2 Thessalonians 2

Kamba (Mbivilia) 1956

← Chapter 1 Jump to: Chapter 3 →

1Ĩndĩ nĩtũũmwĩsũva, ana‐a‐asa, ũndũ wa ũvoo wa kũka kwa Mwĩaĩi waitũ Yesũ Klĩsto, na kũmbanĩa kwitũ mbee wake;

2nĩ kana mũikathingithw’e na mĩtũkĩ ilĩkonĩ syenyu, kana mũikaũũye, o na ethĩwa nĩ kwondũ wa veva, o na ndeto, o na valũa ũũtalwa ta wumĩte kwitũ ta mũthenya wa Mwĩaĩi nĩ mũviku;

3mũndũ o na wĩva ndakamũkenge na ũndũ o na wĩva: nũndũ mũthenya ũsu ndũkoka, ũalyũko ũtambĩte kũka, na ũla mũndũ wa naĩ kũvuanw’a, mwana wa wanangĩko,

4ũla wĩsiĩĩa na kwĩnenevya mwene ĩũlũ wa kyonthe kĩla kĩtawa Ngai kana kĩla kĩthaithawa; ũndũ wĩĩkalaa ĩkalũnĩ ya Ngai, akĩyonan’ya ta nĩwe Ngai.

5Mũtiũlilikana, kana, yĩla naĩ nenyu, namũtavisye maũndũ asu?

6Na yu nĩmwĩsĩ kĩla kĩsiĩĩaa, nĩ kana atonye kũvuanw’a ĩvinda yake mwene.

7Nĩkwĩthĩwa ĩla nzama ya ũng’endu yu nĩnĩũtethya wĩa: ĩndĩ kwĩ ũmwe ũla ũsiĩĩaa yu, kũvika yĩla ũkathũkw’a nzĩanĩ.

8Nĩvo ĩndĩ ũla mũng’endu ũkavuanw’a, ũla Mwĩaĩi Yesũ wĩmũaa na mĩthũmũ ya kanyw’a wake, na kũmwananga na ũvuan’yo wa kũka kwake;

9ũla kũka kwake nĩ kwĩanana na kwĩka kwa Satani na vinya w’onthe na syama na moseng’yo ma ũvũngũ,

10na ũkengani w’onthe wa ũla ũte ũlũngalu kwa ala maaa; nĩkwĩthĩwa matyaaosa wendo wa ũla w’o, nĩ kana matangĩĩwe.

11Na kwondũ wa ũu Ngai nũmaeteae vinya wa kũmasya, nĩ kana metĩkĩle ũvũngũ:

12nĩ kana onthe masilĩlwe ala maleile kwĩtĩkĩla ũla w’o, ĩndĩ nĩmatanĩe ũla ũte ũlũngalu.

13Ĩndĩ nĩtwaĩlwe nĩ kũmũtũngĩa Ngai mũvea mavinda onthe kwondũ wenyu, ana‐a‐asa, endwa ma Mwĩaĩi, nĩkwĩthĩwa Ngai nĩwamũnyuvie inyw’ĩ kuma mwambĩlĩlyonĩ mwone ũtangĩĩo kwondũ wa kũvathwa nĩ Veva na kwĩtĩkĩla ũla w’o:

14nake amwĩtĩe ũndũ ũsu kwondũ wa ũvoo mũseo witũ, mwose ũtheu mũtisu wa Mwĩaĩi waitũ Yesũ Klĩsto.

15Kwondũ wa ũu ĩndĩ, ana‐a‐asa, ũngamai na ũlũmu, na kũkwata momanyĩsyo ala mũmanyĩĩtw’e, ethĩwa nĩ ndeto, kana nĩ valũa witũ.

16Na yu Mwĩaĩi waitũ Yesũ Klĩsto mwene, na Ngai Asa waitũ ũla watwendie na kũtũnenga ũkiakisyo ũtathela na wĩkwatyo mũseo kwondũ wa mumo,

17nakiakisye ngoo syenyu na kwilũlũmĩlya nthĩnĩ wa kĩla wĩa mũseo na ndeto.

← Chapter 1 Jump to: Chapter 3 →