Malachi 1

Kamba (Mbivilia) 1956

Jump to: Chapter 2 →

1Ũito wa ndeto ya Yeova kwa Isilaeli kwa kanyw’a wa Malaki.

2Nĩnĩmwendete, easya ũu Yeova. Ĩndĩ inyw’ĩ mwĩkũlya, Ũtwendete ũndũnĩ wĩva? Esau ndaĩ mwana‐a‐inyia wa Yakovo? Ekũlya ũu Yeova: ĩndĩ nĩnamwendie Yakovo;

3ĩndĩ Esau nĩnamũmenie, na natw’ĩkĩthya iĩma syake nthei, na nĩnanengie mbĩwa sya weũnĩ ũtiĩwa wake.

4Vala Etomu ũnũkwasya, Twĩ avalũkye nthĩ, ĩndĩ nĩtũũsyoka na tũkyaka maanzonĩ; Yeova wa nguthu easya atĩĩ, Makaaka, ĩndĩ ngang’uthũlanga; na andũ makametaa Mũvaka wa ũthũku, na Andũ ala Yeova ũmathatĩe tene na tene.

5Na metho menyu makoona, na mũkasya, Yeova nanenevw’e mũkĩlo wa mũvaka wa Isilaeli.

6Mwana ataĩaa ĩthe, na mũthũkũmi vwana wake: ethĩwa ĩndĩ nyie nĩ ĩthe, kũtaĩwa kwakwa kũĩva? Na ethĩwa nyie nĩ vwana, kũkĩwa kwakwa kũĩva? Ĩnyw’ĩ athembi ala mũvũthasya syĩtwa yakwa, emũkũlya ũu Yeova wa nguthu. Na inyw’ĩ mwĩkũlya, Tũvũthĩtye syĩtwa yaku ũndũnĩ wĩva?

7Nĩmũthembaa imũtũ mbuku kĩthembeonĩ kyakwa. Na inyw’ĩ mwĩkũlya, Tũkũvukĩtye ũndũnĩ wĩva? Nũndũ mwĩasya, Mesa ya Yeova nĩ mana.

8Na yĩla mũũthemba ĩla ĩte metho, ti ũthũku! Na yĩla mũkũthemba ĩnĩkũthua na ĩla ndwau, ti ũthũku! Kwamũnenge ngavana waku yu; akendeew’a nue? Kana akakwĩtĩkĩla we? Ekũlya ũu Yeova wa nguthu.

9Na yu, nĩngũmwĩsũva, mũvoye ũseo kwa Ngai, nĩ kana atonye kũtwĩka nesa: ũũ wĩthĩĩtwe kwondũ wenyu: akamwĩtĩkĩla inyw’ĩ o na ũmwe? Ekũlya ũu Yeova wa nguthu.

10A! Kethĩwa ve ũmwe katĩ wenyu ũvinga mĩomo, nĩ kana mũikatonye kũvuva mwaki ĩũlũ wa kĩthembeo kyakwa mana! Ndikwendeew’a nĩ inyw’ĩ, o na ndiketĩkĩla nthembo i kw’okonĩ kwenyu, easya ũu Yeova wa nguthu.

11Nũndũ kuma syũa yauma o na kũvika yathũa syĩtwa yakwa yĩthĩwaa ĩnene katĩ wa Andũ‐ma‐mbaĩ‐ingĩ; na kĩla vandũ ũvani na nthembo ntheu nithembeawa syĩtwa yakwa: nũndũ syĩtwa yakwa yĩthĩwaa ĩnene katĩ wa Andũ‐ma‐mbaĩ‐ingĩ, easya ũu Yeova wa nguthu.

12Ĩndĩ nĩmũyĩvukasya, nũndũ mwĩasya, Mesa ya Yeova nĩvukĩtw’e, na ũsyao wayo, o na lĩu wayo, nĩ mana.

13Na ĩngĩ mwĩasya, Sisyai, ũndũ ĩan’ya mĩnoo! Na nĩmũmĩtimbĩte, easya ũu Yeova wa nguthu; na inyw’ĩ mũetete ĩla yoosiwe na ũng’endu, na ĩla ĩnĩkũthua, na ĩla ndwau; o ta ũu nĩmũetae ĩla nthembo: nĩnaĩle kũmyosa mokonĩ menyu? Ekũlya ũu Yeova.

14Ĩndĩ mũkengani naumanĩwe, ũla wĩavaa, na aithembea Mwĩaĩi ĩmwe yĩ na kĩema, e na nũme ndĩthyanĩ yake ya mbũi na malondu; nũndũ ninyie Mũsumbĩ mũnene, na syĩtwa yakwa nĩ ya ũkĩwa mũno katĩ wa Andũ‐ma‐mbaĩ‐ingĩ, easya ũu Yeova wa nguthu.

Jump to: Chapter 2 →