1 Thessalonians 1

Kamba (Mbivilia) 1956

Jump to: Chapter 2 →

1Vaulo, na Silivano, na Timotheo, valũa ũũ witũ ũyĩvikĩe ĩkanisa ya Athesalonika yĩla yĩ nthĩnĩ wa Ngai Asa na Mwĩaĩi Yesũ Klĩsto: Mumo nĩwĩthĩwe nenyu na mũuo.

2Nĩtũũmũtũngĩa Ngai mũvea mavinda onthe kwondũ wenyu inyw’onthe, tũkĩmũweta mboyanĩ sitũ;

3tũkĩlilikana tũteũeka wĩa wenyu wa mũĩkĩĩo, na kũthĩnĩa wĩa kwenyu kwa wendo, na wũmĩĩsyo wenyu wa wikwatyo nthĩnĩ wa Mwĩaĩi waitũ Yesũ Klĩsto, mbee wa Ngai Asa waitũ:

4tũkĩmanya, ana‐a‐asa, endwa ma Ngai, kũnyuvwa kwenyu,

5nĩkwĩthĩwa ũvoo mũseo witũ ndwaamũvikia na ndeto syoka, ĩndĩ na vinya, na nthĩnĩ wa Veva Mũtheu, na wĩanĩu wa ũmanyi; o tondũ mwĩsĩ ũndũ mwĩkalile witũ wailyĩ mbee wenyu kwondũ wenyu.

6Nenyu mwatw’ĩka eelekan’ya maitũ, na ma Mwĩaĩi, mwosete ĩla ndeto na ũnyamao mwingĩ, vamwe na ũtanu wa Veva Mũtheu;

7na nũndũ wa ũu mũtw’ĩkĩte ngelekan’yo kwa andũ onthe ala metĩkĩlaa Masetonia na Akaia.

8Nũndũ isyũ ya ndeto ya Mwĩaĩi nĩyĩw’ĩkĩte yumĩte kwenyu, na ti Masetonia na Akaia kw’oka, ĩndĩ kĩla vandũ mũĩkĩĩo wenyu ũla mwi naw’o kwa Ngai nũtũnganĩte; na nũndũ wa ũu tũi na vata wa kũneena ũndũ.

9Nũndũ mo ene nĩmeũtavan’ya ũvoo witũ ũndũ kwailyĩ kũlika kwitũ kwenyu; na ũndũ mweethyũũie kũmweiekela Ngai na kũtia mĩvw’anano, nĩ kana mũthũkũme Ngai ũla wĩ thayũ na ũla wa w’o.

10Na kũmweteela Mwana wake kuma ĩtunĩ, ũla wamũthayũũkisye kũmumya kwa akw’ũ, nake nĩ Yesũ, Mũtũtangiĩi kwa ũthatu ũla wũkĩte.

Jump to: Chapter 2 →