2 Peter 1

Kamba (Mbivilia) 1956

Jump to: Chapter 2 →

1Simoni Vetelo, ngombo na mũtũmwa wa Yesũ Klĩsto, valũa ũũ wakwa ũmavikĩe ala moosie vamwe naitũ mũĩkĩĩo o ũsu ũmwe ũla wĩ vata mũnene nthĩnĩ wa ũlũngalu wa Ngai waitũ na Mũtangĩĩi waitũ Yesũ Klĩsto:

2Mumo nĩwĩthĩwe nenyu na mũuo wingĩvw’e nthĩnĩ wa ũmũmanya Ngai na Yesũ Mwĩaĩi waitũ.

3Nĩkwĩthĩwa vinya wake wa Ũ‐Ngai nũtũnengete maũndũ onthe me vata ma thayũ na ma kũtuma tũmũkĩa Ngai, kwondũ wa ũmũmanya we ũla watwĩtie ũndũ wa ndaĩa yake mwene na ũseo wake;

4na kwondũ wa maũndũ asu nũtũnengete mawatho make manene mũno ala me vata mũnene; nĩ kana kwondũ wamo mũtw’ĩke osi ma mũtuo wa Ngai, mũvonokete wanangĩko ũla wĩ kũũ nthĩ kwondũ wa mĩmeo.

5Ĩĩ, na kwondũ wa ũũ mũkyongeleela ũthangaau w’onthe ngalĩ yenyu, mũĩkĩĩonĩ wenyu ĩkĩai ũseo; na ũseonĩ wenyu ũmanyi;

6na ũmanyinĩ wenyu wĩting’o; na wĩting’onĩ wenyu wũmĩĩsyo; na wũmĩĩsyonĩ wenyu kũmũkĩa Ngai;

7na nthĩnĩ wa kũmũkĩa Ngai kwenyu wendano wa ana‐a‐asa; na wendanonĩ wenyu wa ana‐a‐asa wendo.

8Nũndũ maũndũ asu methĩwa nĩ menyu na kũmusũa ki, nĩmeũtuma mwĩthĩwa mũte atulu o na mũtiĩthĩwa mũte na ũsyao mũkĩmanya Mwĩaĩi waitũ Yesũ Klĩsto.

9Nũndũ ũla ũte na maũndũ asu nĩ kĩlilinda, akyona kĩla kĩ vakuvĩ kyoka, akyũlwa nĩ kũthew’a kwa naĩ syake sya tene.

10Kwondũ wa ũu, ana‐a‐asa, thangaai mũno mũlũlũmĩlye kwĩtwa kwenyu na kũnyuvwa kwenyu: nũndũ ethĩwa nĩmũkwĩka maũndũ asu, muikalulutĩka o na ĩndĩĩ:

11nũndũ o ũu mukanengwa na ũlau kũlika ũsumbinĩ wa tene na tene wa Mwĩaĩi waitũ na Mũtangĩĩi Yesũ Klĩsto.

12Kwondũ wa ũu ngeethĩawa nĩyũmbanĩtye mavinda onthe kũmũlilikanasya maũndũ aa, o na kau nĩmũmesĩ, na kũlũlũmĩlw’a nthĩnĩ wa ũla w’o mwĩ naw’o.

13Nakwa nĩona nĩ ũseo, ĩvinda yĩla ngwĩkala ĩeemanĩ, yĩĩ, kũmũvindũa ũndũ wa kũmũlilikan’ya;

14ngĩmanya kana kũveta ĩeema yakwa kwĩũka mĩtũkĩ, o ũndũ Mwĩaĩi waitũ Yesũ Klĩsto wambonisye.

15Ĩĩ, nĩngũthangaaa nĩ kana mavinda onthe ĩtina wa kũkw’a kwakwa mũtonye ũlilikana maũndũ aa.

16Nũndũ tũtyaaatĩĩa mbano itilĩtwe na ũĩ, yila twamũmanyĩthisye vinya wake na kũka kwa Mwĩaĩi waitũ Yesũ Klĩsto, ĩndĩ twaĩ ngũsĩ sya ũtheu mũtisu wake sya kwona na metho.

17Nũndũ nĩwosie kuma kwa Ngai Asa ndaĩa na ũtheu mũtisu, yĩla wavikĩwe nĩ wasya waumie ũtheuni mũnene mũtisu, ũkyasya, Ũũ nĩwe Mwana wakwa mwendwa, ũla nenendeeaw’a nĩwe:

18na ithyĩ nĩtweewie wasya ũsu ũiuma ĩtunĩ, yĩla twaĩ vamwe nake kĩĩmanĩ kĩla kĩtheu.

19Na twĩ na ndeto ya wathani ĩlũlũmĩlw’e mũno; nayo mwĩĩka nesa mũimĩkwata, ta taa ũkenaa vala ve kĩvundu mũvaka kwakya, na ĩla ndata ya kĩoko ĩkyũkĩla ngoonĩ syenyu:

20mũkĩmanya ũũ mbee, kana vai wathani maandĩkonĩ wĩ na ũalyũlo wa mũndũ mwene.

21Nũndũ wathani o na wĩva ndwaaetwe nĩ kwenda kwa mũndũ: ĩndĩ andũ maneenie ndeto syaumie kwa Ngai, maitongoew’a nĩ Veva Mũtheu.

Jump to: Chapter 2 →