Nahum 1

Kamba (Mbivilia) 1956

Jump to: Chapter 2 →

1Ndeto ngito ũndũ wa Nineva. Ĩvuku ya woni wa Naumu Mũelikosi.

2Yeova nĩ Ngai wĩ kĩwĩu na nũĩvanĩasya; Yeova nũĩvanĩasya na nĩwusũĩtwe nĩ ũthilĩku; Yeova nĩwĩĩvanĩasya kwa nthũ syake, na nĩwiaa ũthilĩku nũndũ wa amaitha make.

3Yeova nĩ mũmĩĩsya wa kũthata, na mũnene ũtonyinĩ, na ndakamũtala o na ata mũvĩtan’ya ta ũte na ũndũ: Yeova e na nzĩa yake kĩlinginĩ na kĩuutaninĩ, na mathweo nĩ kĩtoo kya nyaĩĩ syake.

4Nũkanasya ũkanga, na akong’alya, na kũng’alya mbũsĩ syonthe: Mbasani nĩkũleela, na Kalimeli; na ĩlaa ya Levanoni nĩyĩkũvova.

5Iĩma nitetemaa nũndũ wake, na tũlĩma tũkĩtweka; na nthĩ nĩyũkĩlanĩtye mbee wake, ĩĩ, nthĩ, na syonthe ila imĩtwĩa.

6Nũũ ũla ũtonya kũũngama mbee wa ũthilĩku wake? Na nũũ ũla ũtonya kwĩkala wainĩ wa ũthatu wake? Ũthilĩku wake nĩ mwonosye ta mwaki, na mavia manene nĩmatũanganĩtw’e nĩwe.

7Yeova nĩ mũseo, ngome yĩ vinya mũthenya wa thĩna; na nũmesĩ ala mevithaa nthĩnĩ wake.

8Ĩndĩ akaminũkĩlya vandũ vayo vyũ na kĩw’ũ kingĩ kĩvĩtĩte, na akamaatĩĩa amaitha make malike kĩvindũnĩ.

9Mwĩsũanĩĩa Yeova ata? Akaminũkĩlya vyũ; thĩna ndũkokĩla ĩvinda ya kelĩ.

10O na makwatanĩte ta mĩw’a, na matoonetw’e nĩ kũnyw’a kwoo, ĩndĩ nĩmaminĩtwe vyũ ta ũa wũmũ.

11Kwĩ ũmwe wumĩte kwaku, ũla ũsũanĩĩaa Yeova ũthũku, ũla ũtaanaa ũtao mũthũku.

12Ũũ nĩw’o Yeova ũnũkwasya: O na ethĩwa nĩmausũĩtwe nĩ vinya ki, o na ethĩwa nĩ aingĩ, ĩndĩ makatemangwa mavalũke nthĩ, na akavĩta athi. O na ethĩwa nĩngũthĩnĩtye, ndikakũthĩn’ya ĩngĩ.

13Na yu ngatũla ĩsoki yake yume kwaku, na ngatilan’ya kĩla kĩkwovete.

14Na Yeova nũnenganĩte mwĩao ũndũ waku, kana matikavuĩwa ĩngĩ o na ũmwe ala ma syĩtwa yaku: ngaveta mũvw’anano mwasũvye na mũvw’anano wa syĩndũ itwekethetw’e kuma nyũmbanĩ ya ngai syaku; ngenza va ũkũthika; nũndũ wĩ mũvuku.

15Sisya, iĩmanĩ maũũ ma ũla ũetae ũvoo mũseo, ũla ũnyaĩĩkasya mũuo! Lilikana mboka syaku, we Yuta, ĩanĩsya mawĩvĩto maku; nũndũ ũla mũthũku ndakavĩtĩla kwaku ĩngĩ; nĩ mũvete vyũ.

Jump to: Chapter 2 →