Habakkuk 2

Kamba (Mbivilia) 1956

← Chapter 1 Jump to: Chapter 3 →

1Ngaũngama ũsyaĩĩsyonĩ wakwa, na kwĩũngamya ĩũlũ wa mwako mũtũlu wa mũnyoolo, na ngasisya none ũndũ wĩneena nakwa, na ũndũ nĩsũngĩa ũndũ wa kũnyungunyĩsya kwakwa.

2Na Yeova anzũngĩa, na ambĩa, Andĩka woni masengeanĩ, wumĩlye nesa, nĩ kana ũla ũsomaa atonye kũsemba.

3Nũndũ woni no wa ĩvinda yĩla yatwiwe, na wĩkalaatĩle kwelekela mũminũkĩlyo, na ndwĩĩthĩwa ũvũngũ: o na wekala, wĩweteela; nĩkwĩthĩwa ndũtĩa kũka, ndũkekala.

4Sisya, ngoo yake nĩĩyimbĩtye, ti ndũngalu nthĩnĩ wake; ĩndĩ ũla mũlũngalu akekala thayũ kwondũ wa mũĩkĩĩo wake.

5Ĩĩ, o na mbee wa ũu, mbinyu nĩ ngengani, nĩyo mũndũ wĩ mĩtũlyo, ũla ũtekalaa kwake; ũla ũnenevasya kwenda kwake ta Seoli, nake nĩ ta kĩkw’ũ, na ndatonya kũvũnĩthw’a, ĩndĩ eyũmbanĩasya mbaĩ syonthe, na kwĩyũmbanĩsya ngo syonthe sya andũ.

6Asu onthe matikamũtila ngelekan’yo, na kũmũkũlũla nthimo, makyasya, Woo nĩ wa ũla wongeleelaa kĩla kĩte kyake! Nĩ kũvika ĩndĩĩ? Na wa ũla wĩkuĩthasya mũio wa ngwatĩlĩlyo!

7Maikokĩla na kĩthũlũmũko ala makakũũma, na kũamũka ala makakũthĩn’ya, naku ndũkethĩwa mũtavo kwoo?

8Nĩkwĩthĩwa nũtavĩte mbaĩ mbingĩ, ũtialo w’onthe wa ngo sya andũ ũkakũtava, kwondũ wa nthakame ya andũ, na kwondũ wa ũng’endu ũla wĩkĩtwe nthĩ ĩsu, ndũa ĩsu na onthe ala matwie nthĩnĩ wayo.

9Woo nĩ wa ũla ũtandĩthĩasya nyũmba yake ũtandĩthyo mũthũku, nĩ kana atũlye ndala yake ĩũlũ, kana atangĩĩwe kuma kw’okonĩ kwa ũthũku!

10We nũmanthĩe nyũmba yaku nthoni, nũndũ wa kũveta ngo mbingĩ sya andũ, na nĩwĩyĩkĩte naĩ.

11Nũndũ ĩvia yĩkalonzanĩlya wakonĩ, na mũamba wĩ mĩtĩnĩ ya mwako ũkayĩsũngĩa.

12Woo nĩ wa ũla wakaa katũla na nthakame, na kũlũlũmĩlya ndũa na ũthũku!

13Sisya, ti ũndũ wa Yeova wa nguthu ngo sya andũ syĩthĩnĩa wĩa ũvĩvw’e nĩ mwaki, na mbaĩ ikĩnosya mana?

14Nũndũ nthĩ ĩkausũwa nĩ kũmanya ũnene wa Yeova, o tondũ manzĩ makunĩkĩlye ũkanga.

15Woo nĩ wa ũla ũnengae mũtũi wake kya ũnyw’a, kwaku we, ũla wongelanasya kya ũmũtoon’ya kyaku, na ĩngĩ ũituma amilwa, nĩ kana ũtonye kũmasisya me athei!

16Wusũĩtwe nĩ nthoni, na ti ndaĩa: nyw’a o naku, na ĩthĩwa o ta ũmwe ũte mwaĩke; kĩkombe kĩ kw’okonĩ kwa aũme kwa Yeova kĩkakũsyokea, na nthoni nthũku ikavw’ĩka ndaĩa yaku.

17Nũndũ ũng’endu ũla weekiwe Levanoni, na wanango wa nyamũ, ũla watumie makĩa, ũkakũvw’ĩka; nũndũ wa nthakame sya andũ, na nũndũ wa ũng’endu ũla weekiwe nthĩ ĩsu, ndũa ĩsu na onthe ala matwĩe nthĩnĩ wayo.

18Mũvw’anano mwasũvye ũunaa na kyaũ, kĩtuma mwaseũvya waw’o awasũvya; mũvw’anano mũseũvye wa syĩndũ itwekethetw’e, nĩw’o mũmanyĩsya wa movũngũ, ũunaa na kyaũ, kĩtuma ũla ũseũvasya mũmbĩle waw’o oĩkĩĩa, nĩ kana aseũvye mĩvw’anano ĩtaneenaa?

19Woo nĩ wa ũla wĩaa mũtĩ, Amũka; na ĩvia yĩtaneenaa, Ũkĩla! Syĩndũ ii ikamanyĩsya? Sisya, nivw’ĩkĩtwe na thaavu na vetha, o na vai mĩvevo nongi nthĩnĩ wasyo.

20Ĩndĩ Yeova e ĩkalũnĩ yake ĩtheu: nthĩ yonthe nĩvindye mbee wake.

← Chapter 1 Jump to: Chapter 3 →