, hkum hkrit, hkum kanung nga myit, majan pa de pru sa wa mu; dai Madu gaw nanhte hte rau rai na ra ai,” ngu nna tsun wu ai.

18Dai hpang Hkawhkam Yehoshahpat gaw ga de hkra hkra, shi a myi man gum dagup wu ai rai nna amyu masha ni yawng mung shi hte rau gum dagup let dai Madu hpe nawku ma ai.

19Lewi amyu Kohat hte Kora a amyu lakung ni mung rawt tsap let dai Madu Israela a Karai Kasang hpe nsen ja ja hte shakawn kungdawn ma ai.

20Hpang jahpawt manap jau jau aten e, amyu masha ni dai Tekoa mare makau na nam mali de pru sa mat wa ma ai. Shanhte shamu hpang wa ma yang Yehoshahpat gaw ning ngu nna shanhte hpe tsun matsun wu ai: “Yuda mung hte Yerusalem mare na amyu masha ni e, dai Madu nanhte a Karai Kasang hpe kam hpa nga mu; shaloi nanhte ngang grin wa lu na marin dai. Nanhte hpe tsun ai myihtoi ni a ga hpe kam mu, shaloi nanhte awng dang na marin dai.”

21Shi gaw amyu masha ni hte bawng jahkrup ngut jang mahkawn mangoi chye ai ni hpe chyoi pra ai aten ladaw hta shanhte hpun hpun re ai palawng galu ni hpun nna luksuk a shawng e rawt sa wa nhtawm, “Dai Madu hpe shakawn kungdawn mu! Shi a tsaw ra myit htani htana agrin nga ai!,” ngu mahkawn mangoi na lam shanhte hpe hkang da wu ai.

22Ya shanhte mahkawn mangoi hpang wa ma yang, dai Madu gaw shang gasat nga ai hpyen luksuk ni kata de kajawng kaja re ai gumle gumlau lam shabyin dat wu ai.

23Amon hte Moba masha ni gaw Edom hpyen luksuk hpe tsep kawp gasat shamyit kau ma ai; dai hpang shan shada da grai laja ai hku gasat ma ai.

24Yuda luksuk ni nam mali na langchyi de du jang, gumlau hpyen ni nga ai maga de shanhte mada yu dat mu yang, ga ntsa e si jawng taw nga ma ai hpe sa mu ma ai. Langai mi mung n lawt lu ma ai.

25Yehoshahpat hte shi a hpyen hpung ni gaw lanep hta la na nga, sit sa wa ma ai rai nna dumsu ni, arung arai ni, hpun palawng hte kaga manu dan ai arung arai law law sa mu tam la ma ai. Shanhte gaw dai lanep arai ni hpe masum ya tup hpyu shinggyin la ma timung arung arai nau law ai majaw arai magup hte hpe shanhte n lu la wa nga ma ai.

26Mali ya ngu na shani hta shanhte gaw Berahka Kadit e zup hpawng nga let dai Madu galaw nu ai amu a majaw shi hpe shakawn kungdawn ma ai. Dai lam a majaw kadit dai hpe “Berahka” ngu nna shamying ma ai.

27Dai Madu gaw shanhte a gumlau hpyen ni hpe gasat dang kau ya nu ai rai nna Yehoshahpat mung shi a hpyen hpung ni hpe awng padang ninglaw hte Yerusalem mare de bai woi nhtang wa wu ai.

28Shanhte gaw mare de du wa ai shaloi tingse sumpyi hte pahtau ni hpe dum let, mare na Nawku Htingnu de du wa ma ai.

29Dai Madu gaw Israela a gumlau hpyen ni hpe kaning rai gasat dang kau nu ai lam hpe amyu baw shagu na nna hkrit kajawng nga ma ai.

30Dai rai nna Karai Kasang gaw Yehoshahpat hpe lam maga shagu shim lum ai lam jaw ya wu ai rai nna shi mung ngwi pyaw sim sa ai hte up hkang nga wu ai.

31Yehoshahpat gaw asak sumshi manga ning hta Yuda hkawhkam tai wa nhtawm Yerusalem mare hta hkun manga ning tup up nga ai. Shi a kanu gaw Shilahi a shayi sha Azuba rai nga ai.

32Shi a shawng na shi a kawa Asa zawn dai Madu a man e teng man ai amu

33shi galaw nga ti mung, tara maigan masha ni a nawku shara ni hpe n jahten sharun kau ya nga ai. Dai rai nna amyu masha ni shanhte a kaji kawa ni a Karai Kasang hpe nawku na matu myit masin mahkra hte garai n kayin wa ma ai.

34Shi hkaw dung ai npawt kaw nna jahtum du hkra, Yehoshahpat galaw nu ai lam magup hpe Hanani a kasha Yehu a Labau Laika hta ka matsing da nga ai. Dai gaw Israela hkawhkam ni a labau daw chyen mi hta lawm nga ai.

35Lang mi mung Yuda Hkawhkam Yehoshahpat gaw n hkru ai amu law law galaw ai Israela Hkawhkam Ahazia hte jinghku galaw wu ai.

36Shan gaw Eziongebera daru e nammukdara ntsa hkawm ai sanghpaw li ni shachyaw ma ai.

37Rai ti mung Maresha mare na Dodawahu a kasha Elieza gaw Yehoshahpat hpe, “Ahazia hte jinghku galaw ndai majaw nang galaw da sai amu hpe dai Madu jahten kau ya na ra ai,” ngu nna sadi jaw wu ai. Shaloi dai sanghpaw li ni daw agrawp mat ai rai nna galoi mung n pru sa lu nga sai.

← Chapter 19 Jump to: Chapter 21 →