Nahum 3

Kamba (Mbivilia) 1956

← Chapter 2 Jump to:

1Woo nĩ wa ndũa ya nthakame! Nĩyusũĩte movũngũ na ũvutani vyũ; mũtavo ndumaa.

2Kĩtoleko kya mũsalisa na kĩlonzo kya ndĩa ikĩkayan’ya, na mbalasi itũlĩlangĩte, na makasya ma kaũ kũthakanga,

3ũla ũtũlaa mbalasi akĩtũla, na ũvyũ ũkĩtisatisa, na ĩtumo yĩkĩtisatisa, na wingĩ wa oawa, na mbumbu nene ya simba, na vati mũminũkĩlyo wa simba; nĩmalulutĩkaa ĩũlũ wa simba syoo; —

4nũndũ wa wingĩ wa ũmalwaya wa ĩlwaya yanake, ĩnene ya mooi, yĩla yĩthooasya mbaĩ kwondũ wa ũmalwaya wayo, na mĩvĩa kwondũ wa mooi mayo.

5Sisya, nĩ na ũndũ naku, easya ũu Yeova wa nguthu, na ngakũvua ngũa syaku nĩvikye ũthyũnĩ waku; na ngoon’ya mbaĩ wĩ mũthei, na mosumbĩ nthoni syaku.

6Na ngakwĩkĩsya ũvuku ũthatasya, na ũkũvukya, na ngakwĩkalya ta wĩ wa kukũnũĩwa metho.

7Na kũkeethĩwa, atĩ onthe ala meũkũsisya makakĩa kuma vala ũĩ, na kwasya, Nineva nĩyanangĩtwe: nũũ wĩmĩmetea? Nĩkũmanthĩa akiakisya nakũ?

8We wĩ kavaa kwĩ No‐amoni, ĩla yaĩ katĩ wa mbũsĩ, ĩla yathyũlũlũkĩtwe nĩ manzĩ; ĩla wiio mũlũmu wayo waĩ ũkanga, na ũvaĩ wayo waĩ o ũkanga?

9Ethiovia na Misili nĩsyo syaĩ vinya wayo, na waĩ ũtathela; Vutu na Luvimu syaĩ atethya maku.

10Ĩndĩ nĩwatwaiwe, nĩwaendie e mũtave; tũũkenge twake natw’o twang’atanganĩw’a twatilĩkangĩla tũlungu myambĩlĩlyonĩ ya nzĩa nene syonthe; na malimana ũndũ wa andũ make ala me ndaĩa, na andũ make onthe anene moovwa na mĩnyololo.

11O naku ũkanyw’a ũmilwe; ũkavithwa; o na ĩngĩ ũkamantha ngome yĩ vinya nũndũ wa mũmaitha.

12Ngome syaku syonthe ikeethĩwa ta mĩkũyũ ĩ na makũyũ mambaa kwĩwa: ethĩwa ĩkathingithw’a, nĩmeũvalũka kanyw’anĩ wa mũyi.

13Sisya, andũ maku ala me katĩ waku nĩ iveti; mbingĩlo sya nthĩ yaku nĩ mbingũe vyũ kwa amaitha maku: mwaki nũminĩte ivingo syaku.

14Ĩtavĩe kĩw’ũ kya yĩla wĩtw’ĩkanĩw’a; lũlũmĩlya ngome syaku; enda yũmbanĩ noianga ndaka; lũlũmĩlya kĩvĩvĩsyo kya mavali.

15Mwaki ũkakũvĩvĩsya vo; ũvyũ ũkakũveta; ũkakũmina o tondũ mbandi iminaa: ĩyingĩvye o ta mbandi; ĩvingĩvye o ta ngie.

16Nĩwingĩvĩtye athoosya maku kwĩ ndata sya ĩtu: mbandi nikwananga, na ikĩũlũka ikĩthi.

17Anene maku me mbee ũsumbĩnĩ nĩ ta ngie, na anene maku nĩ ta mĩkũmbĩ ya ngie nene ila ikomaa wiionĩ mũthenya kwĩ mbevo, ĩndĩ syũa yaumĩla ikĩũlũka ikĩthi, na vala iĩ vakĩlea kũmanyĩka.

18Aĩthi maku nĩmomboetye, we mũsumbĩ wa Asuli; anene maku me ndaĩa nĩmathũmũĩte; andũ maku nĩmanyaĩĩkĩte iĩmanĩ, na vatiĩ o na ũmwe wa kũmomban’ya.

19Ĩkũnwa yaku yĩtivoeka; wũkite waku wĩ woo: onthe ala mew’aa ũvoo waku nĩmaũkũnangĩaa mbĩ; nũndũ nũũ ũthũku waku ũtavĩtĩlaa ĩũlũ wake ĩndĩ yonthe?

← Chapter 2 Jump to: