Habakkuk 1

Kamba (Mbivilia) 1956

Jump to: Chapter 2 →

1Ndeto ngito ĩla mwathani Avakuki wonie.

2Ame Yeova, ngaĩa ĩvinda yĩana ata, naku ndũkwenda kwĩw’a? Nĩngũkwĩkaĩla ũndũ wa ũng’endu wĩ kw’o, na ndũkwenda kũtangĩĩa.

3Nĩkĩ naku ũmbonasya ũthũku, na kũtuma nĩsiasya maũndũ ma ngũlũ? Nũndũ wanangĩko na ũng’endu me mbee wakwa; na ve ĩteta, na ngananĩo nikũkĩla.

4Kwondũ wa ũu mĩao ndĩ na vinya, na sila wa katĩ ndumĩlaa nongi; nũndũ ala thũku nĩmathyũlũlũkĩte ala alũngalu; kwondũ wa ũu sila wa katĩ nĩwelelũkaw’a.

5Sisyai, inyw’ĩ i mbaĩnĩ, na mũiketeea, na kũseng’a mũseng’eee; nũndũ nĩtethya wĩa mĩthenya yenyu, ũla mũtaketĩkĩla o na mwatavw’a.

6Nũndũ, sisyai, nĩngũkĩlya Akalitei, mbaĩ yĩ wai na nthangaau, ala maendaa ũthanthaunĩ wa nthĩ, kwĩyosea motũo ala mate moo.

7Nĩ ma kũtĩsya na kũtw’a nda; ũsilĩli woo na ũnene woo wumaa kwoo ene.

8O na mbalasi syoo syĩ maũũ kwĩ ngo, na nĩ mbai kwĩ nzũi wĩoo; na atũli ma mbalasi moo maendaa na ngathĩĩo: ĩĩ, atũli ma mbalasi moo mokaa kuma kũasa; maũlũkaa ta ndiũ yĩkalaatĩle kũya.

9Mokaa onthe kwondũ wa ũng’endu; mothyũ moo malũlũmĩle kwelekela mbee; na mombanasya atavwa o ta kĩthangathĩ.

10Ĩĩ, nũvũthĩĩasya asumbĩ, na kũmathekeea anene me mbee ũsumbĩnĩ; nũthekeeaa kĩla ngome yĩ vinya; nũndũ nũmyũmbĩaa mũthanga, na akĩmyosa.

11Nĩvo ĩndĩ wĩvĩta o ta kĩseve, na akĩvĩtũka, na akĩthĩwa mũvĩtan’ya, we ũla ũtonyi wake nĩ ngai yake.

12We ndwĩ wa tene na tene, ame Yeova Ngai wakwa, Mũtheu wakwa? Tũikakw’a. Ame Yeova, we nĩwamwiie nũndũ wa ũsilĩlo; naku, ame Ĩvia, nĩwamũũngamisye nũndũ wa ũkan’yo wa mavĩtyo.

13We ũla wĩ na metho matheu ũtasiasya ũthũku, na ũla ũtatonya kũsisya ngũlũ, nĩ ũndũ wa kĩ ũsiasya ala mekaa ũseleke, na ũyĩkilĩlya yĩla mũthũku ũnũkũmelya mũndũ ũla wĩ na ũlũngalu kũmũvĩtũka;

14na aitw’ĩkĩthya andũ ta makũyũ ma ũkanganĩ, na ta tũsamũ tũla tũtambũkaa, tũte mũnene watw’o?

15Nũmakwatasya onthe na ngolya, nũmakwatasya na kĩtei kyake, na aimomban’ya ĩkengenĩ yake: kwondũ wa ũu nũtanaa na kwĩw’a mũyo.

16Kwondũ wa ũu nũthembeaa kĩtei kyake, na kũtoeesya ĩkenge yake ũvani; nũndũ kwondũ wasyo kĩanda kyake nĩ kĩnou, na lĩu wake nĩ mwingĩ.

17Kwondũ wa ũu nũkaumya onthe ala me kĩteinĩ kyake, na aieka kũsyũaa mbaĩ ĩvinda yonthe?

Jump to: Chapter 2 →