2 Peter 2

Kamba (Mbivilia) 1956

← Chapter 1 Jump to: Chapter 3 →

1Ĩndĩ kwookĩlile athani ma ũvũngũ katĩ wa andũ, o tondũ kũkeethĩwa amanyĩsya ma ũvũngũ katĩ wenyu, ala melikya na ũĩ ũmanyĩsyo wa kwasya, makĩmũkaĩa o na Mwĩaĩi ũla wamathooie, makĩyĩetee wanangĩko wa mĩtũkĩ.

2Na aingĩ makaatĩĩa meko moo ma mĩmeo mĩthũku; na kwondũ wamo nzĩa ya ũla w’o ĩkawetawa naĩ.

3Na nthĩnĩ wa wendĩ woo makeyonea ũtandĩthyo kwenyu ũndũ wa ndeto sya ũkengani: ũsilĩlo woo ũla watwiwe kuma tene ndwĩĩkala, na kwanangwa kwoo kũtikakoma.

4Nũndũ ethĩwa Ngai ndaamaeka alaĩka ala mavĩtisye, ĩndĩ amekya Ngienani, na ũmalikya maimanĩ manene me kĩvindu, masũvĩwe kũvika ũsilĩlo wũke;

5na ndaamĩeka nthĩ ya tene, ĩndĩ amũvĩtya Noa, mũtavan’ya wa ũlũngalu, vamwe na angĩ mũonza, yĩla waetie kĩw’ũ kingĩ ĩũlũ wa nthĩ ya ala matamũkĩaa Ngai;

6na kwitw’ĩkĩthya mũu ndũa sya Sotomo na Ngomola aisilĩla na kwing’uthũla akitw’ĩkĩthya ngelekan’yo kwa ala matakamũkĩa Ngai;

7na amũvĩtya Loto ũla waĩ mũlũngalu, anyamaĩtw’e nĩ mwĩkalĩle wa mĩmeo mĩthũku ya ala athe

8(nũndũ mũndũ ũsu mũlũngalu, aiĩkala katĩ woo, akyona na kwĩw’a, athĩn’ya ngoo yake ndũngalu kĩla mũthenya na meko moo ma ũng’endu):

9Mwĩaĩi nĩwĩsĩ nzĩa ya kũmavonokya ala mamũkĩaa Ngai maume matatwanĩ, na kwĩkalya ala mate alũngalu kũvika mũthenya wa ũsilĩlo masilĩlwe;

10ĩndĩ mũno nĩ ala maatĩĩaa mwĩĩ mĩmeonĩ ya ũvuku, na kũvũthya ũsumbĩko. Aemi, eyĩaĩi, mateũtetema makĩumanga monene:

11ĩndĩ alaĩka o na kau nĩ anene kwĩ o ũtonyinĩ na vinyanĩ, matietae ũvingan’yo mũthũku ĩũlũ woo mbee wa Mwĩaĩi.

12Ĩndĩ asu, ta nyamũ ite ilĩko, masyaiwe nyamũ ki sya ũkwatwa na kwanangwa, makĩneena ndeto nthũku maũndũnĩ ala mateũmanya, nthĩnĩ wa kwananga kwoo makaanangwa w’o,

13makĩkwatwa nĩ thĩna o ĩtuvi ya kwĩka naĩ; matalaa nĩ mũyo kwĩthĩwa na mboka ĩtaĩle mũthenya, matw’ĩkĩte malanga na mawathe, makĩvikĩla maũndũ ma mboka syoo sya ũkengani na makĩsyoka kũĩsanĩa vamwe nenyu;

14me na metho mausũĩte ũlaalai, ala mataekaa kwĩka naĩ; makĩkusya andũ mate alũmu; me na ngoo imanyĩĩtw’e nthĩnĩ wa wendi; syana sya kĩumo;

15makĩtia nzĩa ndũngalu, maaa, makĩatĩĩa nzĩa ya Mbalaamu mwana wa Mbeoli, ũla wendie ĩtuvi ya kwĩka naĩ;

16ĩndĩ nĩwakaniw’e ũndũ wa ĩvĩtyo yake mwene: ĩng’oi yĩtaneenaa yaneena na wasya wa mũndũ na yasiĩĩa ndũũka ya mwathani ũsu.

17Asu nĩ mbuluti ite manzĩ, na nundu isisivaa iitwawa nĩ kĩuutani; nao nĩmaiĩwe wiũ wa kĩvindu.

18Nũndũ, makĩneena ndeto nene mũno sya kwĩkathĩĩa, kwondũ wa mĩmeo ya mwĩĩ na maũndũ mathavu makusasya ala meũthonoka yu kuma katĩ wa ala mekalaa ũmamyĩsyonĩ wa ũvũngũ;

19makĩmantha kũthaw’a, o yĩla mo ene me ngombo sya wanangĩko; nũndũ, mũndũ akĩlw’a vinya nĩ ũngĩ, alikaw’a ũkombonĩ wa ũsu wamũkĩlya vinya.

20Nũndũ ethĩwa, ĩtina wa kũvonoka movukyo ma nthĩ ũndũ wa kũmũmanya Mwĩaĩi na Mũtangĩĩi Yesũ Klĩsto, maikwatwa ĩngĩ nĩo na ũkĩlw’a vinya, mwĩkalĩle woo wa mũminũkĩlyo nĩ mũthũku kũvĩta ũla wa mbee.

21Nũndũ nĩ kavaa kwoo kethĩwa maiaamanya nzĩa ya ũlũngalu, kwĩ kũmĩmanya na ĩtina kũalũka na kũtia mwĩao mũtheu ũla manengiwe.

22Nĩkwatw’ĩkĩkie kwamo kwĩanana na nthimo ya w’o, Ngitĩ kũalũkĩla ĩngĩ matavĩka mayo, na ngũlũe ĩla ithambĩtw’e kwĩyalalya ĩngĩ ndakanĩ.

← Chapter 1 Jump to: Chapter 3 →