Joel 1

Kamba (Mbivilia) 1956

Jump to: Chapter 2 →

1Ndeto ya Yeova ĩla yamũkĩe Yoeli mwana wa Vethueli.

2Ĩw’ai ũũ, inyw’ĩ atumĩa, na teai kũtũ, inyw’onthe ala mũtwĩe ĩ nthĩ. Ũũ waaĩthĩwa mĩthenyanĩ yenyu, kana mĩthenyanĩ ya aaĩthe menyu?

3Tavyai syana syenyu ũũ, na syana syenyu nitavye syana syoo, na syana syoo nzyawa ĩngĩ.

4Kyu kĩla kyatialilw’e nĩ kĩtĩlĩ nĩkyalĩkile nĩ ngie; na kyu kĩla kyatialilw’e nĩ ngie nĩkyalĩkile nĩ mbandi; na kyu kĩla kyatialilw’e nĩ mbandi nĩkyalĩkile nĩ kĩthesa.

5Amũkai, inyw’ĩ athengi, na ĩai; na kayai, inyw’onthe anywi ma mbinyu, kwondũ wa mbinyu ĩ mũyo; nũndũ nĩvetetwe makanyw’anĩ menyu.

6Nũndũ mbaĩ nĩyambatĩĩa nthĩ yakwa, yĩ vinya, na ĩtatalĩka; maeo mayo nĩ maeo ma mũnyambũ, na yĩ na mbosela sya mũnyambũ mũka.

7Nĩyanangĩte mũsavivũ wakwa, na yasyũlya mũkũyũ wakwa: yũsyũlĩtye ũkathea kw’ũ, na kũwĩkya kũasa; mbonge syaw’o syeeũva.

8Ĩa ta mwĩĩtu mũtheu ũvotoetwe makunia nũndũ wa mũũme wamwĩvaĩtye.

9Nthembo ya mũtu na nthembo ya kũnyuwa nivetetwe nyũmbanĩ ya Yeova; athembi, athũkũmi ma Yeova, nĩmeũmeta.

10Mũũnda nĩ mwanange, nthĩ nĩnĩũmeta; nũndũ lĩu wa mbaa ngetha nĩ mwanange, na mbinyu mbĩthĩ nĩ ng’alu, na mauta nĩmekũnyiva.

11Thokoanai, inyw’ĩ aĩmi, kayai, inyw’ĩ asũvĩi ma mĩsavivũ, nũndũ wa nganũ na nũndũ wa mbaale; nũndũ ngetha ya mĩũnda nĩyaĩte.

12Mũsavivũ nĩwũmĩte, na mũkũyũ nũvovete; mũkũngũmanga, na mũtende naw’o, na mũevo, o mĩtĩ yonthe ya mĩũndanĩ nĩyũmĩte: nũndũ ũtanu nũthelete ananĩ ma andũ.

13Ĩvotoei makunia na kũĩa, inyw’ĩ athembi; kayai, inyw’ĩ athũkũmi ma kĩthembeo; ũkai, mũkome ũtukũ mũima mwĩvw’ĩkĩte makunia, inyw’ĩ athũkũmi ma Ngai wakwa: nũndũ nthembo ya mũtu na nthembo ya kũnyuwa nisiĩĩwe itikethĩwe nyũmbanĩ ya Ngai wenyu.

14Vathai ĩvinda ya kũtĩĩa kũya, mete mombane ũmbano ũkilĩtye, ũmban’yai atumĩa na onthe ala matwĩe ĩ nthĩ nyũmbanĩ ya Yeova Ngai wenyu, na mũkĩmwĩkaĩla Yeova.

15Ĩiaa! Mũthenya ũsu! Nũndũ mũthenya wa Yeova nĩ mũthengeeu, na ũkooka ta wanango kuma kwa Mwene Vinya W’onthe.

16Lĩu ti mũvete mbee wa metho maitũ, ĩĩ, ũtanu na mũyo kuma nyũmbanĩ ya Ngai waitũ?

17Mbeũ nĩ syoee mavandanĩ kũla iĩ; makũmbĩ nĩ mathei, makũmbĩ manene nĩ manangĩku; nũndũ lĩu wa mbaa ngetha nĩwũmĩte.

18A! Ũndũ nyamũ iũluma! Ndĩthya sya ng’ombe nisaanĩw’e, nĩkwĩthĩwa iti na ũĩthyo; ĩĩ, ndĩthya sya malondu nĩ nthĩnu.

19Ame Yeova, nĩngũkwĩkaĩla; nũndũ mwaki nũminĩte isesi sya weũnĩ, na ũlĩlĩnzĩ nũvĩvĩtye mĩtĩ yonthe ya kĩsesinĩ.

20Ĩĩ, nyamũ sya kĩthekanĩ niũkũvevavevea; nũndũ tũlũsĩ nĩ tũng’alu, na mwaki nũminĩte isesi sya weũnĩ.

Jump to: Chapter 2 →