Joel 3

Kamba (Mbivilia) 1956

← Chapter 2 Jump to:

1Nũndũ, sisya, mĩthenya ĩsu, na ĩvinda yĩu, yĩla ngatũnga Yuta na Yelusaleme maume kũtavwanĩ,

2nĩngomban’ya mbaĩ syonthe, na ngaitheesya mwandanĩ wa Yeosavati; na ngaisilĩĩla o vo nũndũ wa andũ makwa na nũndũ wa ũtiĩwa wakwa Isilaeli, ala syanyaĩĩkisye katĩ wa mbaĩ i ingĩ: na syaaan’ya nthĩ yakwa,

3na syalimana nũndũ wa andũ makwa, na syakũan’ya kĩvĩsĩ na ĩlwaya, na kũthoosya mwĩĩtu nũndũ wa mbinyu, nĩ kana manyw’e.

4Ĩĩ, na inyw’ĩ, we Tile, na Sitoni, na nthĩ syonthe sya Vilisitia mwĩ kyaũ kwakwa? Mũkeetũngĩa mwĩkũle vala nĩĩ? Na ethĩwa mũkeekũlanĩlya kwakwa, mĩtũkĩ nzembete ngatũnga wĩkũlo wenyu ĩũlũ wa mũtwe wenyu.

5Nĩkwĩthĩwa nĩmwosete vetha wakwa na thaavu wakwa, na mwatwaa makalũnĩ menyu syĩndũ syakwa nzeo syĩ vata mũno,

6na nĩmũthooetye ana ma Yuta na ana ma Yelusaleme kwa ana ma Akiliki, nĩ kana mũmavete kũasa na mũvaka woo;

7sisyai, ngamokĩlya kuma vala mwamathooisye, na ngatũnga wĩkũlo wenyu ĩũlũ wa mũtwe wenyu ene;

8nakwa ngathoosya ana menyu na eĩtu menyu kw’okonĩ kwa ana ma Yuta, namo makamathoosya kwa andũ ma Sieva, kwa mbaĩ yĩ kũasa: nũndũ Yeova nũneenete ũu.

9Tavan’yai ũndũ ũũ katĩ wa i mbaĩ; ĩyũmbanĩsyei kaũ; ũkĩlyai ngũmbaũ; andũ onthe ma kaũ nĩmathengeee, na nĩmambate.

10Tusyai mĩthya ya maembe menyu ma ng’ombe ĩtw’ĩke mbyũ, na tũvyũ twĩ ngoto twa ũsea tũtw’ĩke matumo: ũla mwonzu nĩasye, Nĩ na vinya.

11Ĩkalaatei, na mũkyũka, inyw’ĩ mbaĩ syonthe ila ithyũlũlũkĩte kw’onthe, na mũkyũmbana vamwe: tuma a me ũtonyi maku matheea kw’o, ame Yeova.

12Eka mbaĩ syĩyũkĩlye, na kwambata mwandanĩ wa Yeosavati; nũndũ ngekala nthĩ kw’o nzilĩle mbaĩ syonthe ila ithyũlũlũkĩte kw’onthe.

13Likyai kavyũ ke ngoto mũkethe; nũndũ ngetha nĩ mbĩu: ũkai, mũange; nũndũ kĩangĩo kya nzavivũ nĩ kyusũu, maviva nĩ mausĩe na kũng’okwa; nũndũ ũthũku woo nĩ mũnene.

14Nguthu, nguthu mwandanĩ wa kũtw’ĩwa maũndũ! Nũndũ mũthenya wa Yeova wĩ vakuvĩ mwandanĩ wa kũtw’ĩwa maũndũ.

15Syũa na mwei niĩsaa kĩvindu, na ndata niekaa kũtisa kwayo.

16Na Yeova akaluma e Saioni, na kumya wasya wake e Yelusaleme; na matu na nthĩ ikathingitha: ĩndĩ Yeova akeethĩwa wĩvitho wa andũ make, na ngome yĩ vinya kwa ana ma Isilaeli.

17Kwondũ wa ũu mũkamanya kana ninyie Yeova Ngai wenyu, ndwĩe Saioni kĩĩmanĩ kyakwa kĩtheu: nĩvo Yelusaleme ĩkethĩwa ntheu, na vatikethĩwa aeni mamĩvĩtĩla ĩngĩ.

18Na kũkeethĩwa mũthenya ũsu, atĩ iĩma iketĩkya mbinyu ĩ mũyo, na tũlĩma tũkanyũlũlũkya ĩia, na tũlũsĩ tw’onthe twa Yuta tũkavĩtya manzĩ; na nthongo ĩkaumĩlĩla nyũmbanĩ ya Yeova, na ĩkanyithya mwanda wa Sitimu.

19Misili ĩkeethĩwa nthei, na Etomu ĩkeethĩwa weũ mũthei, nũndũ wa ũng’endu ũla wĩkĩtwe ana ma Yuta, nĩkwĩthĩwa nĩmetĩkisye nthakame ĩte ĩvĩtyo nthĩ yoo.

20Ĩndĩ Yuta akekalaa tene na tene, na Yelusaleme nzyawa na nzyawa.

21Na ngathesya nthakame yoo, ĩla ndaathesya: nũndũ Yeova atwĩe Saioni.

← Chapter 2 Jump to: