2 Thessalonians 1

Kamba (Mbivilia) 1956

Jump to: Chapter 2 →

1Vaulo, na Silivano, na Timotheo, valũa ũũ witũ ũyĩvikĩe ĩkanisa ya Athesalonika yĩla yĩ nthĩnĩ wa Ngai Asa waitũ na Mwĩaĩi Yesũ Klĩsto;

2Mumo nĩwĩthiwe nenyu na mũuo kuma kwa Ngai Asa na Mwĩaĩi Yesũ Klĩsto.

3Nĩtwaĩlwe nĩ kũmũtũngĩa Ngai mũvea mavinda onthe kwondũ wenyu, ana‐a‐asa, o tondũ kwaĩle nĩkwĩthĩwa mũĩkĩĩo wenyu nũkwĩana mũno, na wendo wa kĩla ũmwe wenyu kwa ala angĩ nũkwingĩva;

4ũndũ ithyĩ ene nĩtũkwĩkathĩĩa ũndũ wenyu makanisanĩ ma Ngai, kwondũ wa wũmĩĩsyo wenyu na mũĩkĩĩo monyamaonĩ menyu onthe na mathĩnanĩ ala mũmĩĩasya;

5naw’o nĩ wonan’yo wa ũsilĩlo mũlũngalu wa Ngai; ni kana inyw’ĩ mũtonye kũtalĩlwa kwĩthĩwa mwaĩle ũsumbĩ wa Ngai, ũla kwondũ waw’o mũthĩnaw’a:

6nũndũ nĩ ũlũngalu kwa Ngai kũmaĩva mathĩna ala mamũthĩnasya inyw’ĩ,

7na kũmũnenga inyw’ĩ ala mũthĩnaw’a ũthũmũo vamwe naitũ, ĩvinda yĩla Mwĩaĩi Yesũ ũkavuanw’a kuma ĩtunĩ vamwe na alaĩka ma vinya wake ũlĩlĩnzĩnĩ wa mwaki,

8akĩĩvanĩsya kwa ala matamwĩsĩ Ngai, na ala matawiw’aa ũvoo mũseo wa Mwĩaĩi waitũ Yesũ:

9ala makona ũsilĩlo, naw’o ni wanangĩko ũtakathela, kũvetwe ũthyũni wa Mwĩaĩi na ũtheuni mũtisu wa vinya wake,

10yĩla ũkoka kũtaĩĩwa nthĩnĩ wa atheu make na kũseng’ewa mũthenya ũsu nthĩnĩ wa onthe ala metĩkĩlĩte (nĩkwĩthĩwa ũkũsĩ witũ kwenyu nĩweetĩkililwe).

11Na kwondũ wa ũu nĩtũmũvoyeaa inyw’ĩ mavinda onthe, kana Ngai waitũ amũtale mwaĩle kwĩtwa kwenyu, na kwĩanĩsya na vinya wake kĩla kwenda kwa ũseo na kĩla wĩa wa mũĩkĩĩo;

12nĩ kana syitwa ya Mwĩaĩi waitũ Yesũ yĩtaĩwe nthĩni wenyu, nenyu nthĩnĩ wake, kwĩanana na mumo wa Ngai waitũ na Mwĩaĩi Yesũ Klĩsto.

Jump to: Chapter 2 →