1 Thessalonians 4

Kamba (Mbivilia) 1956

← Chapter 3 Jump to: Chapter 5 →

1Kũminũkĩlya ĩndĩ, ana‐a‐asa, nĩtũũmwĩsũva na kũmũtaa nthĩnĩ wa Mwĩaĩi Yesũ, kana, o ũndũ mwoosie kwitũ ũndũ mwaĩlwe nĩ kũendaa na kũmwendeesya Ngai, o ũndũ mũendaa, kana mwongeleele ũu mũno mbee.

2Nũndũ nĩmwĩsĩ mĩao ĩla twamũnengie kwondũ wa Mwĩaĩi Yesũ.

3Nũndũ ũũ nĩw’o ũla wendetwe nĩ Ngai, naw’o nĩ kũvathwa kwenyu mwĩthĩwe atheu, nĩ kana mwĩvathane na ũlaalai;

4kana kĩla ũmwe wenyu amanye ũndũ wa kwĩkalya mwĩĩ wake mwene kũvathwanĩ na ndaĩanĩ,

5ti nthĩnĩ wa wendi mũthũku, o ta Andũ‐ma‐mbaĩ‐ingĩ ala matamwĩsĩ Ngai;

6nĩ kana mũndũ o na wĩva ndakavĩtye, na kũmwĩka mwana‐a‐ĩthe naĩ ũndũnĩ ũsu: nĩkwĩthĩwa Mwĩaĩi nĩ mũĩvanĩsya maũndũnĩ asu onthe, o ũndũ twamwonisye mbee na twakũsĩĩa.

7Nĩkwĩthĩwa Ngai ndaatwĩtĩa ũvuku, ĩndĩ nĩ kũvathwa.

8Kwondũ wa ũu ũla ũnũũlea, ndeũmũlea mũndũ, ĩndĩ emũlea Ngai, ũla ũmũnengae inyw’ĩ Veva Mũtheu wake.

9Ĩndĩ ũndũ wa wendano wa ana‐a‐asa mũi na vata wa mũndũ kũmũandĩkĩa: nũndũ inyw’ĩ ene nĩmũmanyĩaw’a nĩ Ngai kwendana ene kwa ene;

10nũndũ nĩ w’o nĩmwĩkaa ũndũ ũũ kwa ana‐a‐asa onthe ala me Masetonia kw’onthe. Ĩndĩ nĩtũũmwĩsũva, ana‐a‐asa, nĩ kana mwongeleele ũu mũno mbee;

11na nĩ kana mwĩmanyĩsye kwĩthĩwa na ũuu, na kwĩka maũndũ menyu ene, na kũtethya wĩa na moko menyu, o ũndũ twamwĩaĩe;

12nĩ kana mũendae ũndũ waĩle mbee wa ala me ũtee, na ĩngĩ mũikethĩwe na vata wa kĩndũ o na kĩva.

13Ĩndĩ, ana‐a‐asa, tũikwenda mũlee kũmanya ũvoo wa ala makomaa; nĩ kana mũtikethĩwe na kĩmako, ta ala angĩ mate na wĩkwatyo.

14Nũndũ ethĩwa nĩtũkwĩtĩkĩla kana Yesũ nĩwakwie na athayũũka ĩngĩ, o ta ũu nao ala makomete nthĩnĩ wa Yesũ, Ngai akamaete vamwe nake.

15Nũndũ ũũ nĩtũũmũtavya kwondũ wa ndeto ya Mwĩaĩi, kana ithyĩ ala twĩ thayũ, ala tũkatiala kũvika kũka kwa Mwĩaĩi, tũikamatongoesya nongi ala makomie.

16Nĩkwĩthĩwa Mwĩaĩi mwene akatheea kuma ĩtunĩ, na wasya mũtũlu, na wasya wa mũlaĩka mũnene, na soo wa Ngai: na ala makwie nthĩnĩ wa Klĩsto makathayũũka mbee;

17na ĩndĩ ĩtina ithyĩ ala twĩ thayũ ala twatialile, tũkavulw’a vamwe nao mathweonĩ, kũmũthaũa Mwĩaĩi yayayanĩ: na ũu tũkeethĩwa vamwe na Mwĩaĩi tene na tene.

18Kwondũ wa ũu kiakianasyai na ndeto ii.

← Chapter 3 Jump to: Chapter 5 →