Zephaniah 1

Kamba (Mbivilia) 1956

Jump to: Chapter 2 →

1Ndeto ya Yeova ĩla yamũkĩe Nzevania mwana wa Kusi, mwana wa Ngetalia, mwana wa Amalia, mwana wa Esekia, mĩthenya ya Yosia mwana wa Amoni, mũsumbĩ wa Yuta.

2Ngamina syĩndũ syonthe vyũ syume ĩũlũ wa nthĩ, easya ũu Yeova.

3Ngamina mũndũ o na nyamũ; ngamina nyũnyi sya yayayanĩ, na makũyũ ma ũkanganĩ, na molulutĩkyo vamwe na ala athũku; na ngaveta mũndũ aume ĩũlũ wa nthĩ, easya ũu Yeova.

4Na ngatambũũkya kw’oko kwakwa ĩũlũ wa Yuta, na ĩũlũ wa onthe ala matwĩe Yelusaleme; na ngaveta ũtialo wa Mbaali wume vandũ vaa, o na syĩtwa ya Kemalimu vamwe na athembi;

5o na ala mathaithaa nguthu ya ĩtunĩ me nyũmbanĩ ĩũlũ; o na ala mathaithaa, ala mamwĩavĩaa Yeova na kwĩava na Malikamu;

6o na ala methyũũĩte na ĩtina maeke kũmũvikĩla Yeova; na ala matamũmanthĩte Yeova, o na kũmũkũlya.

7Ĩkilĩlye, Mwĩaĩi Yeova e vo; nũndũ mũthenya wa Yeova nũthengeee: nũndũ Yeova nũseũvĩtye nthembo, nũvathĩte aeni make.

8Na kũkeethĩwa mũthenya wa nthembo ya Yeova, ngasilĩla anene me mbee ũsumbĩnĩ, na ana ma mũsumbĩ, na onthe ala mevw’ĩkaa ngũa ngeni.

9Na mũthenya ũsu ngasilĩla onthe ala makĩlĩlaa mwalyonĩ wa mũomo, ala mausũasya nyũmba ya vwana woo ũng’endu na ũkengani.

10Na mũthenya ũsu, easya ũu Yeova, kũkeethĩwa kĩlonzo kya kũkaya mbingĩlonĩ ya makũyũ, na kĩĩo kuma ũtũinĩ wa kelĩ, na kĩtuu kĩnene kuma iĩmanĩ.

11Ĩai, inyw’ĩ mũtwĩe Maketesi; nũndũ andũ onthe ma Kanaani nĩ au vinya; onthe ala makuĩte mĩio ya vetha nĩmavetwa.

12Na kũkeethĩwa ĩvinda yĩu, ngamantha nthĩnĩ wa Yelusaleme na mataa; na ngasilĩla andũ ala mekalĩte kĩmongoyonĩ kyoo, ala maasya ngoonĩ syoo, Yeova ndeĩka ũseo, o na ndeĩka ũthũku.

13Na ũthwii woo ũkatavwa, na nyũmba syoo ikatiwa syĩ nthei: ĩĩ, makaaka nyũmba, ĩndĩ matikaitũa; na makavanda mĩũnda mĩsavivũ, ĩndĩ matikanyw’a mbinyu yayo.

14Mũthenya mũnene wa Yeova wĩ vakuvĩ, wĩ vakuvĩ na nĩwĩkalaatĩte mũno, o wasya wa mũthenya wa Yeova; ngũmbaũ ĩĩĩaa vo kĩĩo kĩ woo.

15Mũthenya ũsu nĩ mũthenya wa ũthilĩku, mũthenya wa ũnyamao na thĩna, mũthenya wa wanangĩko na ĩvou, mũthenya wa kĩvindu na mũki mũnene, mũthenya wa matu na kĩvindu kya ngokomi,

16mũthenya wa soo na wa wasya wa kũtĩsya, ĩũlũ wa ila ndũa mbiie, na ĩũlũ wa ala maũvai matũlu mũno.

17Na ngaete thĩna ĩũlũ wa andũ, nĩ kana maendae ta ililinda, nĩkwĩthĩwa nĩmamũvĩtanĩsye Yeova; na nthakame yoo ĩketwa nthĩ ta kĩtoo, na mĩĩ yoo ta kyaa.

18O na vetha woo kana thaavu woo ndũkethĩwa ũtonya kũmavonokya mũthenya wa kũthilĩka kwa Yeova; ĩndĩ nthĩ yonthe ĩkaminwa nĩ mwaki wa kĩwĩu kyake: nũndũ akaminũkĩlya, ĩĩ, mũminũkĩlyo mwai, wa onthe ala matwĩe ĩ nthĩ.

Jump to: Chapter 2 →