2 Chronicles 19

Jinghpaw Common Language Bible © Bible Society of Myanmar, 2009

← Chapter 18 Jump to: Chapter 20 →

1Yuda Hkawhkam Yehoshahpat gaw Yerusalem mare na shi a hkawhkam htingnu de shim lum ai hte nhtang wa wu ai.

2Hkawhkam wa hpe sa hkrum na nga, Hanani a kasha myihtoi Yehu sa wa nhtawm, “N hkru ai ni hpe karum nna dai Madu hpe n dawng ai ni a maga de tsap nang ai gaw jaw ai ngu nang myit nawn da wu ni? Nang galaw kau nit dai amu gaw dai Madu a masin kahtet ai lam na a ntsa e du shangun nga nit dai.

3Timung nang hta mai kaja lam naw nga nga lit dai. Amyu masha ni nawku ai Ashera karai num a hkrang sumla ni yawng hpe nang yeng seng kau nna, Karai Kasang a myit ra sharawng ai lam hta hkan nang na, nang shakut nit dai,” ngu nna tsun wu ai.

4Yehoshahpat gaw Yerusalem mare e nga nga timung, dingda maga Berasheba mare kaw nna dingdung maga Ehprim bum ga shingnawm du hkra ladaw da ai aten shagu hkawm sa nhtawm mung masha ni hpe dai Madu shanhte a Karai Kasang hpang de kayin wa shangun wu ai.

5Shi gaw Yuda mung na bunghku kum ai mare shagu hta tara agyi ni hpe san tawn nhtawm,

6shanhte hpe ning ngu nna matsun da wu ai: “Nanhte gaw masha a ahkaw ahkang hte n rai; dai Madu a ahkaw ahkang hte sha galaw lu na rai myit dai; nanhte tara daw dan myit dai shaloi nanhte hte rau shi nga nga ai majaw tara dara ai amu hta sadi sahka rai nga mu.

7Dai Madu anhte a Karai Kasang gaw ru hka amu hta masu hkalem ai lam, myi man tau ai lam hte mayun kumhpa la ai lam ni hpe n yu sharang lu nga ai majaw dai Madu hpe shagrau sha-a nna sadi sahka hte galaw mu.

8Yehoshahpat gaw Yerusalem hta e mare masha ni a lapran na dai Madu a Tara hpe tawt lai ai amu hte ndang kalang re ai amu ni hpe daw dan ya na matu Lewi masha, hkinjawng ni hte mung masha ni hpe woi awn ai ni hpe san tawn da wu ai.

9Shanhte hpe ning ngu nna tsun matsun wu ai: “Nanhte a lit ni hpe dai Madu hpe hkrit kamyin ai myit hte galaw nga mu; nanhte galaw ai amu magup hta kangka ai hte shi a ga madat mara nga mu.

10Mare kahtawng hkan nga ai nanhte a nhpu nnau ni gaw nanhte a man de masha sat ai amu, tara shing n rai hkang da ai ga, langai ngai hpe tawt lai ai amu sa shawk ma yang, shanhte gaw dai Madu a man e mara n kap mat hkra dai tara jeyang nga ai laman shanhte hkum kaning rai nga na lam sadi sahka hte shanhte hpe lam madun matsun ra na rai myit dai. Dai zawn n shadum ai rai yang, nanhte hte nanhte a nhpu nnau ni dai Madu a pawt sindawng ai n-gun hte wa hkrum kadup na rai myit dai. Rai ti mung nanhte gun hpai na lit hpe n hprai kau myit dai rai yang nanhte mara n kap na rai myit dai.

11Hkinjawng Kaba Amaria gaw nawku htung hte seng ai amu yawng mayawng hpe hpang jahtum daw dan ya lu na ahkang aya nga nga ai; Ishmaela a kasha Yuda mung du Zebadia mahtang mung shawa up hkang lam hte seng ai amu yawng mayawng hpe jahtum daw dan ya lu na ahkaw ahkang lu nga ai. Lewi masha ni mung tara rung ni a daw dan hparan ai amu ni hpe gun hpai na lit lu nga ai. Ndai matsun maroi ga ni hpe nden shaja nna hkan galaw nga mu; dai Madu gaw ding man ai maga de nga nga ai!”

← Chapter 18 Jump to: Chapter 20 →