2 Peter 3

Kamba (Mbivilia) 1956

← Chapter 2 Jump to:

1Endwa, valũa ũũ nĩ wa kelĩ namũandĩkĩa; na nthĩnĩ wamo elĩ nĩvindũa ilĩko syenyu sya w’o kwondũ wa ũmũlilikan’ya;

2nĩ kana mũlilikane ndeto ila syaneeniwe tene nĩ athani atheu, na mwĩao wa Mwĩaĩi na Mũtangĩĩi ũla waetiwe nĩ atũmwa menyu:

3mũkĩmanya ũũ mbee, atĩ mĩthenya ya mũminũkĩlyo akaakaan’ya makooka na ũkaakaasya, makĩatĩĩa mĩmeo yoo mĩthũkũ,

4na makyasya, Ũla watho wa kũka kwa Klĩsto ũĩva? nũndũ, kuma ĩvinda yĩla aaũmae maitũ makomie, syĩndũ syonthe iilyĩ o ũndũ syailyĩ kuma mwambĩlĩlyo wasyo kũmbwa.

5Kwondũ wa kwenda kwoo ene nĩmolawa nĩ ũũ kana kwaĩ matu kuma tene, na nthĩ ĩkwatene ũtee wa manzĩ na nthinĩ wa manzĩ, ũndũ wa ndeto ya Ngai;

6na kwondũ wa ũu nthĩ ĩla yaĩ vo yaaa, ĩkĩvwĩkwa nĩ manzĩ:

7ĩndĩ matu ala me vo yu, na nthĩ, sĩĩwe mwaki ũndũ wa ndeto o ĩsu, ikĩsũvĩwa kũvika mũthenya wa ũsilĩlo na kwanangwa kwa andũ ala matamũkĩaa Ngai.

8Ĩndĩ mũikolwe nĩ ũndũ ũũ ũmwe, endwa, kana mũthenya ũmwe kwa Mwĩaĩi nĩ ta myaka ngili, na myaka ngili no ta mũthenya ũmwe.

9Mwĩaĩi nde kĩkono ũndũ wa kwĩanĩsya watho wake, tondũ amwe matalaa kĩkono; ĩndĩ nũnũkũmĩĩsya ũndũ wenyu, atekwenda ũmwe o na wĩva ae, ĩndĩ endaa onthe mavikĩe ũalyũlonĩ wa ngoo.

10Ĩndĩ mũthenya wa Mwĩaĩi ũkooka ta kĩng’ei; na mũthenya ũsu matu makavĩta na kĩlituko kĩnene, na syĩndũ sya ĩtũnĩ ikanyaĩĩkw’a nĩ mwaki mwai, na nthĩ na mawĩa ala me nthĩnĩ wayo makavĩvw’a.

11Nĩkwĩthĩwa syĩndũ isu syonthe nikanyaĩĩkw’a ũu, inyw’ĩ mwaĩle kwĩthĩwa andũ mailyĩ ata mwĩkalĩlenĩ mũtheu wa thayũ na kũmũkĩa Ngai,

12mũkyeteela na kwenda mũno kũka kwa mũthenya wa Ngai, na kwondũ wakw’o matu makanyaĩĩkw’a nĩ kwakana mwaki, na syĩndũ sya ĩtunĩ ikatheũka nĩ mwaki mwai?

13Ĩndĩ, kwĩanana na watho wake, tweteele matu meũ na nthĩ nzaũ, naw’o ũlũngalu ũtwĩe nthĩnĩ wayo.

14Kwondũ wa ũu, endwa, nĩkwĩthĩwa mweteele maũndũ asu, thangaai kana mwoneke mũuonĩ, mũte na ĩlanga na mũtekwilĩĩlĩka mbee wake.

15Na talai kana wũmĩĩsyo wa Mwĩaĩi waitũ nĩ ũtangĩĩo; o ũndũ mwana‐a‐asa waitũ Vaulo, ũla tũmwendete mũno, wamũandĩkĩe kwĩanana na ũĩ ũla wanengiwe;

16mavalũanĩ make onthe nao aiweta maũndũ aa; na nthĩnĩ wamo ve maũndũ amwe me vinya kũmanya, ala andũ matamanyĩĩtw’e na mate alũmu mathyoekasya, o ũndũ mekaa na maandĩko ala angĩ, makĩyĩetee wanangĩko woo ene.

17Inyw’ĩ ĩndĩ, endwa, nũndũ nĩmwĩsĩ maũndũ aa mbee, ĩsũvĩei mũikavalũke kuma ũlũmunĩ wenyu nũndũ wa kwaw’a nĩ ũmanyĩsyo wa ũvũngũ wa andũ athe.

18Ĩndĩ ĩanaai mumonĩ na ũmanyinĩ wa Mwĩaĩi waitũ na Mũtangĩĩi Yesũ Klĩsto. Ũtaĩo nĩ wake yu na tene na tene. Ameni.

← Chapter 2 Jump to: