1 Thessalonians 5

Kamba (Mbivilia) 1956

← Chapter 4 Jump to:

1Ĩndĩ ũndũ wa mavinda na syathĩ, ana‐a‐asa, mũi na vata kũandĩkiwa ũndũ.

2Nũndũ inyw’ĩ ene nĩmwĩsi vyũ kana mũthenya wa Mwĩaĩi wĩũka o ũndũ kĩng’ei kyũkaa ũtukũ.

3Ĩvinda yĩla mekwasya, Kwĩ mũuo na vai mũisyo, o ĩvinda yĩu nĩw’o wanangĩko wĩũka ĩũlũ woo mĩtũkĩ, o tondũ woo wa kwaũnya ũkwataa mũndũ mũka wĩ ĩvu; na maikavonoka nongi.

4Ĩndĩ inyw’ĩ, ana‐a‐asa, mũi kĩvindunĩ, ũndũ mũthenya ũsu ũmũvikĩa ta kĩng’ei:

5nũndũ inyw’onthe mwĩ ana ma kyeni, na ana ma mũthenya: ithyĩ tũi ma ũtukũ kana ma kĩvindu;

6nũndũ wa ũu tũikakome, ta ala angĩ, ĩndĩ tũsyaĩĩsye na kwĩthĩwa na wĩting’o.

7Nũndũ ala makomaa, makomaa ũtukũ; na ala matoonaa, matoonaa ũtukũ.

8Ndĩ ithyĩ, nũndũ twĩ ma mũthenya, twĩthĩwe na wĩting’o, tũkĩkĩa ngao ya kĩthũi ya mũĩkĩĩo na wendo; na ngovia yĩthĩwe nĩyo wĩkwatyo wa ũtangĩĩo.

9Nũndũ Ngai ndaatwia twĩthĩwe ma kũthatĩwa, ĩndĩ ma kwosa ũtangĩĩo kwondũ wa Mwĩaĩi waitũ Yesũ Klĩsto,

10ũla wakwie nũndũ witũ, nĩ kana, ethĩwa nĩtũamũkĩte kana kũkoma, twĩthĩwe thayũ vamwe nake.

11Kwondũ wa ũu kiakian’yai, na kĩla mũndũ akyaka ũla ũngĩ, o ũndũ mwĩkaa.

12Ĩndĩ nĩtũũmwĩsũva, ana‐a‐asa, mũmanye ala mathĩnĩaa wĩa katĩ wenyu, na me ĩũlũ wenyu nthĩnĩ wa Mwĩaĩi, na mamũtaaa inyw’ĩ;

13na kũmataĩa mũno nthĩnĩ wa wendo kwondũ wa wĩa woo. Ĩthĩwai na mũuo inyw’ĩ kwa inyw’ĩ.

14Na nĩtũũmũtaa, ana‐a‐asa, mataaei ala matekalaa nesa, mekĩaei vinya ala me na ngoo mbũthũ, tw’ĩĩkaai ala onzu, ũmĩanĩasyai na andũ onthe.

15Sisyai kana mũndũ o na wĩva ndakekũle kwa ũngĩ; ĩndĩ mavinda onthe atĩĩaai ũla ũseo, ene kwa ene, na kwa onthe.

16Tanaai mavinda onthe;

17voyaai mũtekũeka;

18tũngaai mũvea kĩla ũndũnĩ: nũndũ ũu nĩw’o Ngai wendaa nthĩnĩ wa Klĩsto Yesũ ngalĩ ĩ yenyu.

19Mũikamũvosye Veva;

20mũikavũthye mawathani;

21oasyai maũndũ onthe; lũmasyai ũla ũseo;

22ĩvathanaei na kĩla mũthemba wa ũthũku.

23Na Ngai wa mũuo mwene namũvathan’ye mwĩthĩwe atheu vyũ; veva na ngoo na mwĩĩ syĩthĩwe syĩ nima, itailĩĩlĩka ũthũku akyũka Mwĩaĩi waitũ Yesũ Klĩsto.

24E na kĩthito ũla ũmwĩtaa inyw’ĩ, nake akeeka ũu.

25Ana‐a‐asa, tũvoyeei.

26Kethyai ana‐a‐asa onthe na ũmumunyano mũtheu.

27Nĩngũmwĩavĩthya kwa Mwĩaĩi nĩ kana valũa ũũ ũsomewe ana‐a‐asa onthe.

28Mumo wa Mwĩaĩi waitũ Yesũ Klĩsto nĩwĩthĩwe vamwe nenyu.

← Chapter 4 Jump to: