Philippians 3

Kamba (Mbivilia) 1956

← Chapter 2 Jump to: Chapter 4 →

1Kũminũkĩlya, ana‐a‐asa, tanai nthĩnĩ wa Mwĩaĩi. Kũmũandĩkĩa inyw’ĩ maũndũ o asu ĩngĩ, ndiũnoa, ĩndĩ kwenyu ni ũsũvĩo.

2Ĩsũvĩei ila ngitĩ, ĩsũvĩei ala atethya ma mawĩa mathũkũ, ĩsũvĩei ala metemaa:

3nũndũ ithyĩ twĩ ala maĩkawa, ala tũthaithaa ũndũ wa Veva wa Ngai, na twĩkathĩĩaa nthĩnĩ wa Klĩsto Yesũ, na tũtiĩkĩĩaa mwĩĩ:

4o na kau nyie mwene nĩndonya kũĩkĩĩa mwĩĩ: ethĩwa mũndũ ũngĩ o na wĩva eona e na ũndũ wa kũĩkĩĩa mwĩĩ, nyie nĩ mbee:

5naĩkiwe mũthenya wa nyanya, nĩ wa mbaĩ ya Isilaeli, wa mũvĩa wa Mbenyamini, Mũevelania wa Aevelania; ũndũ wa ĩla mĩao, naĩ Mũvalisi;

6ũndũ wa ũthangaau mũnene, nathĩnisye ĩkanisa; na ũndũ wa ũlũngalu ũla wĩ mĩaonĩ, ndyaailĩĩlĩka ũndũ.

7Ĩndĩ maũndũ ala maĩ ma nguna, nĩmo natalile kwĩthĩwa nĩ wasyo kwondũ wa Klĩsto.

8Ĩĩ nĩ w’o, na nĩtalaa syĩndũ syonthe kwĩthĩwa nĩ wasyo ũndũ wa ũseo mũnene wa ũmũmanya Klĩsto Yesũ Mwĩaii wakwa: we ũla kwondũ wake naaisye syindũ syonthe, na kwitala kwĩthĩwa nĩ mavuthĩ, nĩ kana nĩmwone Klĩsto,

9nakwa noneke nthĩnĩ wake, nde na ũlũngalu wakwa mwene, naw’o ti ũla wonekaa ĩla maĩonĩ, ĩndĩ ũla wonekaa kwondũ wa kũikĩĩa Klĩsto, ũlũngalu ũla wumaa kwa Ngai kwondũ wa mũĩkĩĩo:

10nĩ kana nĩmũmanye we, na vinya wa kũthayũũka kwake, na mũamba wa mathĩna make, ngĩvw’ananw’a na kikw’ũ kyake;

11nĩ kana kwa ũndũ o na wĩva w’onthe nĩtonye kũvikĩa ũthayũũkyo kuma kwa akw’ũ.

12Ti atĩ nĩnĩvikĩte, kana ngethĩwa mwĩanĩu: ĩndĩ nĩngwĩthĩng’iĩsya kũthi na mbee, nĩ kana nĩtonye kũkikwata kĩla kwondũ wakyo nakwatiwe nĩ Klĩsto Yesũ.

13Ana‐a‐asa, ndikwĩtala mwene ta nĩkwatĩte: ĩndĩ ũndũ ũũ ũmwe nĩngwĩka, ngyũlwa nĩ maũndũ ala me ĩtina, na ngikoota nĩvĩkĩe maũndũ ala me mbee,

14nĩngwĩthĩng’iĩsya kũthi nĩvikĩe ngoolu kwondũ wa mũthĩnzĩo ũla neetiwe ĩũlũ nĩ Ngai nthĩnĩ wa Klĩsto Yesũ.

15Ithyĩ ĩndĩ ala eanĩu tũlilikane ũu: na ethĩwa nĩmũũlilikana ũndũ ũngĩ, ũndũnĩ o na wĩva, Ngai akamũvuanĩsya ũndũ ũsu naw’o:

16ĩndĩ o vala tũvikĩte tũendeei ũndũnĩ o ũsu.

17Ana‐a‐asa, inyw’onthe ĩthĩwai mũkĩelekan’ya nakwa, na masisyei ala maendaa na kũatĩĩa ngelekan’yo ĩla twamũnengie.

18Nũndũ aingĩ nĩmaendaa, ala nĩmũtavasya ũvoo woo kaingĩ, na yu nĩngũmũtavya o ngĩtĩkya methoi, kana nĩ amaitha ma ngelan’yo ya Klĩsto:

19na mũminũkĩlyo woo nĩ wanangĩko, na ngai yoo nĩ ĩvu, na kwĩtaĩa kwoo kwĩ maũndũnĩ ma nthoni syoo, na malilikanaa maũndũ ma nthĩ.

20Nũndũ kwitũ nĩ ĩtunĩ; naitũ nĩtweteelaa Mũtangĩĩi ũla wĩuma vo, nake nĩ Mwĩaĩi Yesũ Klĩsto:

21ũla ũkaalyũla mwĩĩ ũũ wa ũnyivu witũ, wĩthĩwe ũvw’anene na mwĩĩ wa ũtaĩo wake, kwĩanana na kwĩka kũla ũtonya o na kũnyivya syĩndũ syonthe syĩthĩwe ĩtheo wake mwene.

← Chapter 2 Jump to: Chapter 4 →