Joel 2

Kamba (Mbivilia) 1956

← Chapter 1 Jump to: Chapter 3 →

1Vuvĩai soo Saioni, na vuvĩai soo wĩ wasya wa kũtĩsya kĩĩmanĩ kyakwa kĩtheu; onthe ala matwĩe ĩ nthĩ mateleme: nũndũ mũthenya wa Yeova nĩwũkĩte, nũndũ nũthengeee;

2mũthenya wa kĩvindu na mũki mũnene, mũthenya wa matu na kĩvindu kya ngokomi, o tondũ w’oa ũtemaa ĩũlũ wa iĩma; andũ anene na me vinya; kũtyaaĩthĩwa o na ĩndĩĩ ala mailyĩ ũu, o na kũtikethĩwa angĩ ĩtina wamo, o na kũvika myaka ya nzyawa mbingĩ.

3Mwaki nũvĩvasya mbee woo; na ĩtina woo ũlĩlĩnzĩ wa mwaki nĩwakene: nthĩ ĩilyĩ mũũnda wa Eteni mbee woo, na ĩtina woo nĩ weũ mũthei; ĩĩ, na kũiĩ waavonoka.

4Mũvw’anĩle woo nĩ ta mũvw’anĩle wa mbalasi; na ta ala matũlĩte mbalasi, nĩw’o masembaa.

5Nĩmatũlĩlaa ta makasya me kĩtuu me ĩũlũ wa iĩma, ta ũlĩlĩnzĩ wa mwaki wĩ kĩuumo ũla ũminaa ũa, ta andũ me vinya mataũĩw’e kaũ.

6Me vo ngo sya andũ syĩthĩwaa na woo mũnene; na mothyũ onthe makĩalyũka.

7Masembaa ta ngũmbaũ; na malĩsĩlaa ũvainĩ ta andũ ma kaũ; na maendaa kĩla ũmwe aeleele mbee, na mĩkwĩlĩnĩ yoo mativĩtavĩtanaa.

8O na vati ũmwe ũnũkũtina ũngĩ; maendaa kĩla ũmwe aeleele mbee; na malĩlasya mĩionĩ ya kaũ, na matiũngamaa.

9Mathaanyũkĩaa ndũa; masembaa ĩũlũ wa ũvai; malĩsaa nyũmbanĩ; malikĩlaa mbũthinĩ ta kĩng’ei.

10Nthĩ nĩthingithaa mbee woo; matu nĩmatetemaa; syũa na mwei niĩsaa kĩvindu, na ndata niekaa kũtisa kwasyo.

11Na Yeova nĩwumasya wasya wake mbee wa ita syake sya kaũ; nũndũ mwako wake wa maeema nĩ mũnene mũno; nũndũ e vinya ũla wĩanĩasya ndeto yake; nũndũ mũthenya wa Yeova nĩ mũnene na wa kũtĩsya mũno; na nũũ ũla ũtonya kũwũmĩĩsya?

12Ĩndĩ o na yu, easya ũu Yeova, ĩnthyũũĩei nyie na ngoo syenyu syonthe, na kũtĩĩa kũya, na kũĩa, na kũmeta:

13na mũkĩtembũa ngoo syenyu, na tĩ ngũa syenyu, na mũkĩmwĩthyũũĩa Yeova Ngai wenyu; nũndũ nĩ mũseo na e tei, mũmĩĩsya wa kũthata, na e na ũseo mwingĩ wĩ wendo, na etũngaa ndakeke ũla ũthũku.

14Nũũ wĩsĩ ethĩwa ndeĩthyũũa na kwĩtũnga, na kũtia ũathimo ĩtina wake, o nthembo ya mũtu na nthembo ya kũnyuwa ya Yeova Ngai wenyu?

15Vuvĩai soo Saioni, vathai ĩvinda ya kũtĩĩa kũya, mete mombane ũmbano ũkilĩtye;

16ũmban’yai andũ, vathan’yai ũmbano wĩthĩwe mũtheu, ũmban’yai atumĩa, ũmban’yai syana, o na tũla twongaa; mũtwaani naume nyũmbanĩ yake ya nthĩnĩ, na mũtwawa naume nyũmbanĩ yake ya nthĩnĩ.

17Athembi, athũkũmi ma Yeova, nĩmaĩe me katĩ wa valasya na kĩthembeo, na nĩmasye, Ekea andũ maku, ame Yeova, na ndũkanengane ũtiĩwa waku ũvũthĩĩw’e, kana i mbaĩ imasumbĩke: nĩ ũndũ wa kĩ kwĩse kũneenanw’a katĩ wa ngo sya andũ makyasya, Ngai woo aĩva?

18Nĩvo ĩndĩ Yeova wewie kĩwĩu nũndũ wa nthĩ yake, na eew’ĩa andũ make ĩnee.

19Na Yeova asũngĩa na amea andũ make, Sisyai, ngamũetee lĩu wa mbaa ngetha, na mbinyu mbĩthĩ, na mauta, na mũkeanĩwa nĩsyo; na ndikatuma mũvũthĩĩw’a ĩngĩ katĩ wa i mbaĩ;

20ĩndĩ ngaveta ita sya kaũ sya ngalĩ ya ĩũlũ kũasa nenyu, na kwilũngĩlĩĩlya nthĩ nyũmũ na nthei, kĩlungu kya mbee kyasyo ũkanganĩ wa ngalĩ ya wumĩlonĩ wa syũa, na kĩlungu kya ĩtina ũkanganĩ wa ũthũĩlonĩ wa syũa; na mũnyungo wasyo mũthũku ũkataavũka, na mũuke wasyo mũthũku ũkataavũka, nĩkwĩthĩwa nĩsyĩkĩte maũndũ manene.

21Ndũkakĩe, we nthĩ, tana na kwĩw’a mũyo; nũndũ Yeova nĩwĩkĩte maũndũ manene.

22Mũikakĩe, inyw’ĩ nyamũ sya kĩthekanĩ; nũndũ isesi sya weũnĩ nithongooete, nũndũ mũtĩ nũsyaĩte ũsyao waw’o, mũkũyũ na mũsavivũ nĩyumĩlĩtye vinya wayo.

23Tanai ĩndĩ, inyw’ĩ ana ma Saioni, na kwĩw’ĩa Yeova Ngai wenyu mũyo; nũndũ nũmũnengae mbua ya nthwa na kĩthimi kya w’o, na nũtumaa mbua yua nũndũ wenyu, mbua ya nthwa na mbua ya uũa mwei wa mbee.

24Na ivũĩo ikausũwa nĩ nganũ, na maviva makausũa na kũng’okwa nĩ mbinyu mbĩthĩ na mauta.

25Na ngamũtũngĩa myaka ĩla yalĩkile nĩ ngie, na mbandi, na kĩthesa, na kĩtĩlĩ, nguthu yakwa nene ya kaũ, ĩla ndũmĩte katĩ wenyu.

26Na mũkaya mwĩanĩwe na kũvũna, na kũtaĩa syĩtwa ya Yeova Ngai wenyu, ũla ũmwĩkĩte maũndũ ma ũseng’ya; na andũ makwa matikasonokw’a o na ĩndĩĩ.

27Na mũkamanya kana nyie nĩ katĩ wa Isilaeli, na kana ninyie Yeova Ngai wenyu, o na kũti ũngĩ; na andũ makwa matikasonokw’a o na ĩndĩĩ.

28Na kũkeethĩwa ĩtina wa ũu, kana ngamĩtulũĩla mĩĩ yonthe Veva wakwa; na ana menyu na eĩtu menyu makathana, atumĩa menyu makaota ndoto, anake menyu makoona mawoni:

29na ĩngĩ ngaitulũĩla ngombo, aũme na aka, Veva wakwa mĩthenyanĩ ĩsu.

30Na ngoonan’ya moseng’yo matunĩ na nthĩ: nthakame, na mwaki, na ituĩ sya syũki.

31Syũa yĩkaalyũkw’a yĩthĩwe kĩvindu, na mwei wĩthĩwe nthakame, mbee wa mũthenya mũnene na wa ũtĩsya wa Yeova ũtanoka.

32Na kũkeethĩwa, o ũla ũkekaĩla syĩtwa ya Yeova nũkatangĩĩwa; nũndũ kĩĩmanĩ kya Saioni na Yelusaleme vakeethĩwa ala makavonoka, o tondũ Yeova waĩtye, na katĩ wa ũtialo vakeethĩwa ala Yeova ũketa.

← Chapter 1 Jump to: Chapter 3 →