Habakkuk 3

Kamba (Mbivilia) 1956

← Chapter 2 Jump to:

1Mboya ya mwathani Avakuki, ya mwinĩle wa kũkaya.

2Ame Yeova, nĩnĩw’ĩte ũvoo waku, na nĩngũkĩa; Ame Yeova, vuũkya wĩa waku katĩ wa myaka; Katĩ wa myaka tuma ũmanyĩka; Wathilĩka, lilikana tei.

3Ngai nĩwokie kuma Temani, Na Ũla Mũtheu kuma kĩĩmanĩ kya Valani. Ũtheu mũtisu wake wavw’ĩka matu, Na nthĩ yausũwa nĩ ndaĩa yake.

4Na ũtisu wake wailyĩ kyeni; Aĩ na syeni syumĩte kw’okonĩ kwake; Na vo vaĩ kĩmbithĩ kya ũtonyi wake.

5Mbee wake kwatongosya mũimũ, Na makaa makanu maendela maũũnĩ make.

6Aũngama, na athima nthĩ; Asisya, na alũngĩlĩĩlya i mbaĩ kũũ na kũũ; Na iĩma sya tene na tene syanyaĩĩkw’a; Mĩendele yake yailyĩ o ta ĩla ya tene.

7Nonie maeema ma Kusani me thĩnanĩ; Motũtũ ma ngũa ma nthĩ ya Mitiani mathingitha.

8Atĩ Yeova nĩwew’ĩthiwe’ woo nĩ mbũsĩ? Ũthatu waku waĩ ĩũlũ wa mbũsĩ, Kana ũthilĩku waku ĩũlũ wa ũkanga, Ũndũ waendete ũtũlĩte mbalasi syaku, Makasyanĩ maku ma ũtangĩĩo?

9Ũta waku waĩ mumĩlye vyũ; Iavo i syeavĩwe mbaĩ syaĩ ndeto ya w’o. We nĩwaatũangie nthĩ na mbũsĩ.

10Iĩma syakwona, na syeew’a w’ĩa; Kyũkĩlan’yo kya manzĩ maingĩ kyavĩta kyathi; Manzĩ ma syũngũ nene maumya wasya wamo, Na mookĩlya moko mamo ĩũlũ.

11Syũa na mwei syaũngama ki ũtũonĩ wasyo, Kwondũ wa kyeni kya mĩsyĩ yaku ĩvĩtĩte, Kwondũ wa ũtisu wa ĩtumo yaku yĩkĩtisatisa.

12Wavĩtĩle nthĩ wĩ mũthilĩku; We nĩwavũie i mbaĩ wĩ mũthatu.

13We nĩwaumaalile ũndũ wa kũtangĩĩa andũ maku, Nũndũ wa ũtangĩĩo wa mwĩtĩkĩw’a mauta waku; We nĩwokitie mũtongoi wa nyũmba ya ũla mũndũ mwathe, Ũkĩvukũa mwambĩlĩlyo o na kũvika ngingonĩ.

14Naku nĩwatonyie mũtongoi wa andũ make ma kaũ na mĩsenge yake mwene: Nĩmookie o ta kĩlingi manyaĩĩkye nyie; Kũtana kwoo kwaĩ ta kũya ngya kĩmbithĩ.

15We nĩwakinyangie ũkanga na mbalasi syaku, Kĩvumbu kya manzĩ maingĩ.

16Neew’a, na mwĩĩ wakwa watetema, Ilomo syakwa syathĩĩlĩa nũndũ wa ũla wasya; Wou nũkũlika mavĩndĩnĩ makwa, na nĩngũtetemea va nĩĩ; Nĩkwĩthĩwa no mũvaka meteele mũthenya wa ũnyamao nĩuĩtye, Kwambata kwa andũ ala metũvithũkĩa.

17Nũndũ o na ethĩwa mũkũyũ ndũkalaũka, O na mĩsavivũ ndĩkasyaa; Wĩa wa mũthata ũkethĩwa wa mana; Na mĩũnda ndĩkasyaa lĩu; Ndĩthya sya mbũi na malondu ikavetwa kyengonĩ, Na vaikethĩwa ndĩthya sya ng’ombe itũũnĩ:

18Ĩndĩ nyie ngatana nthĩnĩ wa Yeova, Ngatanĩa Ngai wa ũtangĩĩo wakwa.

19Yeova, Mwĩaĩi, nĩ vinya wakwa; Na etw’a maũũ makwa ta maũũ ma ndaatai, Na akatuma nĩendela kũndũ kwakwa kũtũlu. Kwondũ wa Mũingi Ũla Mũnene, syĩndũnĩ syakwa sya kũinga syĩ mĩkunzu.

← Chapter 2 Jump to: