Malachi 2

Kamba (Mbivilia) 1956

← Chapter 1 Jump to: Chapter 3 →

1Na yu, inyw’ĩ athembi, mwĩao ũũ nĩ kwondũ wenyu.

2Mweethĩwa mũtikwĩw’a, na mweethĩwa mũtikwĩkĩa ũu ngoonĩ, mũnengae syĩtwa yakwa ndaĩa, nĩvo ĩndĩ nĩmũetee kĩumo, na ngamaumanĩa moathimo menyu, easya ũu Yeova wa nguthu; ĩĩ, nĩnĩminĩte kũmaumanĩa, nĩkwĩthĩwa mũtiwĩkĩaa ngoonĩ.

3Sisyai, ngookan’ya ũsyao wenyu, na ngavakanga mũyoo mothyũnĩ menyu, o mũyoo wa nthembo syenyu; nenyu mũkavetanĩw’a naw’o.

4Na mũkamanya kana nĩnaetie mwĩao ũũ kwenyu, nĩ kana ũtianĩo wakwa wĩthĩwe na Livai, easya ũu Yeova wa nguthu.

5Ũtianĩo wakwa waĩ nake wa thayũ na mũuo; na nainenganie kwake nĩ kana akĩe; nake nĩwangĩaa, na kũkĩaa syĩtwa yakwa.

6Mwĩao wa w’o waĩ kanyw’anĩ wake, na ũla ũte ũlũngalu ndwaaoneka ilomonĩ syake; aendanasya nakwa mũuonĩ na ũlũngalunĩ, na akĩalyũla aingĩ kuma ũthũkunĩ.

7Nũndũ ilomo sya mũthembi nĩsyaĩle ũsũvĩaa ũmanyi, na andũ nĩmaĩle kũmanthaa mwĩao kanyw’anĩ wake; nũndũ nĩ mũtũmwa wa Yeova wa nguthu.

8Ĩndĩ nĩmweelelũkile kuma nzĩanĩ; nĩmũtumĩte aingĩ malulutĩka mĩaonĩ; nĩmũthũkĩtye ũtianĩo wa Livai, easya ũu Yeova wa nguthu.

9Kwondũ wa ũu nyie nakwa namũtwie ma mana na mwĩ ĩtheo mbee wa andũ onthe, o kwĩanana na ũndũ mũtaakwata nzĩa syakwa, ĩndĩ mweethĩwa na wendeesyo wa andũ mĩaonĩ.

10Tũi ma ĩthe ũmwe ithyonthe? Ti o Ngai ũmwe ũ watũmbie? Twĩĩkana ũseleke nĩkĩ kĩla mũndũ na mwana‐a‐ĩthe, tũkĩvukya ũtianĩo wa aaĩthe maitũ?

11Yuta nĩwĩkĩte ũseleke, na ũthatyo nĩwĩkĩtwe nthĩnĩ wa Isilaeli na Yelusaleme; nũndũ Yuta nũvukĩtye ũtheu wa Yeova ũla wendaa, na nũtwaĩte mwĩĩtu wa ngai ngeni.

12Kwa mũndũ ũla wĩkaa ũu, Yeova akaveta kuma maeemanĩ ma Yakovo ũla wĩkalaa asalukĩtye na ũla ũsũngĩaa, na ũla ũthembeaa Yeova wa nguthu nthembo.

13Na nĩmwĩkaa ũũ ĩngĩ: nĩmũvw’ĩkaa kĩthembeo kya Yeova na methoi, na kũĩa, na kũvevũũka, kwondũ wa ũu ndetĩkĩlaa nthembo nongi, o na ndamyosaa na kwenda kũseo kw’okonĩ kwenyu.

14Ĩndĩ inyw’ĩ mwĩkũlya. Nĩ ũndũ wa kĩ? Nĩkwĩthĩwa Yeova nĩwĩthĩwaa ngũsĩ katĩ waku na mũka waku wa ũthoo, ũla ũmwĩkĩte ũseleke, o na kau nĩwatindaa nake, na nĩ mũka wa ũtianĩo waku.

15Na ndaaũmba ũmwe, o na kau aĩ na ũtialo wa Veva? Na nĩ ũmwe nĩkĩ? Amanthaa ũsyao wa ũmũkĩaa Ngai. Kwondũ wa ũu sũvĩa veva waku, na mũndũ o na wĩva ndakeke mũka wake wa ũthoo ũseleke.

16Nũndũ nĩnĩmenaa ũndũ ũsu wa mũleano, easya ũu Yeova, Ngai wa Isilaeli, o na ũla ũvw’ĩkaa ngũa yake ũng’endu, easya ũu Yeova wa nguthu: kwondũ wa ũu sũvĩai veva wenyu, nĩ kana mũikeke ũseleke.

17Nĩmũnoetye Yeova na ndeto syenyu. Ĩndĩ mwĩkũlya, Tũmũnoetye ũndũnĩ wĩva? Nũndũ mwĩasya, Kĩla ũmwe wĩkaa ũthũku nĩ mũseo methonĩ ma Yeova, na nĩwendeeaw’a nĩmo; kana aĩva Ngai wĩ ũsili wa katĩ?

← Chapter 1 Jump to: Chapter 3 →