Philippians 2

Kamba (Mbivilia) 1956

← Chapter 1 Jump to: Chapter 3 →

1Ethĩwa ĩndĩ kwĩ ũtao o na wĩva nthĩnĩ wa Klĩsto, ethĩwa kwĩ ũkiakisyo o na wĩva wa wendo, ethĩwa kwĩ mũamba o na wĩva wa Veva, ethĩwa kwĩ matei mololo na kwĩw’anĩa manee o na meva,

2wusũsyei ũtanu wakwa, kana mwĩthĩwe na kĩlilikano o kĩmwe, mwĩ na wendo ũmwe, mwĩ na ngoo ĩmwe, mũkĩlilikana ũndũ ũmwe;

3mũikeke ũndũ o na wĩva na ngananĩo kana kwĩkathĩĩa kwa mana, ĩndĩ na wĩnyivyo kĩla mũndũ namũtale ũla ũngĩ mũseo kwĩ we mwene;

4kĩla mũndũ wenyu ndakasũvĩe syĩndũ syake mwene, ĩndĩ kĩla ũmwe wenyu nasũvĩe syĩndũ sya ala angĩ nasyo.

5Ĩthĩwai na kĩlilikano kĩĩ nthĩnĩ wenyu, o kĩla kyaĩ nthĩnĩ wa Klĩsto Yesũ:

6nake, yĩla waĩ na mũvw’ano wa Ngai, ndaatala kwĩanana na Ngai ta nĩ ũndũ wa kũkwatwa,

7ĩndĩ eeyĩkalya e mũthei, aiosa mũvw’ano wa ngombo, eethĩwa ailyĩ ũndũ ũmwe na mũndũ;

8na ooneka e na wũmbe wa mũndũ, eenyivya mwene, atw’ĩka mwĩwi, o na kũvika kĩkw’ũ, ĩĩ, kĩkw’ũ kya ngelan’yo.

9Kwondũ wa ũu Ngai amũnenevya mũno, na amũnenga syĩtwa yĩla yĩ mbee wa masyĩtwa onthe;

10nĩ kana kwa syĩtwa ya Yesũ kĩla ĩu yĩtulya ndu, ya ala me ĩtunĩ na ala me nthĩ na ala me ungu wa nthĩ,

11na nĩ kana kĩla ũĩmĩ wĩumbũla kana Yesũ Klĩsto nĩ Mwĩaĩi, kwa ndaĩa ya Ngai Asa.

12Kwondũ wa ũu ĩndĩ, endwa makwa, o ũndũ mwaĩ ewi mavinda onthe, ti yĩla naĩ vo yoka, ĩndĩ yu mbee mũno nde vo, ĩanĩsyai ũtangĩĩo wenyu na kĩkĩo na kĩtetemo;

13nũndũ nĩ Ngai ũla wĩkaa nthĩnĩ wenyu akĩtuma mwendaa na kwĩkaa kwenda kwake kũseo.

14Ĩkai maũndũ onthe mũtekũnyungunyĩsya na kũkananĩa;

15nĩ kana mwĩthĩwe mũtailĩĩlĩka ũthũku na mwĩ auu, syana sya Ngai ite na ũndũ ũtaĩle katĩ wa ũsyao mũthũku na mũemu, naw’o nthĩnĩ waw’o nĩmwonekaa ta syeni kũũ nthĩ,

16mũkĩlĩtye ndeto ya thayũ; nĩ kana nĩthĩwe na ũndũ wa kwĩkathĩĩa mũthenya wa Klĩsto, kana ndyaasemba mana kana kũtethya wĩa mana.

17Ĩĩ, na ethĩwa nĩtulũlwa ĩũlũ wa nthembo na ũthũkũmi wa mũĩkĩĩo wenyu, nĩngwĩw’a mũyo, na kũtana vamwe nenyu inyw’onthe:

18na inyw’ĩ o ta ũu tanai, na ĩthiwai na mũyo vamwe nakwa.

19Ĩndĩ nĩngwĩkwatya nthĩnĩ wa Mwĩaĩi Yesũ kũmũtũma Timotheo kwenyu mĩtũkĩ, nĩ kana nyie nĩtonye kũkiakiw’a, namanya ũndũ mũilyĩ.

20Nũndũ ndi na mũndũ ũngĩ ũla ũlilikanaa ũndũ ũmwe nakwa, ũla ũtonya kũsisya w’o mwĩkalĩle wenyu.

21Nũndũ onthe nĩmeũmantha maũndũ moo ene, ti maũndũ ma Yesũ Klĩsto.

22Ĩndĩ nĩmwĩsĩ ũndũ wake, kana nĩwatethisye wĩa vamwe nakwa kwondũ wa ũnyaĩĩkya ũla ũvoo mũseo, o ũndũ mwana ũtethasya ĩthe wake.

23Ĩndĩ nĩngwĩkwatya kũtũma ũsu mĩtũkĩ, o yĩla nĩmanya ũndũ nĩĩkwa:

24ĩndĩ nĩngũĩkĩĩa Mwĩaĩi kana nyie mwene ngooka mĩtũkĩ.

25Ĩndĩ nona no mũvaka nĩmũtũme Evavilotito kwenyu, mwana‐a‐asa wakwa na mũtethya wa wĩa vamwe nakwa na mũsikalĩ vamwe nakwa, nake nĩ mũtũmwa wenyu na mũthũkũmi wa vata wakwa;

26nĩkwĩthĩwa aĩ na mea nenyu inyw’onthe, na aũũyaa ngoonĩ, nũndũ mwewie kana aĩ mũwau:

27nũndũ nĩ w’o, aĩ mũwau mũno, vakuvĩ kũkw’a: ĩndĩ Ngai nĩwamwĩwĩie tei; na ti we weka, ĩndĩ o na nyie nakwa, nĩ kana ndikethĩwe na woo ĩũlũ wa woo.

28Kwondũ wa ũu neethĩwa na kĩthing’ĩĩsyo kingĩ kya ũmũtũma, nĩ kana, mwamwona ĩngĩ, mũtonye kũtana, nakwa nĩnyivĩwe nĩ woo.

29Mwosei ĩndĩ nthĩnĩ wa Mwĩaĩi na ũtanu w’onthe; na mataĩei ala mailyĩ take:

30nĩkwĩthĩwa kwondũ wa wĩa wa Klĩsto aĩ vakuvĩ kũkw’a, na ndaasũvĩa thayũ wake nĩ kana eanĩsye kĩla kyatialĩte kwenyu kya ũndethya.

← Chapter 1 Jump to: Chapter 3 →