Philippians 4

Kamba (Mbivilia) 1956

← Chapter 3 Jump to:

1Kwondũ wa ũu, ana‐a‐asa makwa ala nendete mũno na ala nĩ na mea ma kũmwona, ũtanu wakwa na ngovia ya ũsumbĩ, ũngamai na ũlũmu nthĩnĩ wa Mwĩaĩi, endwa makwa.

2Nĩmwĩsũva Euotia, na nĩmwĩsũva Sinitike nake, methĩwe na kĩlilikano kimwe nthĩnĩ wa Mwĩaĩi.

3Ĩĩ, na nĩngũkwisũva we, mwovanĩw’a wa w’o vamwe nakwa wĩanĩ, ũmatethye aka asu, nũndũ nĩmatethisye wĩa vamwe nakwa ũla ũvoonĩ mũseo, vamwe na Kilemendi nake, na ala angĩ atethya ma wĩa vamwe nakwa. Nao masyĩtwa moo me ĩvukunĩ ya thayũ.

4Tanaai nthĩnĩ wa Mwĩaĩi mavinda onthe: na ĩngĩ nĩngwasya Tanaai.

5Wũmĩĩsyo wenyu ũmanyĩke nĩ andũ onthe, Mwĩaĩi e vakuvĩ.

6Mũikemakĩe kwa ũndũ o na wĩva; ĩndĩ kĩla ũndũnĩ mavata menyu nĩmatavanw’e kwa Ngai na kũvoya na kwĩsũva vamwe na kũtũnga mũvea.

7Na mũuo wa Ngai, ũla ũvĩtũkĩte ũmanyi w’onthe, ũkasũvĩaa ngoo syenyu na mosũanĩo menyu nthĩnĩ wa Klĩsto Yesũ.

8Kũminũkĩlya, ana‐a‐asa, maũndũ o na meva ala ma w’o, maũndũ o na meva ala me na ndaĩa, maũndũ o na meva ala malũngalu, maũndũ o na meva ala matheu, maũndũ o na meva ala ma kwendeesya, maũndũ o na meva ala me na nguma nzeo; ethĩwa ve ũseo o na wĩva w’onthe, na ethĩwa ve ndaĩa o na yĩva yonthe, malilikanei maũndũ asu.

9Maũndũ ala mweemanyĩisye kwakwa na kũmosa na kũmew’a na kũmona, mekei maũndũ asu: na Ngai wa mũuo akeethĩwa vamwe nenyu.

10Ĩndĩ nĩtana mũno nthĩnĩ wa Mwĩaĩi, atĩ yu nĩmwambĩlĩlye ĩngĩ kũndilikana; na nĩmwandilikene w’o, ĩndĩ mũtyaaona ũthei.

11Ti atĩ nĩneena ũu nũndũ nĩ na vata: nũndũ nĩneemanyĩisye, ũndũnĩ o na wĩva ũla nĩ naw’o, kwĩthĩwa ndi na ũndũ.

12Nĩnĩsĩ ũndũ kũilyĩ kũnyivĩwa, na nĩnĩsĩ ũndũ kũilyĩ kwingĩvĩwa nakw’o: kĩla ũndũnĩ na maũndũnĩ onthe nĩnĩmanyĩĩtye kũvũna o na kwĩw’a nzaa, kwĩthĩwa na nyingĩ na kũnyivĩwa.

13Nĩndonya maũndũ onthe nthĩnĩ wake ũla ũndonyethasya.

14Ĩndĩ mwekie nesa mũno mweethĩwa na mũamba nakwa mathinanĩ makwa.

15Nenyu ene nĩmwĩsĩ, inyw’ĩ Avilivi, kana wambĩlĩlyonĩ wa ũla ũvoo mũseo, yĩla naumie Masetonia, vaiai ĩkanisa yaĩ na mũamba nakwa ũndũnĩ ũũ wa kũnengane na kwosa, ate o inyw’ĩ inyw’oka;

16nĩkwĩthĩwa o na kũu Thesalonika nĩmwandetee ũtethyo kwondũ wa vata wakwa, o na ti ĩvinda yĩmwe.

17Ti kwĩthĩwa nĩngũwenda ũla mũthĩnzĩo; ĩndĩ nĩngwenda ũsyao ũla wingĩvaa ũtalonĩ wenyu.

18Ĩndĩ nĩ na syĩndũ syonthe, na nĩningĩvĩwe: na ĩngĩ nĩnusũĩte, nũndũ nĩnĩsyosete mokonĩ ma Evavilotito syĩndũ ila syumĩte kwenyu, nĩ mũuke mũseo, nĩ nthembo ĩtĩkĩlawa, ĩla ĩmwendeeasya Ngai.

19Na Ngai wakwa akawĩanĩsya kĩla vata wenyu kwĩanana na ũthwii wake ndaĩanĩ nthĩnĩ wa Klĩsto Yesũ.

20Na yu Ngai, Asa waitũ, nataĩwe tene na tene. Ameni.

21Ngethesyai kĩla mũtheu nthĩnĩ wa Klĩsto Yesũ. Ana‐a‐asa ala me nakwa nĩmamũkethya.

22Atheu onthe nĩmamũkethya, na mũno nĩ ala ma nyũmba ya Kaisali.

23Mumo wa Mwĩaĩi Yesũ Klĩsto nĩwĩthĩwe na maveva menyu.

← Chapter 3 Jump to: